వెజిటేరియన్స్​ ఫేవరెట్​ "మష్రూమ్​ దమ్​ బిర్యానీ" - ఫిదా అయిపోతారు!

-పుట్టగొడుగులతో రుచికరమైన బిర్యానీ -ఇలా చేస్తే ఇంట్లో అందరూ ఇష్టంగా లాగిస్తారు

Restaurant Style Mushroom Dum Biryani Recipe : శాకాహారులకు మాంసకృత్తులు అందించే పదార్థాల్లో పుట్టగొడుగులు కూడా ఒకటి. కానీ, చాలా మంది వీటితో ఏ వంటలు ట్రై చేయరు. కొంతమంది చేసినా ఎప్పుడూ మసాలా కర్రీ, ఫ్రై వంటి రెసిపీలు ట్రై చేస్తుంటారు. అయితే, ఎన్నో పోషకాలున్న మష్రూమ్స్​తో ఇప్పుడు దమ్​ బిర్యానీ ఎలా చేయాలో చూద్దాం.

ముందుగా దమ్​ బిర్యానీకి కావాల్సిన పదార్ధాలు :

• బాస్మతి రైస్​-2 కప్పులు (గంటపాటు నానబెట్టుకోవాలి)
• నీళ్లు -2 లీటర్లు
• అనాసపువ్వులు-2
• లవంగాలు-6
• దాల్చినచెక్క-3
• యాలకులు-6
• మరాఠి మొగ్గ-2
• బిర్యానీ ఆకులు-2
• ఉప్పు రుచికి సరిపడా
• షాజీరా- అరటీస్పూన్​
• పచ్చిమిర్చి-3
• అల్లం వెల్లుల్లి పేస్ట్​-టీస్పూన్​
• నూనె -టేబుల్​స్పూన్
• నెయ్యి-టేబుల్​స్పూన్
• కుంకుమ పువ్వు-చిటికెడు

దమ్​ బిర్యానీ తయారీ విధానం :

• ముందుగా దమ్​ బిర్యానీ కోసం స్టౌపై గిన్నె పెట్టండి. నీళ్లు వేడయ్యాక అనాసపువ్వులు, లవంగాలు, దాల్చినచెక్క, యాలకులు, మరాఠి మొగ్గ, బిర్యానీ ఆకులు వేయండి.
• అలాగే రుచికి సరిపడా ఉప్పు, షాజీరా, పచ్చిమిర్చి వేసి కలపండి. నీళ్లు బాగా మరుగున్నప్పుడు అల్లం వెల్లుల్లి పేస్ట్​ వేసి మిక్స్​ చేయాలి.
• తర్వాత నీటిలో బాస్మతి బియ్యం వేసుకోండి. రైస్​ 80 శాతం ఉడికించుకున్న తర్వాత.. జాలీ గరిటె సహాయంతో ఒక హండీలో స్ప్రెడ్ చేసుకోండి. నీటిలో నుంచి అన్నం పూర్తిగా హండీలోకి తీసుకోండి.
• ఇప్పుడు హండీలో.. రైస్​ ఉడికించుకున్న నీటిని అరకప్పు చల్లుకోండి. అలాగే కుంకుమపువ్వు నానబెట్టిన నీటిని కూడా చల్లుకోవాలి. ఇంకా కొద్దిగా ఫ్రైడ్​ ఆనియన్స్​ చల్లాలి. అలాగే కొద్దిగా నూనె, నెయ్యి కూడా రైస్​పై వేసుకోవాలి.
• ఇప్పుడు హండీపై మూతపెట్టి దమ్​ కోసం స్టౌపై పెట్టాలి. రైస్​ని నాలుగు నిమిషాలు మీడియం ఫ్లేమ్​లో, అలాగే నాలుగు నిమిషాలు లో ఫ్లేమ్​లో దమ్​ చేసుకోవాలి. తర్వాత అరగంటపాటు అలా వదిలేయాలి.
• అంతే ఇలా సింపుల్​గా చేసుకుంటే మష్రూమ్​ బిర్యానీలోకి దమ్​ రైస్​ రెడీ అయిపోతుంది.

మరి ఇప్పుడు మష్రూమ్​ మసాలా ఎలా చేయాలో చూద్దాం..

