Fingernails May Contain 32 Types Bacteria : కొంతమందికి నెయిల్స్ పెంచడం అంటే ఎంతో ఇష్టం. ముఖ్యంగా అమ్మాయిలు గోళ్లు పెంచి, ఇష్టమైన నెయిల్ పాలిష్ వేసుకుని మురిసిపోతుంటారు. కానీ.. మీ అందమైన గోళ్ల కింద లక్షలాది సూక్ష్మజీవులు ఉంటాయనే విషయం మీకు తెలుసా? ఇటీవల అమెరికాలో పరిశోధకులు పొడవాటి గోళ్లు(Nails) కలిగిన వారి నుంచి శాంపిల్స్ సేకరించి రిసేర్చ్ జరపగా అందులో ఆశ్చర్యకరమైన విషయాలు వెలుగులోకి వచ్చాయి. మనుషుల్లో అన్ని రకాల రోగాలు కలిగించే సూక్ష్మజీవుల్లో సగం.. గోళ్ల కిందనే ఉన్నట్టు ఈ పరిశోధనలో తేలింది. అందుకు సంబంధించిన పూర్తి వివరాలు ఈ స్టోరీలో తెలుసుకుందాం.
అమెరికన్ యూనివర్సిటీ ఆఫ్ వాషింగ్టన్ డీసీకి చెందిన శాస్త్రవేత్తలు 2021లో గోళ్ల శాంపిల్స్ తీసుకుని ఓ పరిశోధన జరపగా ఈ షాకింగ్ విషయాలు వెలుగులోకి వచ్చాయి. అమెరికన్ పీడియాట్రిక్ మెడికల్ అసోసియేషన్ జర్నల్‌లో ఈ అధ్యయనం ప్రచురించారు. దీని ప్రకారం.. నెయిల్స్ కింద 32 రకాల బ్యాక్టీరియా, 28 రకాల ఫంగస్ ఉన్నట్లు పరిశోధకులు గుర్తించారు. వీటిలో 50శాతం బ్యాక్టీరియా ఉండగా, 6.3 శాతం ఫంగస్ ఉంది. ఇక మిగతా 43.7శాతం బ్యాక్టీరియా, ఫంగస్‌ల మిశ్రమ సమూహం ఉంది.
ఇంకా.. పొడవాటి గోళ్లలో స్టాఫ్ ఆరియస్ అనే బ్యాక్టీరియా కూడా ఉందని పరిశోధకులు అంటున్నారు. ఇది స్కిన్ ఇన్ఫెక్షన్‌కు కారణమయ్యే బ్యాక్టీరియా అని, యాంటీబయాటిక్స్ కూడా దీనిపై పెద్దగా ప్రబావం చూపవని చెబుతున్నారు. ఈ బ్యాక్టీరియా కేవలం నెయిల్ కిందనే ఉంటుందని తెలిపారు. ఈ బ్యాక్టీరియా ఉన్న వస్తువులను తాకడం ద్వారా అవి మనుషుల గోళ్ల కిందకు చేరుకుంటాయని వెల్లడించారు. కాబట్టి నెయిల్స్ను ఎప్పటికప్పుడు శుభ్రంగా ఉంచుకోవడం మంచిదని సూచిస్తున్నారు.