ఇవి ఒంటరి తనానికి సంకేతాలు - ముదిరితే భార్యాభర్తల బంధానికి బీటలే!

Loneliness in a Relationship: సింగిల్ స్టేటస్ ఉన్నప్పుడు ఒంటరి తనం ఫీలవడం వేరు.. కానీ దాంపత్యంలోకి అడుగు పెట్టిన తర్వాత, భాగస్వామితో కలిసి ఉంటున్నా కూడా ఒంటరి తనం అనుభవిస్తే మాత్రం.. అది భార్యాభర్తల బంధానికే మంచిది కాదు. కాబట్టి.. ఒంటరి భావనను ముందుగానే గుర్తించి, అందులోంచి బయటపడాలని సూచిస్తున్నారు నిపుణులు!

Signs of Loneliness in a Relationship in Telugu :పెళ్లికి ముందు భార్యాభర్తల జీవితాలు భిన్నం. ఎవరి ఆలోచనలు వారివి.. ఎవరి ఇష్టాఇష్టాలు వారివి. కానీ.. వివాహానంతరం ఇద్దరూ కలిసి ఆలోచించాలి. ఇష్టాఇష్టాల్లో ఏకాభిప్రాయం రావాలి. ఉమ్మడి లక్ష్యాలు ఉండాలి. ఒకరికోసం ఒకరు అనుకున్నప్పుడు మాత్రమే ఇది సాధ్యమవుతుంది. లేదంటే మాత్రం.. ఆ బంధం బీటలు వారే దిశగా ప్రయాణిస్తుంది. దీనికి ముందు పార్ట్​నర్స్​ బిహేవియర్​లో మార్పులు వస్తాయి. ఫీలింగ్స్​లో తేడాలు కనిపిస్తాయి. రిలేషన్​లో ఉన్నా కూడా ఒంటరిగా ఉన్నామనే భావనలో ఉంటారు. ఈ పరిస్థితి ముదరకముందే.. దాన్నుంచి బయటపడాలని నిపుణులు సూచిస్తున్నారు. దానికోసం ఏం చేయాలో ఇప్పుడు చూద్దాం.

ఒంటరితనం సంకేతాలు:

• ప్రస్తుత రోజుల్లో భార్యభర్తలిద్దరూ ఉద్యోగాలు చేస్తున్నారు. వేర్వేరు సమయాల్లో ఉదయం ఆఫీసుకు వెళ్తుంటారు. ఇంటికి సైతం అలాగే వస్తుంటారు. ఫలితంగా కలిసి ఉండే సమయం చాలా తక్కువగా ఉంటోంది. ఈ పరిస్థితి దీర్ఘకాలం కొనసాగినప్పుడు ఒంటరి ఫీలింగ్​ ఏర్పడుతుంది.
• మీరు ఇంట్లో ఉండడం కంటే.. స్నేహితులతో బయటకు వెళ్లడం వంటివే ఎక్కువగా చేస్తున్నారంటే మీరు ఒంటరితనంతో బాధపడుతున్నారని అర్థం.
• మీరు భాగస్వామికి దగ్గరగా ఉండటానికి ప్రయత్నిస్తున్నా.. వారి నుంచి స్పందన లేదని ఫీలైతే కూడా ఒంటరితనం భావాలు పెరుగుతాయి.
• ఇక ప్రస్తుత కాలంలో ఫోన్ల వాడకం విపరీతంగా పెరిగిపోయింది. దీంతో.. కొద్దిపాటి ఫ్రీ టైమ్​కూడా ఫోన్లు మింగేస్తున్నాయి. ఇది కూడా ఒంటరితనం పెంచుతుంది.
• ఉద్యోగ ఒత్తిడి కావొచ్చు.. మరొకటి కావొచ్చు.. అవి ఇంటికి మోసుకొస్తే ఇబ్బందే. వాటివల్ల భాగస్వామిపై అరవొచ్చు.. లేదంటే సరిగా మాట్లాడకపోవచ్చు. ఈ పరిస్థితి తీవ్రమైతే ఎదుటివారిలో ఒంటరి ఫీలింగ్ పెరుగుతుంది.
• ఈ కండిషన్ ముదిరినప్పుడు బాధితులు దేనిపైనా శ్రద్ధపెట్టరు. నిత్యం ముభావంగా ఉంటూ కుమిలిపోతారు. వ్యక్తిగత శుభ్రత కూడా పాటించరు. కొందరు కనీసం అద్దంలో తమను తాము చూసుకోవడం కూడా మానేస్తారు.

