'కొల్లగొట్టినాదిరో'- హరి హర వీరమల్లు' రెండో సాంగ్ రిలీజ్

'హరి హర వీరమల్లు' రెండో పాట రిలీజ్- మీరు విన్నారా?

Hari Hara Veeramallu songs : పవర్​ స్టార్ పవన్ కల్యాణ్ లీడ్​లో తెరకెక్కుతున్న లేటెస్ట్ సినిమా 'హరి హర వీరమల్లు'. ఈ సినిమాను డైరెక్టర్లు క్రిష్‌, జ్యోతికృష్ణ పాన్‌ ఇండియా రేంజ్​కో తెరకెక్కిస్తున్నారు. ప్రస్తుతం చివరి దశ షూటింగ్ జరుపుకుంటున్న ఈ సినిమా మార్చి 28న విడుదల కానుంది. ఈ నేపథ్యంలో మేకర్స్ ఒక్కొక్క పాటను రిలీజ్ చేస్తున్నారు. గతనెల సినిమాలోంచి తొలి పాట విడుదల చేయగా, తాజాగా రెండో సాంగ్ రిలీజ్ చేశారు.

'కొల్లగొట్టినాదిరో' అంటూ సాగే ఈ పాటను గాయని మంగ్లీ, రాహుల్‌ సిప్లిగంజ్‌, రమ్యా బెహరా, యామిని ఘంటశాల ఆలపించారు. ఈ పాటకు చంద్రబోస్‌ లిరిక్ల్ అందించారు. కీరవాణి స్వరాలు సమకూర్చారు. ఈ పాటలో పవన్‌తో కలిసి అనసూయ, పూజిత పొన్నాడ డ్యాన్స్‌ చేశారు. ఇక ఈ పాట థియేటర్​లో చూస్తుంటే విజిల్స్ పక్కా అని ఇటీవల నటి అనసూయ సందర్భంగాలో చెప్పారు.

'హరిహర వీరమల్లు' సినిమా విషయానికి వస్తే, చారిత్రక అంశాలతో ముడిపడి ఉన్న ఈ పీరియాడిక్‌ యాక్షన్‌ డ్రామాలో పవన్‌ కల్యాణ్​ శక్తిమంతమైన యోధుడిగా కనువిందు చేయనున్నారు. రాబిన్ హుడ్ పాత్ర అని సినీ వర్గాల టాక్. హాలీవుడ్ స్టంట్ డైరెక్టర్ నిక్ పాల్ ఆధ్వర్యంలో భారీ యాక్షన్ సన్నివేశాలతో ఈ చిత్రాన్ని రూపొందిస్తున్నారు. త్వరలోనే సినిమా ప్రమోషన్స్​ కూడా ప్రారంభం అయ్యే ఛాన్స్ ఉంది.

కాగా, పవన్ సరసన యంగ్ బ్యూటీ నిధి అగర్వాల్‌ నటిస్తోంది. బాలీవుడ్ ప్రముఖ నటులు అనుపమ్‌ ఖేర్‌, బాబీ దేఓల్‌, నోరా ఫతేహి, విక్రమ్​జీత్‌, జిషుసేన్‌ గుప్త్​ తదితరులు కీలక పాత్రలు పోషిస్తున్నారు. ఆస్కార్ అవార్డ్​ గ్రహీత ఎం.ఎం.కీరవాణి ఈ చిత్రానికి సంగీతం అందిస్తున్నారు. మెగా సూర్య ప్రొడక్షన్స్‌ పతాకంపై ఏ.ఎం.రత్నం సమర్పణలో ఎ.దయాకర్‌ రావు నిర్మాతగా వ్యవహరిస్తున్నారు. ఇది రెండు పార్టులుగా విడుదల కానుంది. ఈ క్రమంలో తొలి భాగమైన 'హరిహర వీరమల్లు పార్ట్‌ 1: స్వార్డ్‌ వర్సెస్‌ స్పిరిట్‌' 2025 మార్చి 28న సినిమా వరల్డ్​వైడ్​ గ్రాండ్​గా రిలీజ్ కానుంది.