Restaurant Style Butter Naan Recipe at Home : ఎక్కువ మంది రెస్టారెంట్స్, హోటల్స్కి వెళ్లినప్పుడు బటర్ నాన్ని ఆర్డర్ చేస్తుంటారు. ఇందులోకి సైడ్ డిష్గా ఏదైనా నాన్వెజ్ కర్రీని తీసుకుంటుంటారు. అలాకాకుండా ఇంట్లోనే బటర్ నాన్ చేసుకుందామంటే అది కాల్చడానికి తందూర్ కావాలి. అదంతా కాస్త రిస్క్తో కూడుకున్నదిగా భావిస్తుంటారు చాలా మంది. కానీ, మీకు తెలుసా? ఇంట్లోనే దోశ పెనంపై రెస్టారెంట్ స్టైల్లో "బటర్ నాన్ని" ఈజీగా ప్రిపేర్ చేసుకోవచ్చు. పైగా చాలా సాఫ్ట్గా, రుచికరంగానూ ఉంటాయి. అదెలాగో మీరే చూసేయండి.
కావాల్సిన పదార్థాలు :
- ఒకటిన్నర కప్పులు - మైదా
- అర చెంచా - బేకింగ్ సోడా
- పావు కప్పు - పెరుగు
- అర చెంచా - ఉప్పు
- అర చెంచా - చక్కెర
- కొద్దిగా - నూనె
- తగినంత - బటర్
తయారీ విధానం :
- ముందుగా ఒక మిక్సింగ్ తీసుకొని అందులో మైదా, బేకింగ్ సోడా, పెరుగు, ఉప్పు, చక్కెర వేసుకొని ఇంగ్రీడియంట్స్ అన్నీ కలిసేలా చక్కగా కలుపుకోవాలి.
- ఆ తర్వాత కొద్దిగా వాటర్ యాడ్ చేసుకొని మరీ చపాతీ పిండిలా గట్టిగా కాకుండా కాస్త జిగురు, జిగురుగా ఉండేలా పిండిని తడుపుకోవాలి.
- ఆవిధంగా పిండిని ప్రిపేర్ చేసుకున్నాక కొద్దిగా నూనె వేసి 4 నుంచి 5 నిమిషాల పాటు మరోసారి బాగా వత్తుకోవాలి. పిండిని ఎంత మంచిగా వత్తుకుంటే నాన్స్ అంత సాఫ్ట్గా వస్తాయని గుర్తుంచుకోవాలి. ఆ తర్వాత వత్తుకున్న పిండిని చిన్న చిన్న ఉండలుగా చేసుకొని పక్కన పెట్టుకోవాలి.
- ఇప్పుడు ఒక పొడవాటి ప్లేట్ తీసుకొని దానిపై కాస్త పొడి పిండిని చల్లుకోవాలి. తర్వాత పిండి ఉండలను ఆ ప్లేట్లో ఉంచి చేతితో కొద్దిగా నూనె రాసి డ్రై అయిపోకుండా ఒక తడిగుడ్డ కప్పి అరగంటపాటు అలా వదిలేయాలి. 30 నిమిషాలయ్యాక క్లాత్ తీసి చూస్తే పిండి ఉండలు మంచిగా పొంగినట్లు కనిపిస్తాయి.
- అనంతరం స్టౌపై దోశ పెనం పెట్టుకొని హీట్ చేసుకోవాలి. ఆ తర్వాత చపాతీ పీటపై కొంచెం పొడి పిండి వేసుకొని ఒక పిండి ఉండను ఉంచి చేతితో వత్తుకుంటూ కాస్త స్ప్రెడ్ చేసుకోవాలి.
- ఆపై దాన్ని చేతిలోకి తీసుకొని ఒక చేతిలో నుంచి మరో చేతిలోకి ఛేంజ్ చేసుకుంటూ, తడుతూ ఉంటే నాన్ చక్కగా సాగుతుంది. అప్పుడు పర్ఫెక్ట్ నాన్ షేప్ కోసం ఒక ఎడ్జ్ పట్టుకొని చేతితో కొంచెం స్ట్రెచ్ చేసుకుంటే సరిపోతుంది.
- ఒకవేళ మీకు ఇలా చేసుకోవడం రాకపోతే అప్పడాల కర్రతో రోల్ చేసుకోవచ్చు. కాకపోతే నాన్ షేప్ రాకపోవచ్చు.
- ఆవిధంగా నాన్ని చేసుకున్నాక దాన్ని ఒకవైపు వాటర్తో తడిచేసుకొని జాగ్రత్తగా హీటెక్కిన దోశ పెనంపై వేసుకోవాలి. ఆపై లో ఫ్లేమ్ మీద 2 నిమిషాలు నాన్ని కాలనివ్వాలి. అప్పుడు వన్సైడ్ నాన్ చక్కగా కాలుతుంది.
- అలా కాల్చుకున్నాక చేతితో పెనం హ్యాండిల్ పట్టుకొని పెనాన్ని మరో సైడ్కి తిప్పి పట్టుకొని హై ఫ్లేమ్ మీద నాన్ని రెండో వైపు మంచిగా కాల్చుకోవాలి.
- ఆ తర్వాత పాన్ వైపు నాన్ గోల్డెన్ కలర్లోకి కాలిందనుకున్నాక దాన్ని ఒక ప్లేట్లోకి తీసుకొని వేడి మీద ఉన్నప్పుడే నాన్ మొత్తం మెల్టెడ్ బటర్ అప్లై చేసుకోవాలి. అంతే, ఎంతో టేస్టీగా ఉండే "రెస్టారెంట్ స్టైల్ బటర్ నాన్" రెడీ!
ఇవీ చదవండి :
చుట్టాలొస్తే "కొబ్బరన్నం కోడికూర" ఇలా చేసి పెట్టండి - బిర్యానీని మించిన టేస్ట్!
ఏ కెఫెకి తీసిపోని చికెన్ కట్లెట్- ఇంట్లోనే ఈజీగా చేసుకోండిలా! నెల రోజులు నిల్వ ఉంటుందట!!