మష్రూమ్ మసాలాకి కావాల్సిన పదార్థాలు :

• మష్రూమ్​-200 గ్రాములు
• ఉల్లిపాయ-1
• నూనె పావుకప్పు
• ఉప్పు-రుచికి సరిపడా
• చక్కెర-టీస్పూన్​
• అల్లం వెల్లుల్లి పేస్ట్-టీస్పూన్​
• ధనియాలపొడి-టీస్పూన్​
• కారం-టేబుల్​స్పూన్​
• పసుపు-పావుటీస్పూన్
• జీలకర్రపొడి-అరటీస్పూన్​​
• పెరుగు-పావుకప్పు
• కొత్తిమీర,పుదీనా తరుగు-కొద్దిగా
• ఫ్రైడ్​ ఆనియన్స్​ కొన్ని
• కసూరీ మేథి-టేబుల్​స్పూన్
• నిమ్మరసం-టేబుల్​స్పూన్​

గ్రేవీ కోసం..

• జాపత్రీ-చిన్నది
• అనాసపువ్వులు-2
• రాతి పువ్వు-కొద్దిగా
• యాలకులు-3
• చిన్న దాల్చినచెక్క
• లవంగాలు-4
• జీడిపప్పులు-15
• కర్బూజ గింజలు-టేబుల్​స్పూన్​
• గసగసాలు- అర టేబుల్​స్పూన్​
• టమాటాలు-3
• నీళ్లు-కొద్దిగా

తయారీ విధానం :

• ముందుగా మష్రూమ్​లను శుభ్రంగా కడిగి మధ్యలోకి కట్​ చేసుకోవాలి. అలాగే టమాటా, ఉల్లిపాయలను సన్నగా కట్​ చేసుకోవాలి.
• తర్వాత దమ్​ బిర్యానీ కోసం ఉడికించుకున్న రైస్​ నీటిలో మష్రూమ్​ ముక్కలు వేయాలి. (మీరు మరొక గిన్నెలో మంచి నీటిని తీసుకొని కూడా మష్రూమ్ ఉడికించుకోవచ్చు.)
• వీటిని 70 శాతం వరకు ఉడికించి ఒక గిన్నెలోకి తీసుకోవాలి. తర్వాత అందులో కొన్ని కూల్​ వాటర్​ పోయాలి.
• తర్వాత ఒక మిక్సీ గిన్నెలోకి మసాలా దినుసులు, టమాటా ముక్కలు తీసుకోవాలి. ఇందులో వాటర్​ యాడ్​ చేసుకుంటూ మెత్తని పేస్ట్​లాగా సిద్ధం చేసుకోవాలి.
• ఇప్పుడు మష్రూమ్ మసాలా చేయడం కోసం స్టౌపై పాన్​ పెట్టండి. ఇందులో నూనె పోసి వేడి చేయండి. ఆపై ఉల్లిపాయ ముక్కలు వేసి రంగు మారే వరకు ఫ్రై చేయండి.
• ఇప్పుడు అల్లం వెల్లుల్లి పేస్ట్​, ధనియాలపొడి, కారం, పసుపు, రుచికి సరిపడా ఉప్పు, జీలకర్రపొడి వేసుకుని వేపుకోవాలి.
• తర్వాత గ్రైండ్​ చేసుకున్న మసాలా పేస్ట్​ వేసుకుని కలుపుకోవాలి. ఇప్పుడు ఇందులో కొన్ని వాటర్​ యాడ్​ చేసి నూనె పైకి తేలెంత వరకు ఉడికించుకోవాలి.
• ఒక పది నిమిషాల తర్వాత ఉడికించుకున్న మష్రూమ్​ ముక్కలు వేసి బాగా కలపాలి. ఆపై పెరుగు, కొత్తిమీర,పుదీనా తరుగు, కొన్ని ఫ్రైడ్​ ఆనియన్స్​ వేసి మిక్స్​ చేయాలి.
• గ్రేవీ చిక్కగా అనిపిస్తే కొన్ని నీళ్లు యాడ్​ చేసి మరో 5 నిమిషాలు కుక్ చేసుకోండి.
• తర్వాత ఇందులో కసూరీ మేథి నలిపి వేసుకోండి. అలాగే పుదీనా తరుగు, పంచదార, నిమ్మరసం వేసి మిక్స్​ చేసి స్టౌ ఆఫ్​ చేయండి.
• అంతే ఇలా చేసుకుంటే ఘుమఘుమలాడే మష్రూమ్ మసాలా తయారైపోతుంది.
• ఒక ప్లేట్లోకి దమ్​ బిర్యానీ రైస్​ వేసుకుని.. కొద్దిగా మష్రూమ్ మసాలా వేసుకుంటే సరిపోతుంది. ఎంతో రుచికరమైన రెస్టారెంట్​ స్టైల్​ మష్రూమ్ దమ్​ బిర్యానీ మీ ముందుంటుంది.

ఇవి కూడా చదవండి :