బీఆర్​ఎస్​ ఎమ్మెల్యేలు మల్లారెడ్డి, పల్లా రాజేశ్వర్​రెడ్డికి హైకోర్టు నోటీసులు - TELANGANA HC NOTICES TO BRS MLAs

Telangana HC Notices To BRS MLAs : బీఆర్ఎస్ ఎమ్మెల్యేలు చామకూర మల్లారెడ్డి, పల్లా రాజేశ్వర్ రెడ్డిలకు హైకోర్టు నోటీసులు జారీ చేసింది. తప్పుడు ఎన్నికల అఫిడవిట్ సమర్పించారని కాంగ్రెస్ నేత వేసిన పిటిషన్​ అంగీకరించిన ధర్మాసనం, ఇద్దరు శాసనసభ్యులు జూన్​ 16న విచారణకు రావాలని ఆదేశించింది.

Telangana High Court Notices To BRS MLAs Over Election Affidavits :ఇద్దరు బీఆర్ఎస్ ఎమ్మెల్యేలకు రాష్ట్ర ఉన్నత న్యాయస్థానం షాక్ ఇచ్చింది. మేడ్చల్​, జనగాం నియోజకవర్గాల ఎమ్మెల్యేలు చామకూర మల్లారెడ్డి, పల్లా రాజేశ్వర్​ రెడ్డిలకు హైకోర్టు నోటీసులు ఇచ్చింది. వారి ఎన్నికను సవాలు చేస్తూ దాఖలైన వేర్వేరు పిటిషన్లలో హైకోర్టు నోటీసులు జారీ చేసింది. ఎన్నికల నామినేషన్​ సందర్భంగా తప్పుడు వివరాలతో అఫిడవిట్​ సమర్పించిన మల్లారెడ్డి ఎన్నికను రద్దు చేయాలని కోరుతూ కాంగ్రెస్​ అభ్యర్థి తోటకూర వజ్రేష్​ యాదవ్​ పిటిషన్​ వేశారు. దీనిపై జస్టిస్​ జె.శ్రీనివారావు విచారణ చేపట్టగా, పిటిషనర్​ తరఫు న్యాయవాది సిద్ధార్థ్​ పోగుల వాదనలు వినిపించారు. రిటర్నింగ్ అధికారికి మల్లారెడ్డి తప్పుడు అఫిడవిట్​ సమర్పించారని తెలిపారు.

Congress Election Petition on Malla Reddy :సూరారం గ్రామంలో కొంత భూమి ఉందని అఫిడవిట్​లో పేర్కొన్నారని, రికార్డుల ప్రకారం అది ప్రభుత్వ భూమి లాగా ఉందన్నారు. మల్లారెడ్డి హిందూ అవిభాజ్య కుటుంబ పెద్దగా ఉన్నట్లు చెప్పారని తెలిపారు. బ్యాంకు ఖాతాలు లేవని అఫిడవిట్​లో తెలిపారని వివరించారు. బ్యాంకు ఖాతాలు లేకుండా ఆదాయపు పన్ను రిటర్ను ఎలా దాఖలు చేస్తున్నారో వివరాలు వెల్లడించలేదని కోర్టుకు వివరించారు..

Telangana High Court Notice To Palla Rajeshwar Reddy :మరో పిటిషన్​లో పల్లా రాజేశ్వర రెడ్డి ఎన్నికను సవాలు చేస్తూ కొమ్మూరి ప్రతాప్​ రెడ్డి హైకోర్టులో పిటిషన్​ దాఖలు చేశారు. పిటిషనర్లు సమర్పించిన ఆధారాలపై సంతృప్తి చెందిన న్యాయమూర్తి ఎమ్మెల్యేలకు నోటీసులు జారీ చేశారు. జూన్​ 16వ తేదీన విచారణకు రావాలని పల్లా రాజేశ్వర్ రెడ్డిని ఆదేశించారు. ఈ రెండు నియోజకవర్గాల్లోని స్ట్రాంగ్ రూంలో ఉన్న ఈవీఎంలను వచ్చే పార్లమెంట్ ఎన్నికలకు ఉపయోగించుకోవడానికి అవకాశం ఇవ్వాలంటూ ఎన్నికల సంఘం దాఖలు చేసిన మధ్యంతర పిటిషన్లను అనుమతించారు. దీనిపై పిటిషినర్ల తరఫు న్యాయవాదులు అభ్యంతరం వ్యక్తం చేయకపోవడంతో ఈవీఎంలను వినియోగించుకోవడానికి న్యాయమూర్తి అనుమతిచ్చారు.