పార్కులకు తరచూ వెళ్తున్నారా? ఈ విషయం మీరు తప్పక తెలుసుకోవాలి!

-ప్రకృతి మధ్యలో గడపడం వల్ల అనేక లాభాలు! -రిఫ్రెష్​మెంట్​తో పాటు అనేక వ్యాధులు దూరం!

Benefits of Parks and Green Spaces:మీరు పార్కులకు వెళ్తున్నారా? ఈ విషయం మీకు తెలుసా? సుమారు గంట పాటు పార్కులో సమయాన్ని గడపడం లేదా విశ్రాంతి తీసుకోవడం వల్ల అనేక ప్రయోజనాలు ఉన్నాయని నిపుణులు అంటున్నారు. కేవలం మైండ్ రిఫ్రెష్ కావడమే కాకుండా శారీరక, మానసిక ప్రయోజనాలు ఉన్నాయని వివరిస్తున్నారు. అవేంటో ఇప్పుడు తెలుసుకుందాం.

ఒత్తిడిని తగ్గిస్తుంది:పార్కుల్లో తిరగడం వల్ల ఒత్తిడి తగ్గి శరీరంతో పాటు మనసు ప్రశాంతంగా ఉంటుందని హార్వర్డ్ స్కూల్ ఆఫ్ పబ్లిక్ హెల్త్ జర్నల్​లో వెల్లడైంది. ఒత్తిడిని పెంచె కార్టిసాల్ హర్మోన్ స్థాయులను పెరగకుండా చేస్తుందని హార్వర్డ్ ప్రొఫెసర్ Heather Eliassen చెబుతున్నారు.(రిపోర్ట్ కోసం ఇక్కడ క్లిక్ చేయండి) స్వచ్ఛమైన గాలి, సహజ కాంతి, పార్కుల్లోని చెట్లు, మొక్కలు ఆందోళనను తగ్గించి మనసును ప్రశాంతంగా మారుస్తుందని వివరించారు.

ఏకాగ్రతను పెంచుతుంది:పచ్చటి చెట్ల మధ్య సమయాన్ని గడపడం వల్ల జ్ఞాపకశక్తి పెరిగి లక్ష్యంపైనే దృష్టి కేంద్రీకృతమవుతుందని అనేక పరిశోధనలు చెబుతున్నాయి. ఆందోళనను తొలగించి మానసిక ప్రశాంతతను ఇచ్చి ఏకాగ్రతను పెంచేలా చేస్తుందని తెలిపారు. అందుకే ఏదైనా ముఖ్యమైన పనులు ఉన్నప్పుడు కొద్ది సేపు పార్కుల్లో తిరగాలని నిపుణులు సూచిస్తున్నారు. ఇలా చేస్తే మెదడు షార్ప్​గా పనిచేస్తూ అప్రమత్తంగా ఉంటామని వివరించారు.

రోగనిరోధక శక్తిని పెంచుతుంది:పార్కుల్లో సమయాన్ని గడపడం వల్ల రోగ నిరోధక శక్తి పెరుగుతుందని నిపుణులు చెబుతున్నారు. ముఖ్యంగా శరీరాన్ని కాపాడే తెల్ల రక్త కణాలు పెరుగుతాయని వివరించారు. ఇంకా ఎండకు తిరగడం వల్ల శరీరానికి విటమిన్ డీ అంది రక్షణగా నిలుస్తుందని తెలిపారు.

ఫిజికల్ ఫిట్​నెస్​ పెరుగుతుంది:మనం రోజు చేసే వాకింగ్, జాగింగ్ లాంటి వ్యాయామాలను పార్కుల్లో చేయడం వల్ల అనేక లాభాలు ఉన్నాయని నిపుణులు అంటున్నారు. ఇలా చేయడం వల్ల బ్యాలెన్సింగ్​తో పాటు కండరాలు బలంగా మారతాయని వివరించారు. ఇంకా దీర్ఘకాలిక వ్యాధులైన గుండె, మధుమేహం వచ్చే అవకాశాలు తగ్గుతాయని పేర్కొన్నారు.

