Indian Youth Following Dink Lifestyle : పెళ్లికి ఆసక్తి చూపని వారే కాదు పెళ్లైనా పిల్లల్ని కనడానికీ సంకోచిస్తున్న వారూ లేకపోలేదు. భార్యభర్తలిద్దరం సంపాదిస్తాం హాయిగా జీవిస్తాం కానీ, పిల్లలు మాకొద్దు అనే వారూ ఉన్నారు. ఇలాంటి మనస్తత్వం ఉన్న వారి సంఖ్య కూడా ఏటా పెరుగుతోంది. పిల్లలు అంటే చాలు అదనపు ఖర్చు కింద ఆర్థిక భారంగా భావిస్తున్నారు. ఇదో ట్రెండ్‌గానూ మారింది. దాన్నే డింక్ కల్చర్ అంటే డ్యూయల్ ఇన్కం నో చిల్డ్రన్స్ అని గర్వంగా చెబుతున్నారు. నిజానికి ఒకప్పుడు ఇంటి నిండా పిల్లలుంటే అదో సంబరం. ఆ తర్వాత ఇద్దరు పిల్లలతో సరిపెట్టుకున్నారు. అనంతరం అది ఒకరికి పడిపోయింది. ఇప్పుడు ఏకంగా పిల్లలే వద్దంటున్నారు.
ఒకరు కూడా వద్దు అంటూ :పూర్వం అంటే తాతలనాటి కాలంలో పిల్లలు ఎంతమంది అంటే 8 లేదా 9 అంతకు మించి అనే సంఖ్య వినిపించేది. తర్వాత కుటుంబ నియంత్రణ, జనాభా రేటు అంటూ ఇద్దరు పిల్లలు ముద్దు, ముగ్గురు వద్దు అని అనేవారు. అనంతరం ఇది ఒకరికి పడిపోయింది. ఇద్దరి కంటే ఒకరే బెస్ట్ అనుకున్నారు. కాగా ఇప్పుడు ఏకంగా పిల్లలే వద్దని అనుకుంటున్నారు. దీన్నే డింక్ కల్చర్‌గా గొప్పగా చెప్పుకుంటున్నారు. ఇదో ట్రెండ్‌గానూ మారింది. పాశ్చాత్య దేశాల్లోని ఈ విధానం క్రమంగా ఇండియాకూ పాకుతోంది. డింక్ కల్చర్‌కు అట్రాక్ట్‌ అవుతున్న భార్యభర్తలు పిల్లల్ని కనడానికి ఆసక్తి చూపడం లేదని అధ్యయనాలు వెల్లడిస్తున్నాయి.
మా వల్ల కాదంటూ :ఏంటీ డింక్ కల్చర్ అంటే దీని పూర్తి అర్థం (డ్యూయల్ ఇన్‌కమ్ నో కిడ్స్‌). పిల్లల కంటే తమ అవసరాలపైనే దృష్టి సారించేలా భార్యభర్తలిద్దలు తీసుకుంటున్న నిర్ణయమే డింక్ కల్చర్. అంటే భార్యభర్తలిద్దరూ తమ అవసరాల కోసం ఉద్యోగాలు చేస్తారు. కేరీర్‌ను ఉన్నతంగా తీర్చిదిద్దుకుంటారు. అధిక ఆదాయమూ సంపాదిస్తారు. కానీ, పిల్లలు కనడంపై ఆసక్తి చూపరు. పిల్లలంటే భారంగా భావిస్తారు. పిల్లల ఆలనాపాలన మనవల్ల కాదు, పిల్లల్ని కంటే తమ ఆనందానికి అడ్డంకులు ఏర్పడతాయని అనుకుంటారు.
మన యువత కూడా :కష్టపడి సంపాదించిన సొమ్మంతా పిల్లలకే ఖర్చు చేస్తే మా జీవితం ఎక్కడుంది అనేదే డింక్ కల్చర్‌కు అట్రాక్ట్‌ అవుతున్న వారి అభిప్రాయం. ఒక్కముక్కలో చెప్పా లంటే భార్యభర్తలిద్దరే హాయిగా జీవించడానికి, ఆర్థికంగా బలపడేందుకు ప్రయత్నిస్తారు. కానీ, ఫ్యామిలీ అంటే పిల్లలు, భవిష్యత్‌ తరానికి వారు అవసరం. కుటుంబాల వృద్ధి, దేశాభివృద్ధిలో పిల్లలు కీలకం అనే విషయాన్ని మర్చిపోతున్నారు. ఒకప్పుడు విదేశాల్లో ఎక్కువగా ఉండే ఈ కల్చర్ ఇప్పుడు ఇండియాకి కూడా వచ్చినట్లు అధ్యయనాలు చెబుతున్నాయి.
