RRR Documentary Release : గ్లోబల్ స్టార్ రామ్‌చరణ్‌, మ్యాన్ ఆఫ్ మాసెస్ జూనియర్ ఎన్టీఆర్ లీడ్ రోల్స్లో తెరకెక్కిన బ్లాక్బస్టర్ మూవీ 'ఆర్ఆర్ఆర్'. పీరియాడిక్ యాక్షన్ బ్యాక్డ్రాప్తో తెరకెక్కిన ఈ చిత్రం బాక్సాఫీస్ వద్ద సూపర్ సక్సెస్ సాధించి దూసుకెళ్లింది. అయితే ఇప్పుడా చిత్రాన్నికి సంబంధించిన బిహైండ్ ద సీన్స్ అలాగే మూవీకి సంబంధించిన ఆసక్తికరమైన విషయాలను డాక్యుమెంటరీ రూపంలో చూపించేందుకు మేకర్స్ సన్నాహాలు చేశారు. 'ఆర్ఆర్ఆర్- బిహైండ్ అండ్‌ బియాండ్‌' అనే పేరుతో ఆ డాక్యుమెంటరీని సిద్ధం చేసింది. అందులో షూటింగ్‌ మొదలుపెట్టినప్పటి నుంచి 'ఆస్కార్‌' అందుకునే వరకూ జరిగిన ఆసక్తికర విషయాలను ప్రేక్షకులకు పరిచయం చేయనున్నారు మేకర్స్.
అయితే ఇప్పుడు ఆ డాక్యుమెంటరీ థియేటర్లలో విడుదల కానుంది. డిసెంబరు 20వ తేదీ నుంచి ఎంపిక చేసిన కొన్ని మల్టీప్లెక్స్‌ స్క్రీన్‌లలో దాన్ని రిలీజ్ చేయనున్నారట. ఈ క్రమంంలో ప్రముఖ టికెట్ బుకింగ్ యాప్ 'బుక్‌ మై షో'లో ఈ సినిమాకు సంబంధించిన టికెట్లను అందుబాటులో ఉంచారు. రూ.200 నుంచి రూ.300 వరకూ ఆ టికెట్ల ధర ఉంది. అయితే 1 గంట 38 నిమిషాల నిడివి గల ఈ డాక్యుమెంటరీలో మూవీ టీమ్ 'ఆర్ఆర్ఆర్' గురించి ఇప్పటివరకూ ప్రేక్షకులకు తెలియని పలు ఆసక్తికర విషయాలను పంచుకోనున్నారని తెలుస్తోంది. ఇటీవల విడుదల చేసిన ట్రైలర్‌కు కూడా నెట్టింట మంచి రెస్పాన్స్ దొరికింది.
ఇక 'ఆర్ఆర్ఆర్' సినిమా విషయానికి వస్తే, రామ్‌ చరణ్‌, జూనియర్ ఎన్టీఆర్ లీడ్ రోల్స్లో రూపొందిన ఈ సినిమా తెలుగులోనే కాకుండా రిలీజైన అన్ని భాషల్లోనూ సెన్సేషన్ క్రియేట్ చేసింది. ముఖ్యంగా ఇందులోని యాక్షన్ సీన్స్ ఆడియెన్స్ను తెగ ఆకట్టుకున్నాయి. అయితే వరల్డ్వైడ్గా ఈ చిత్రం సుమారు రూ.1200 కోట్లకు పైగా వసూళ్లు సాధించి రికార్డుకెక్కింది.