సుఖమైన, హాయి నిద్రను ఇస్తుంది:పార్కుల్లో సమయాన్ని గడపడం వల్ల రాత్రి హాయిగా నిద్రపోతారని నిపుణులు చెబుతున్నారు. ముఖ్యంగా ఉదయం, సాయంత్రం సూర్యుడి కిరణాలు పడేలా ఉండడం వల్ల అనేక ప్రయోజనాలు ఉన్నాయని తెలిపారు. ఇంకా సూర్య కిరణాలు పడడం వల్ల మెలాటొనిన్ అనే హార్మోన్ ఉత్పత్తి పెరిగి రాత్రి పూట హాయిగా నిద్ర పడుతుందని వివరించారు.

ఒంటరితనాన్ని పొగొడుతుంది:పార్కుల్లో తిరగడం వల్ల కొత్త పరిచయాలు ఏర్పడి సోషల్ కనెక్షన్లు పెరుగుతాయని నిపుణులు చెబుతున్నారు. మానసిక ఆరోగ్యానికి ఇవి ఎంతగానో ఉపయోగపడతాయని వివరించారు. ఇది ముఖ్యంగా ఒంటరితనంతో బాధపడే వారిని బయటకు తీసుకువస్తుందని అంటున్నారు.

రక్తపోటును అదుపులో ఉంచుతుంది:ప్రకృతి మధ్యలో నడవడం వల్ల రక్త పోటు అదుపులో ఉంటుందని నిపుణులు అంటున్నారు. ఇలా చేయడం వల్ల కేవలం రక్తపోటు అదుపులో ఉండడమే కాకుండా హైపర్ టెన్షన్, గుండె సమస్యలు రాకుండా కాపాడుతుందని వివరించారు.

క్రియెటివిటీని పెంచుతుంది:మీరు ఒత్తిడికి గురవుతున్నారా? పనులు ఎలా చేయాలో అర్థం కాక ఇబ్బంది పడుతున్నారా? ఇలాంటి సమయంలోనే కాస్త బ్రేక్ తీసుకుని పార్కులోకి వెళ్లి విశ్రాంతి తీసుకుంటే సరిపోతుందని నిపుణులు సూచిస్తున్నారు. ఇలా చేయడం వల్ల మైండ్ రిఫ్రెష్, రీఛార్జ్ అయ్యి మరింత క్రియెటివిటీతో పనిచేస్తారని వివరించారు.

పాజిటివిటీని పెంచుతుంది:చుట్టూ పచ్చటి చెట్ల మధ్య ప్రకృతిని ఆస్వాదిస్తూ సమయాన్ని గడపడం వల్ల మనలో పాజిటివిటీ పెరుగుతుందని నిపుణులు వెల్లడించారు. ఇది మనకు సంతోషం, సంతృప్తిని ఇస్తుందని.. ఫలితంగా మానసిక ఆరోగ్యంతో పాటు భావోద్వేగాలు అదుపులో ఉంటాయని వివరించారు.

దీర్ఘకాలిక వ్యాధులను తగ్గిస్తుంది:ఎక్కువగా పార్కుల్లో, పచ్చటి ప్రదేశాల్లో సమయాన్ని గడిపే వారిలో దీర్ఘకాలిక వ్యాధులు వచ్చే అవకాశం తక్కువని నిపుణులు చెబుతున్నారు. ఓ గంట పార్కుల్లో నార్మల్ ఎక్సర్​సైజ్ చేసే వారిలో మధుమేహం, గుండె సమస్యలు రావని వివరించారు. ఫలితంగా ఆరోగ్యం మెరుగుపడి మరింత ఎక్కువ కాలం జీవిస్తారని అంటున్నారు.

NOTE :ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.