కూల్​ వెదర్​లో హాట్​ అండ్​ స్పైసీ "చికెన్‌ ముల్లిగటావ్నీ సూప్‌" - ఇలా చేసుకుని తాగితే జలుబు, దగ్గు తగ్గుతాయట!

-నార్మల్​ చికెన్​ సూప్​ని మించిన టేస్ట్ -ఇలా చేసుకుని తాగితే క్షణాల్లో చలి పరార్​

How to Make Chicken Mulligatawny Soup:తెలుగు రాష్ట్రాల్లో ఉష్ణోగ్రతలు రోజురోజుకీ పడిపోతున్నాయి. దీంతో చాలా మంది ఈ చలి నుంచి ఉపశమనం పొందేందుకు వేడి వేడి సూప్స్​ తాగాలని ఆరాటపడుతుంటారు. అనుకున్నదే తడవుగా క్షణాల్లో సూప్స్​ ప్రిపేర్​ చేసుకుని ఎంజాయ్​ చేస్తుంటారు. కాగా, చాలా మంది చేసుకునే సూప్స్​లో టమాట, క్యారెట్​, జింజర్​ సూప్​లు కామన్​గా ఉంటాయి. అయితే వాటితో పాటు ఓసారి "చికెన్‌ ముల్లిగటావ్నీ సూప్‌" ప్రిపేర్​ చేసుకోండి. పేరు కొత్తగా ఉన్నా టేస్ట్​ మాత్రం అద్దిరిపోతుంది. చలి నుంచి ఉపశమనం మాత్రమే కాదు, దగ్గు, జలుబు వంటి సీజనల్ సమస్యలను కూడా తగ్గిస్తుంది. ఇంకెందుకాలస్యం రుచితో పాటు శక్తినిచ్చే "చికెన్‌ ముల్లిగటావ్నీ సూప్‌" ప్రిపరేషన్​ ఈ స్టోరీలో చూద్దాం..

కావలసిన పదార్థాలు:

• బటర్​ - 2 టేబుల్‌ స్పూన్లు
• నూనె - టేబుల్‌ స్పూన్
• ఉల్లిపాయ ముక్కలు - అర కప్పు
• క్యారెట్‌ ముక్కలు - అర కప్పు
• కొత్తిమీర తరుగు- అర కప్పు
• బిర్యానీ ఆకులు - 2
• మిరియాలు - చెంచా
• మిరియాలపొడి - అర చెంచా
• కరివేపాకు - 4 రెమ్మలు
• ఎముకలు లేని చికెన్‌ తొడ ముక్కలు- అర కిలో
• నీళ్లు - 2 లీటర్లు
• ఉప్పు - రుచికి తగినంత
• క్రీమ్‌ - 50 గ్రాములు
• చిప్స్‌ - టేబుల్‌స్పూన్‌(ఆప్షనల్​)

తయారీ విధానం:

• స్టవ్​ ఆన్​ చేసి ఒక మందపాటి పాత్ర పెట్టి చికెన్, మిరియాలు, ఉప్పు, నీళ్లు, బిర్యానీ ఆకులు, కరివేపాకు వేసి మీడియం ఫ్లేమ్​లో నీళ్లు సగానికి అయ్యే వరకు అంటే సుమారు 20 నుంచి 30 నిమిషాలు ఉడికించి స్టవ్​ ఆఫ్​ చేసి పక్కన పెట్టాలి.
• చల్లారిన తర్వాత వడ కట్టి.. చికెన్‌ ముక్కలు, నీళ్లను (చికెన్‌ స్టాక్‌) సెపరేట్​ చేయాలి.
• ఇప్పుడు ఉడికిన చికెన్‌ ముక్కలను సన్నగా కట్‌ చేసి పక్కన పెట్టాలి.
• స్టవ్​ ఆన్​ చేసి కడాయి పెట్టి వెన్న, నూనెలు వేసి వేడిచేయాలి.
• హీట్​ అయిన తర్వాత ఉల్లిపాయ, క్యారెట్‌ ముక్కలను వేసి ఫ్రై చేసుకోవాలి.
• అనంతరం అందులోకి ఉడికించి కట్​ చేసిన చికెన్, చికెన్‌ స్టాక్, ఉప్పు, మిరియాలపొడి, కొత్తిమీర తరుగు వేసి కలిపి మూతపెట్టాలి.
• సన్నటి సెగ మీద అరగంట సేపు ఉడికించాలి.
• సూప్​ చిక్కబడిన తర్వాత సర్వింగ్‌ బౌల్స్‌లోకి తీసి క్రీమ్, చిప్స్‌తో వేడివేడిగా ఆస్వాదిస్తే కలిగే ఫీలింగ్​ వేరే లెవల్​.
• నచ్చితే మీరూ ట్రై చేసి ఫ్యామిలీతో కలిసి ఎంజాయ్​ చేయండి.