How to Make Poori Curry Without Onion:పూరీ.. అంటే చాలా మందికి ఇష్టం. సూపర్ కాంబినేషన్ అయినా పూరీ కర్రీతో తింటే దీని రుచే వేరు. అందుకే చాలా మంది బ్రేక్ఫాస్ట్, స్నాక్స్గా పూరీలను చేసినప్పుడు ఈ కర్రీని తప్పకుండా ప్రిపేర్ చేస్తుంటారు. ఈ పూరీ కర్రీలో మెయిన్ ఇంగ్రిడియంట్ అంటే ఉల్లిపాయ అని చెప్పవచ్చు. అయితే ఇప్పుడు కార్తికమాసం నడుస్తోంది. ఈ క్రమంలో చాలా మంది ఈ నెలంతా ఉల్లి, వెల్లుల్లి వంటి వాటికి దూరంగా ఉంటారు. ఇక అలాంటి వారి పూరీ కర్రీనీ ప్రిపేర్ చేసుకోలేరు. అయితే ఇకపై అలాంటి అవసరం లేకుండా కేవలం నిమిషాల్లోనే ఉల్లిపాయలు లేని పూరీ కర్రీని తయారు చేసుకోవచ్చు. టేస్ట్ ఏ మాత్రమూ మారదు. మరి దీనిని ఎలా తయారు చేయాలి? ఏఏ పదార్థాలు కావాలో ఈ స్టోరీలో చూద్దాం..
కావాల్సిన పదార్థాలు:
- నూనె - 2 టీస్పూన్లు
- ఆవాలు - 1 టీస్పూన్
- శనగపప్పు - 1 టీస్పూన్
- మినపప్పు - 1 టీ స్పూన్
- జీలకర్ర - 1 టీ స్పూన్
- కరివేపాకు - 2 రెమ్మలు
- పచ్చిమిర్చి - 2
- ఎండుమిర్చి - 2
- అల్లం తరుగు - అర టీ స్పూన్
- క్యాబేజీ తురుము - 200 గ్రాములు
- పసుపు - అర టీ స్పూన్
- ఉప్పు - రుచికి సరిపడా
- నీళ్లు - 400 ml
- తాజా బఠానీ - అర కప్పు
- శనగపిండి - టేబుల్ స్పూన్
- ఆలూ - 2
- చింతపండు గుజ్జు - 1 టేబుల్ స్పూన్
తయారీ విధానం:
- ముందుగా బంగాళదుంపలను ఉడికించి పొట్టు తీసి పక్కకు పెట్టుకోవాలి.
- ఆ తర్వాత ఓ చిన్న గిన్నెలోకి శనగపిండి వేసి 50 ml నీళ్లు పోసి ఉండలు లేకుండా కలిపి పక్కన పెట్టాలి.
- ఇప్పుడు క్యాబేజీని శుభ్రంగా కడిగి సన్నగా కట్ చేసుకోవాలి. అలానే పచ్చిమిర్చి కూడా సన్నగా కట్ చేసుకోవాలి. చింతపండను నానబెట్టి గుజ్జుగా తీసుకోవాలి.
- ఇప్పుడు స్టవ్ ఆన్ చేసి పాన్ పెట్టి నూనె పోసి వేడి చేసుకోవాలి.
- ఆ తర్వాత అందులోకి ఆవాలు వేసి చిటపటలాడించిన తర్వాత శనగపప్పు, మినపప్పు వేసి వేయించుకోవాలి.
- ఇప్పుడు జీలకర్ర, కరివేపాకు, పచ్చిమిర్చి ముక్కలు, ఎండు మిర్చి, అల్లం తరుగు వేసి ఫ్రై చేసుకోవాలి.
- ఆ తర్వాత సన్నగా తరిగిన క్యాబేజీ, పసుపు, రుచికి సరిపడా ఉప్పు వేసి స్టవ్ను హై ఫ్లేమ్లో పెట్టి 3 నిమిషాల పాటు కలుపుతూ ఫ్రై చేసుకోండి.
- ఆ తర్వాత 400 ml నీళ్లు పోసుకుని కలిపి మంటను మీడియం ఫ్లేమ్లో పెట్టి మూత పెట్టి క్యాబేజీని మెత్తగా ఉడికించుకోవాలి.
- క్యాబేజీ ఉడికిన తర్వాత తాజా బఠానీ వేసి మూత పెట్టి మెత్తగా ఉడికించుకోవాలి.
- క్యాబేజీ, బఠానీ మెత్తగా ఉడికిన తర్వాత ముందే కలిపిపెట్టుకున్న శనగపిండి మిశ్రమాన్ని మరో మారు కూరలోకి పోసుకోవాలి.
- ఆ తర్వాత 150 ml నీళ్లు, ఉడికించిన ఆలూను చిదిమి వేసుకుని బాగా కలిపి చిక్కని చింతపండు గుజ్జును పోసుకుని బాగా కలుపుకోవాలి. తర్వాత మంటను హై ఫ్లేమ్ మీద పెట్టి మరో మూడు నిమిషాలు ఉడికించి దింపేసుకోవాలి.
- అంతే ఎంతో రుచికరమైన ఉల్లిపాయలు లేని పూరీ కర్రీ రెడీ. ఇది పూరీ, చపాతీల్లోకి సూపర్గా ఉంటుంది. మరి నచ్చితే మీరూ ట్రై చేయండి.
నోట్లో వేసుకుంటే కరిగిపోయే "పెసరపప్పు సున్నుండలు" - చిటికెలో ప్రిపేర్ చేసుకోండిలా! - టేస్ట్ అద్భుతం!
క్రిస్పీ అండ్ స్పైసీ "గోధుమపిండి కారప్పూస మిక్చర్" - ఇలా చేస్తే ఎక్కువ రోజులు తాజాగా - టేస్ట్ సూపర్!
