Andhra Style Country Chicken Fry in Telugu:నాటు కోడి.. ఈ పేరుకు ఉన్న క్రేజ్ వేరే లెవల్. దీనితో కూర వండుకుని తింటే ఆ రుచే వేరు. వేడి వేడి గారెలను నాటుకోడి పులుసులో అద్దుకుని తింటే స్వర్గం దిగిరావాల్సిందే! అలా ఉంటుంది దీని టేస్ట్. అయితే నాటుకోడితో కేవలం పులుసు మాత్రమే కాదు.. అద్దిరిపోయే ఫ్రై కూడా చేసుకోవచ్చు. పైకి ముక్క క్రిస్పీగా, లోపల జ్యూసీగా చాలా బాగుంటుంది. మరి, అలాంటి నాటుకోడి ఫ్రైని ఆంధ్రా స్టైల్లో ఎలా ప్రిపేర్ చేసుకోవాలో.. ఈ స్టోరీలో చూద్దాం.
ఆంధ్రా నాటుకోడి ఫ్రైకి కావాల్సిన పదార్థాలు:
- నాటు కోడి ముక్కలు - అరకేజీ
- ఉప్పు - రుచికి సరిపడా
- కారం - రుచికి సరిపడా
- పసుపు- అర టీ స్పూన్
- అల్లం వెల్లుల్లి పేస్ట్ - 1 టీ స్పూన్
- నూనె - 5 టేబుల్ స్పూన్లు
- ధనియాలు - 1 టేబుల్ స్పూన్
- దాల్చిన చెక్క - 2 ఇంచ్లు
- లవంగాలు - 5
- యాలకులు -3
- జీలకర్ర- అర టీ స్పూన్
- ఎండు కొబ్బరి ముక్కలు - కొద్దిగా
- అల్లం - 2 ఇంచ్లు
- వెల్లుల్లి రెబ్బలు -12
- పచ్చిమిర్చి - 3
- ఉల్లిపాయ - 1 పెద్దది
- కరివేపాకు రెమ్మలు -2
- కొత్తిమీర తరుగు - కొద్దిగా
తయారీ విధానం:
- ముందుగా స్టవ్ ఆన్ చేసి పాన్ పెట్టి నాటుకోడి ముక్కలు, రుచికి సరిపడా ఉప్పు, పసుపు, 1 టీ స్పూన్ కారం, అల్లం వెల్లుల్లి పేస్ట్ వేసి బాగా కలుపుకోవాలి.
- అప్పుడు చికెన్లో వాటర్ వస్తుంది. ఆ వాటర్ మొత్తం ఇంకిపోయేంత వరకు ముక్కలను మధ్య మధ్యలో కలుపుతూ వేయించుకోవాలి. నీరు ఇంకిపోయిన తర్వాత స్టవ్ ఆఫ్ చేసి పక్కకు పెట్టుకోవాలి.
- ఇప్పుడు స్టవ్ ఆన్ చేసి ఐరన్ కడాయి పెట్టి నూనె వేసుకోవాలి. ఆయిల్ హీటెక్కిన తర్వాత ఉడికించిన చికెన్ ముక్కలు వేసి వేయించుకోవాలి.
- చికెన్ ముక్కలు మంచి కలర్లోకి వచ్చే వరకు మంటను మీడియం ఫ్లేమ్లో పెట్టి మధ్య మధ్యలో కలుపుతూ ముక్క రంగు మారే వరకు వేయించుకోవాలి.
- ఈ లోపు మరో స్టవ్ మీద పాన్ పెట్టి ధనియాలు, దాల్చిన చెక్క, లవంగాలు, యాలకులు, జీలకర్ర, ఎండు కొబ్బరి ముక్కలు వేసి మంచి వాసన వచ్చేవరకు దోరగా వేయించుకోవాలి.
- ఇవి చల్లారిన తర్వాత మిక్సీజార్లోకి వేసి గ్రైండ్ చేసుకుని పక్కకు పెట్టుకోవాలి. ఇప్పుడు అదే మిక్సీజార్లో అల్లం, వెల్లుల్లి రెబ్బలు, పచ్చిమిర్చి వేసి కచ్చాపచ్చాగా గ్రైండ్ చేసుకోవాలి.
- ముక్కలు ఎరుపు రంగులోకి మారిన తర్వాత మిక్సీ పట్టుకున్న పచ్చిమిర్చి మిశ్రమం వేసుకుని మంటను లో-ఫ్లేమ్లో పెట్టి పచ్చివాసన పోయేవరకు మగ్గించుకోవాలి.
- ఆ తర్వాత ఉల్లిపాయ ముక్కలు వేసి అవి ఫ్రై అయ్యేంతవరకు వేయించుకోవాలి. అయితే మామూలు చికెన్ కన్నా నాటు కోడి ఉడకటానికి ఎక్కువ టైమ్ పడుతుంది కాబట్టి ఉల్లిపాయ ముక్కలను మధ్యలో వేసుకోవాలి. ముందే వేసుకుంటే నాటు కోడి మగ్గేలోపు ఉల్లిపాయ ముక్కలు మాడిపోతాయి. ఇంకో విషయం ఏంటంటే నాటుకోడి కుకింగ్కి ఎక్కువ టైమ్ పట్టిద్ది కాబట్టి కొంచెం ఓపికతో మధ్యమధ్యలో కలుపుతూ ఫ్రై చేసుకోవాలి.
- ఆ తర్వాత కరివేపాకు రెమ్మలు, రుచికి సరిపడా కారం వేసుకుని ముక్కలకు కారం పట్టేలా కలుపుకోవాలి.
- అనంతరం ముందే గ్రైండ్ చేసుకున్న మసాలా వేసి ముక్కలకు బాగా పట్టేలా కలిపి స్టవ్ ఆఫ్ చేసుకోవాలి. ఎక్కువ సేపు ఉంచితే మసాలాలు మాడి టేస్ట్ మారిపోతుంది.
- ఆ తర్వాత కొత్తిమీర వేసుకుని సర్వ్ చేసుకుంటే అద్దిరిపోయే రుచితే ఆంధ్రా స్టైల్ నాటుకోడి వేపుడు రెడీ! మరి మీరు ఓ సారి ట్రై చేస్తారా?