Vijay The Goat Movie Telugu Review:త‌మిళ నటుడు విజయ్ లీడ్ రోల్లో తాజాగా విడుదలైన 'ది గ్రేటెస్ట్ ఆఫ్ ఆల్‌టైమ్'. వెంకట్ ప్రభు డైరెక్ట్ చేసిన ఈ చిత్రం ప్రస్తుతం థియేటర్లలో సందడి చేస్తోంది. ఇంతకీ ఈ చిత్రం ఎలా ఉందంటే?
స్టోరీ ఏంటంటే:స్పెష‌ల్ యాంటీ టెర్ర‌రిస్ట్ స్వ్కాడ్ టీమ్లో ఏజెంట్‌గా ప‌ని చేస్తుంటాడు గాంధీ (విజయ్). అయితే, తన ఉద్యోగం గురించి భార్య అను (స్నేహ) దగ్గర రహస్యంగా ఉంచుతాడు. అంతలోనే ఓ మిష‌న్ కోసం గాంధీ థాయ్‌లాండ్‌కు వెళ్లాల్సి వస్తుంది. అయితే అక్క‌డికి వెళ్లాక ఆ మిష‌న్ వల్ల గాంధీ ఫ్యామిలీకి ముప్పు ఎదుర‌వుతుంది. ఈ క్ర‌మంలోనే తన ఐదేళ్ల కొడుకు జీవ‌న్‌ను అతడు కోల్పోతాడు. ఆ ఘ‌ట‌న వల్ల గాంధీ తీవ్రంగా కుంగిపోతాడు.
తన వ‌ల్లే కొడుకును కోల్పోవాల్సి వ‌చ్చింద‌న్న బాధ‌తో తన ఉద్యోగాన్ని వ‌దిలేస్తాడు. క్రమంగా భార్య కూడా అత‌డ్ని దూరం పెడుతుంది. అలా ఈ ఇద్దరి మధ్య దూరం ఏర్పడి 15 ఏళ్లు గ‌డిచిపోతాయి. అయితే ఓసారి ఓ ప‌ని విష‌య‌మై మాస్కోకి వెళ్లిన గాంధీకి అనూహ్యంగా తన కొడుకు జీవ‌న్ (విజయ్) క‌నిపిస్తాడు. ఓ రౌడీ గ్యాంగ్ ఉచ్చులో చిక్కుకొని ఉన్న తన బిడ్డ‌ను కాపాడి భార‌త్‌కు తీసుకొస్తాడు. కొడుకు రాక‌తో గాంధీ కుటుంబం మ‌ళ్లీ క‌లుస్తుంది. ఇక అంతా బాగుంద‌నుకున్న టైమ్‌లో గాంధీ స్క్వాడ్ టీమ్ బాస్ న‌జీర్ (జ‌య‌రామ్‌)ను ఎవ‌రో చంపేస్తారు. ఆ త‌ర్వాత ఆ టీమ్‌లోని ఒక్కొక్కరూ వ‌రుస‌గా హ‌త్య‌కు గుర‌వుతుంటారు. మ‌రి ఈ హ‌త్య‌ల‌కు కార‌ణ‌మెవ‌రు? జీవ‌న్‌కు ఈ హ‌త్య‌ల‌కూ ఉన్న లింకేంటి? త‌ను తండ్రిని చంపాల‌ని ఎందుకు ప‌గ‌బ‌డ‌తాడు? జీవ‌న్‌ను పెంచి పెద్ద చేసిన మేన‌న్ (మోహ‌న్‌)కు గాంధీకీ ఉన్న విరోధం ఏంటి? అన్న‌ది మిగ‌తా క‌థ.
ఎలా సాగిందంటే: ఓ ఏజెంట్ దేశ ర‌క్ష‌ణ కోసం ఎంత‌కైనా తెగించే క‌థ ఇది. అనుకోని ప‌రిస్థితుల్లో అతడు ఓ మిష‌న్‌లో తన కొడుకును కోల్పోవ‌ల‌సి వస్తుంది. అయితే 15ఏళ్ల త‌ర్వాత ఆ కొడుకే తన పాలిట య‌ముడిలా మారి, దేశానికి పెద్ద స‌మ‌స్య‌లా మారతాడు. ఈ క్ర‌మంలో అత‌డి ఆట క‌ట్టించేందుకు ఆ తండ్రి ఏం చేశాడ‌న్న‌దే ఈ సినిమా క‌థాంశం.
అయితే సినిమా కథలో పెద్ద‌గా కొత్త‌ద‌న‌మేమీ లేదు. కానీ, స్క్రీన్ప్లే స్పెష‌లిస్ట్ వెంకట్ ప్రభు తెర‌కెక్కించిన సినిమా కావ‌డం వల్ల దీంట్లో ఓ మ్యాజిక్ ఉంటుంద‌న్న భ‌రోసా ప్రేక్ష‌కుల్లో క‌నిపిస్తుంది. అయితే ఏజెంట్ సినిమాల్లో క‌నిపించే ట్విస్ట్‌లు, మ‌లుపులు, మెరుపులు ఏ ఒక్క‌టి ఈ సినిమాలో కనిపించలేదు. క‌నీసం హీరో చేసే ఆప‌రేష‌న్స్‌లోనూ థ్రిల్ లేదు. పైగా విరామం వ‌ర‌కు స్టోరీ లాగింగ్గా ఉంటుంది. హీరోకి తన త‌న‌యుడు కనిపించినప్పుటడి నుంచే క‌థ వేగం పుంజుకుంటుంది. ఈ క్ర‌మంలో కొడుకుని కాపాడు కోవ‌డం కోసం మాస్కోలోని విల‌న్ గ్యాంగ్‌తో గాంధీ చేసే ఛేజింగ్ యాక్ష‌న్ సీక్వెన్స్ అల‌రిస్తుంది.