How to Make Minapappu Tomato Pachaadi:మినపప్పు.. ప్రతీ వంటింట్లోని పోపుల డబ్బాలో ఉండేదే. అంతేనా.. ఇడ్లీ, దోశ, వడ ఇలా ఏ బ్రేక్ఫాస్ట్ ప్రిపేర్ చేయలన్నా ఇది కావాలి. కేవలం టిఫెన్స్ మాత్రమే కాదు.. పిల్లల లంచ్ బాక్స్లోకి సరిపడే విధంగా మినపప్పుతో ఫ్రైడ్ రైస్ను చేసుకోవచ్చు. ఇన్ని రకాలుగా ఉపయోగపడుతున్న మినపప్పుతో.. అద్దిరిపోయే పచ్చడి కూడా చేసుకోవచ్చంటే మీరు నమ్ముతారా? కానీ నమ్మాలి. మినపప్పు, టమాట కలిపి రోటీ పచ్చడి చేస్తే ఆ వాసనకే కడుపు నిండిపోతుంది. ఇక తింటే ఆ టేస్ట్ గురించి చెప్పక్కర్లేదు. ఈ పద్ధతిలో తయారు చేసిన పచ్చడిని వేడి వేడి అన్నంలోకి వేసుకుని కూసింత నెయ్యి కలిపి తింటే అమృతమే. మరి ఇంత టేస్టీ మినపప్పు పచ్చడిని ఎలా ప్రిపేర్ చేసుకోవాలో ఈ స్టోరీలో చూద్దాం..
కావాల్సిన పదార్థాలు:
- నూనె - సరిపడా
- మినపప్పు - అర కప్పు
- ధనియాలు - 2 టీ స్పూన్లు
- జీలకర్ర - అర టీ స్పూన్
- ఎండు మిర్చి -15
- మెంతులు - చిటికెడు
- టమాటలు - 3
- చింతపండు - చిన్న నిమ్మకాయ సైజంతా
- ఉప్పు - రుచికి సరిపడా
తాలింపు కోసం:
- నూనె - 2 టీ స్పూన్లు
- పచ్చిశనగపప్పు - 1 టీస్పూన్
- ఆవాలు- 1 టీ స్పూన్
- జీలకర్ర - 1 టీస్పూన్
- దంచిన వెల్లుల్లి రెబ్బలు - 5
- ఎండు మిర్చి - 2
- కరివేపాకు - 2 రెమ్మలు
తయారీ విధానం:
- ముందుగా టమాటలను శుభ్రంగా కడిగి చిన్న ముక్కలుగా కట్ చేసుకోవాలి.
- ఆ తర్వాత స్టవ్ ఆన్ చేసి సిమ్లో పెట్టి పాన్ పెట్టి రెండు టేబుల్ స్పూన్ల నూనె పోసుకోవాలి.
- నూనె కొద్దిగా హీట్ అయిన తర్వాత మినపప్పు వేసుకుని దోరగా మంచి వాసన వచ్చే వరకు వేయించుకోవాలి.
- మినపప్పు కలర్ మారుతున్నప్పుడు ధనియాలు, జీలకర్ర వేసి మరి కొద్దిసేపు ఫ్రై చేసుకోవాలి.
- ఆ తర్వాత ఎండు మిర్చిని తుంపి వేసుకువాలి. ఇలా తుంచి వేసుకుంటే మిరపకాయలు లోపల వరకు వేగి టేస్ట్ బాగుంటుంది. మెంతులు కూడా వేసుకుని వేయించుకోవాలి.
- అన్ని పదార్థాలు వేగిన తర్వాత ఓ ప్లేట్లోకి తీసుకుని చల్లారనివ్వాలి.
- ఇప్పుడు అదే పాన్లో మరికొద్దిగా నూనె వేసి టమాట ముక్కలు వేసి కలపాలి. ఆ తర్వాత చింతపండు, రుచికి సరిపడా ఉప్పు వేసి కలిపి మూత పెట్టి మంటను సిమ్లో పెట్టి మెత్తగా ఉడకించాలి.
- టమాట ముక్కలు ఉడికిన తర్వాత పక్కకు పెట్టి చల్లారనివ్వాలి. ఇది చల్లారేలోపు.. ముందే వేయించుకున్న మినపప్పు మిశ్రమాన్ని మిక్సీజార్లోకి వేసుకుని కొద్దిగా బరకగా గ్రైండ్ చేసుకోవాలి.
- ఆ తర్వాత అందులోకి ఉడికించిన టమాట ముక్కలు వేసి మళ్లీ గ్రైండ్ చేసుకోవాలి. అయితే ఇక్కడ పచ్చడిని మరీ మెత్తగా కాకుండా కాస్త బరకగానే మిక్సీ పట్టుకోవాలి.
- ఇలా మిక్సీ పట్టిన మిశ్రమాన్ని ఓ గిన్నెలోకి తీసుకుని పక్కకు పెట్టుకోవాలి.
- ఇప్పుడు స్టవ్ ఆన్ చేసి పాన్ పెట్టి రెండు టీ స్పూన్ల నూనె పోసుకోవాలి. నూనె కాగిన తర్వాత ఆవాలు, జీలకర్ర, శనగపప్పు వేసి వేయించుకోవాలి. ఆ తర్వాత ఎండు మిర్చి, దంచిన వెల్లుల్లి రెబ్బలు, కరివేపాకు వేసి ఫ్రై చేసుకుని స్టవ్ ఆఫ్ చేసుకోవాలి.
- ఈ తాలింపు మిశ్రమాన్ని పచ్చడిలో కలుపుకుంటే.. ఎంతో రుచికరంగా ఉండే మినపప్పు టమాట పచ్చడి రెడీ. వేడి వేడి అన్నంలోకి కలుపుకుని తింటే రుచి అద్దిరిపోవాల్సిందే. మరి నచ్చితే మీరూ ఓ సారి ట్రై చేయండి.
సొరకాయ పచ్చిమిర్చి రోటి పచ్చడి - వేడివేడి అన్నంలోకి అద్దిరిపోతుంది!
రొటీన్ కూరలు తిని నోరు చప్పగా తయారైందా? - ఇలా "పచ్చిమిర్చి బండ పచ్చడి" ట్రై చేయండి - చాలా టేస్టీ!
మునగ ఆకులు కోసుకుంటే ఎవ్వరూ వద్దనరు! - చక్కగా "మునగాకు రోటి పచ్చడి" చేసుకోండి! - నోటికి అమృతం, ఆరోగ్యానికి దివ్య ఔషధం!
