How to Make Malai Modak in Telugu : వినాయక చవితి రోజు విఘ్నేశ్వరుడి ఉదరాన్ని తృప్తిపరచాలంటే భారీ వంటకాలు చేయనక్కర్లేదు. గణేశుడు ఎంతో ఇష్టపడే.. మోదక్, ఉండ్రాళ్లు, పులిహోర, ఇతర తీపి వంటకాలు నైవేద్యంగా సమర్పిస్తే చాలు ఆయన మనసు నిండిపోతుంది. కానీ, ఏటా ఒకటే స్టైల్లో మోదకాలు చేస్తే లంబోదరుడికి బోరు కదా..! అందుకే కాస్త ట్రెండు మార్చి.. ఇలా పాలతో వెరైటీగా మోదక్లు(Modak)ప్రిపేర్ చేసి నైవేద్యంగా సమర్పించండి. ఇవి ఎంతో రుచిగా ఉంటాయి. పైగా ప్రిపరేషన్ కూడా చాలా ఈజీ! మరి, ఈ సూపర్ టేస్టీ మిల్క్ మోదకాలను ఎలా ప్రిపేర్ చేసుకోవాలో ఈ స్టోరీలో తెలుసుకుందాం.
కావాల్సిన పదార్థాలు :
- పాలు - 2 లీటర్లు
- కుంకుమ పువ్వు - కొద్దిగా
- పంచదార - 150 గ్రాములు
- యాలకుల పొడి - అరటీస్పూన్
- నెయ్యి - తగినంత
- సన్నగా తరిగిన బాదంపప్పు పలుకులు - కొన్ని
వినాయక చవితి ప్రసాదాలు.. గణపయ్యకు అత్యంత ఇష్టమైనవి ఇవే!
తయారీ విధానం :
- ఇందుకోసం ముందుగా స్టౌపై ఒక బౌల్ పెట్టుకొని పాలు పోసుకోవాలి. మంటను హై ఫ్లేమ్లో ఉంచి పాలను బాగా వేడి చేసుకోవాలి. అయితే, పాలు అడుగు మాడిపోకుండా, పొంగిపోకుండా మధ్యమధ్యలో కలుపుకుంటూ మరిగించుకోవాలి.
- పాలు బాగా వేడి అయ్యాక.. అందులో నుంచి పావు కప్పు నుంచి అర కప్పు మిల్క్ను ఒక చిన్న బౌల్లోకి తీసుకోవాలి. ఆపై వాటిలో కొంచం కుంకుమ పువ్వు వేసి కలుపుకొని కాసేపు పక్కన పెట్టుకోవాలి. అలా ఉంచడం వల్ల కుంకుమ పువ్వు ఆ వేడి పాలలో బాగా నాని పాలు కాస్త పసుపు కలర్లోకి వస్తాయి. బయటైతే ఫుడ్ కలర్ని వాడతారు.
- ఇలా కుంకుమ పువ్వు యాడ్ చేయడం వల్ల మోదకాలు అనేవి బయట దొరికే వాటిలా పసుపు కలర్లో కనిపిస్తాయి. అయితే, మీకు అందుబాటులో కుంకుమ పువ్వు లేకపోతే ఫుడ్ కలర్ కూడా కలుపుకోవచ్చు.
- ఇప్పుడు స్టౌపై మరిగించుకుంటున్న పాలను మధ్య మధ్యలో గరిటెతో కలుపుకుంటూ మీగడ పాత్ర అంచులకు అంటుకోకుండా లోపలకి అనుకుంటూ బాగా వేడి చేసుకోవాలి. అంటే.. పాత్రలో పాలు సగం కంటే తక్కువగా వచ్చే వరకు కలుపుతూ మరిగించుకోవాలి.
- పాలు సగం వరకు మరిగి చిక్కబడి, మీగడ మీగడలా వచ్చాక అందులో కుంకుమ పువ్వు కలిపి పెట్టుకున్న పాలను యాడ్ చేసుకొని కలుపుకోవాలి. అనంతరం ఆ మిశ్రమాన్ని మరో ఐదారు నిమిషాలు మధ్యమధ్యలో కలుపుతూ వేడిచేసుకోవాలి.