రిలేషన్​లో ఒంటరితనాన్ని ఎదుర్కోవటానికి మార్గాలు:

• మీ పార్ట్​నర్​తో మాట కలపడం మాత్రమే దీనికి మొదటి మందు. మీ మనసులో ఎలాంటి ఫీలింగ్స్ ఉన్నాయో.. చెప్తేనే కదా వారికి తెలిసేది? కాబట్టి.. మీ ఆలోచనలను వారితో పంచుకోండి.
• ఏ విధంగానూ నిందించట్లేదని.. విమర్శించట్లేదని వారికి చెప్పండి. మాట్లాడకపోవడం వల్ల ఒంటరితనాన్ని ఫీల్​ అవుతున్నట్టు ఓపెన్​గా చెప్పండి.
• మనసు విప్పి మాట్లాడడం అనేది అత్యంత ముఖ్యమైన విషయం. కాబట్టి. మీ భాగస్వామితో అన్ని విషయాలూ షేర్ చేసుకొని భారం దించుకోండి. అంతేకాదు.. మీ సమస్యకు వారు ఏదైనా మంచి సొల్యూషన్ కూడా ఇవ్వొచ్చు.
• మీరు నిరాశగా, ఒంటరిగా ఉన్నప్పుడు.. వ్యాయామం, ధ్యానం, వంట చేయడం వంటి మీకు ఇష్టాన్ని కలిగించే పనులు చేయండి. తద్వారా ఉపశమనం కలుగుతుంది.
• మీ భాగస్వామి పనులు చేస్తుంటే.. మీరు కూడా కలిసిపోయి సహాయం చేయండి. దీని వల్ల మనసు ఒంటరితనం నుంచి పనిమీదకు మళ్లుతుంది. ఇద్దరి మధ్యా మాటా ముచ్చట పెరుగుతుంది.
• మీరిద్దరూ ఒకే దగ్గర ఉన్నప్పుడు గతాన్ని గుర్తు చేసుకోండి. అయితే.. ఎట్టి పరిస్థితుల్లోనూ నెగెటివ్ అంశాలకు చోటు ఇవ్వొద్దు. గతంలో మీరు ఆనందంగా ఉన్న సంఘటనలను మాత్రమే గుర్తుచేసుకోండి. వాటి గురించి మీ భాగస్వామితో మాట్లాడండి. మళ్లీ అలాంటి సంతోషాలను నింపుకునే ప్రయత్నం చేయండి.
• ఒంటరితనాన్ని అధిగమించడానికి మరొక మార్గం.. ఫ్యామిలీతో టైం స్పెండ్​ చేయడం. టైమ్ కుదుర్చుకొని ఖచ్చితంగా ఐదారు నెలలకోసారైనా ఫ్యామిలీతో ట్రిప్స్​కు వెళ్లండి. తరచూ పార్టీలు, ఫంక్షన్​లకు హాజరవ్వండి.
• ఆఫీస్ నుంచి వచ్చిన తర్వాత మీ డే ఎలా గడిచిందో వారికి షేర్ చేయండి. వారి గురించి కూడా అడిగి తెలుసుకోండి.
• ఇన్ని చేసినా ఉపయోగం లేకపోతే.. చివరిగా థెరపిస్టును కలవండి. తప్పకుండా మార్పు కనిపిస్తుంది.