రిస్ట్రిక్షన్స్ లేకుండా వాళ్లకు నచ్చినట్టు :డ్యుయెల్‌ ఇన్కం నో కిడ్స్‌ లేదా డబుల్‌ ఇన్కం నో కిడ్స్‌‌‌‌లను షార్ట్‌ ఫాంలో డింక్ అని పిలుస్తారు. ఈ ట్రెండ్‌ 1980ల నుంచి బాగా ప్రాచుర్యంలో ఉంది. అయితే గత ఐదారేళ్లుగా సోషల్‌ మీడియాలో ఇలాంటివాళ్లు వాళ్ల లైఫ్ స్టైల్‌ గురించి పోస్ట్‌‌‌‌లు పెడుతుండడంతో డింక్‌కి బాగా పబ్లిసిటీ పెరిగింది. పైగా ఆ పోస్ట్‌‌‌‌లు చూసి ప్రేరణ పొంది చాలామంది డింక్‌‌‌‌లుగా మారుతున్నారు. ఈ కల్చర్‌ని ఫాలో అయ్యే వారు ఖాళీ టైంని లైఫ్ పార్ట్‌‌‌‌నర్‌‌‌‌‌‌‌‌తో లేదా స్నేహితులు, కుటుంబంతో గడపడానికి ఇష్టపడతారు. నచ్చిన ప్రాంతాలు సందర్శిస్తారు. నచ్చింది తింటారు. ఒక్కమాటలో చెప్పాలంటే ఏ రిస్ట్రిక్షన్స్ లేకుండా వాళ్లకు నచ్చినట్టు బతుకుతారు. వాళ్ల అభిరుచులు, ఆనందం కోసం మాత్రమే డబ్బు ఖర్చు చేస్తారు. ఇలాంటి వాళ్లు మొన్నటివరకు ఎక్కువగా ఆర్థికంగా అభివృద్ధి చెందిన దేశాల్లోనే కనిపించేవాళ్లు. కానీ, అది క్రమంగా ప్రపంచమంతా వ్యాపిస్తోంది.
డింక్ కల్చర్‌కు అట్రాక్ట్‌ అవుతుండటానికి అనేక కారణాలు ఉన్నాయి. ఒక సర్వే ప్రకారం ప్రపంచవ్యాప్తంగా డింక్ కల్చర్ ఫాలో అయ్యే వాళ్లలో చాలామంది ఫైనాన్షియల్‌ ఫ్రీడం కోసమే పిల్లల్ని ఇష్టపడడం లేదని చెప్పారు. పిల్లలు ఉంటే వాళ్ల ఆరోగ్యం, చదువు కోసం చాలా ఖర్చు పెట్టాల్సి వస్తుంది. ఈ కాలంలో ఖర్చులు పెరిగినంత వేగంగా ఆదాయాలు పెరగడం లేదు. అందువల్ల పిల్లలు తలకు మించిన భారం అనుకుంటున్నారు.
సంపాదించించి పిల్లల కోసం ఖర్చు చేస్తే మాకేంటి అంటూ :పిల్లలు వద్దు అనుకుంటున్నవాళ్లలో దాదాపు 61 % మంది ఇదే కారణం చెప్పినట్లు అధ్యయనంలో వెల్లడైంది. వాళ్లు పిల్లల కంటే కెరీర్‌‌‌‌‌‌‌‌కే ఎక్కువ ప్రాధాన్యత ఇస్తున్నారు. అమెరికాలోని బ్రూకింగ్స్ అనే సంస్థ అధ్యయనం ప్రకారం 2015లో పుట్టిన ఒక బిడ్డను 17ఏళ్ల వరకు పెంచేందుకు 3 లక్షల డాలర్లకు పైగా ఖర్చు అవుతుంది. తక్కువ ఆదాయం ఉన్న కుటుంబాలు బిడ్డ కోసం అంత ఖర్చు చేయలేక పిల్లల్ని కనడం లేదు. సంపాదించింది అంతా పిల్లల కోసమే ఖర్చు చేస్తే తమ పరిస్థితి ఏంటని భార్యభర్తలు భావిస్తున్నట్లు నిపుణులు చెబుతున్నారు.