- ఇప్పుడు అందులోకి రుచికి సరిపడా పంచదార వేసుకొని కలుపుకోవాలి. ఆపై మిశ్రమాన్ని మధ్యమధ్యలో కలుపుకుంటూ కాస్త దగ్గర పడే వరకు ఉడికించుకోవాలి.
- మిశ్రమం కాస్త దగ్గర పడ్డాక.. అందులో యాలకుల పొడి వేసి కలిపి.. కోవా పాన్ నుంచి సెపరేట్ అయ్యేంత వరకు ఉడికించుకోవాలి.
- అయితే, ఇక్కడ మీరు ఫుల్ ఫ్యాట్పాలు(Milk) తీసుకోకుండా నార్మల్ పాలు తీసుకుంటే ఈ టైమ్లో రెండు నుంచి మూడు టేబుల్ స్పూన్ల నెయ్యి వేసుకొని కలుపుతూ మిశ్రమం మొత్తం దగ్గరకు అయ్యేంత వరకు ఉడికించుకోవాలి.
- ఇకపోతే మీకు కావాల్సిన కన్సిస్టెన్సీ వచ్చిందో.. రాలేదో.. తెలియాలంటే గరిటెతో కొద్దిగా మిశ్రమం ప్లేట్లోకి తీసుకొని చేతికి కొంచం నెయ్యి రాసుకొని ఆ మిశ్రమాన్ని రౌండ్ బాల్లా చేయాలి. అప్పుడు అది పర్ఫెక్ట్గా, చక్కగా వస్తే మీకు కావాల్సిన కన్సిస్టెన్సీ వచ్చిందని భావించాలి. అలాకాకుండా.. పల్చగా వస్తే మరికాసేపు ఉడికించుకోవాలి.
- ఆవిధంగా.. మీకు కావాల్సిన కన్సిస్టెన్సీ వచ్చాక స్టౌ ఆఫ్ చేసుకొని గిన్నెను దించుకొని కలుపుతూ మిశ్రమాన్ని పూర్తిగా చల్లార్చుకోవాలి.
- ఆ తర్వాత మిశ్రమాన్ని ఒక ప్లేట్లోకి తీసుకొని మోదకాలు ప్రిపేర్ చేసుకోవాలి. అయితే ఇందుకోసం మోదకాలు చేసుకునేవి యూజ్ చేయవచ్చు. లేదంటే.. చేతితో ప్రిపేర్ చేసుకోవచ్చు.
- ఒకవేళ చేతితో చేసుకుంటే.. చేతికి నెయ్యి రాసుకుని కొద్దిగా పాలకోవ మిశ్రమాన్ని తీసుకుని చిన్న చపాతీలా చేసుకోవాలి.
- ఆపై అందులో కొద్దిగా బాదం పలుకులు ఉంచి మోదక్లా వచ్చేలా చేసుకోవాలి. ఇలా మిగిలిన పిండినీ చేసుకోవాలి. లేదంటే.. బాదం పలుకులను పాలకోవ మిశ్రమంలో కలుపుకొని కొద్ది కొద్దిగా పిండి తీసుకొని మోదక్లా ప్రిపేర్ చేసుకోవచ్చు.
- అంతే.. ఎంతో టేస్టీగా ఉండే మిల్క్ మోదక్లు రెడీ! ఆపై వీటిని బొజ్జ గణపయ్యకు ప్రసాదంగా సమర్పిస్తే సరిపోతుంది.
వినాయక చవితి రోజు ఏ రాశివారు ఏ ప్రసాదం పెట్టాలి? - ఏ రంగు గణపతిని పూజిస్తే అదృష్టం?
ఒక్కో ఆకుతో ఒక్కో అనారోగ్య సమస్య దూరం! అందుకే గణపయ్యకు 21 పత్రాలతో పూజ!!
