Kannappa Teaser Release :టాలీవుడ్ నటుడు మంచు విష్ణు టైటిల్ రోల్లో తెరకెక్కుతున్న లేటెస్ట్ మూవీ 'కన్నప్ప'. భారీ అంచనాల నడుమ రూపొందుతున్న ఈ మూవీ ప్రస్తుతం షూటింగ్ దశలో ఉంది. అయితే రోజుకో సర్ప్రైజ్ ఇస్తూ అభిమానులను అలరిస్తోంది ఈ మూవీ టీమ్. ఈ నేపథ్యంలో తాజాగా మరో ఆసక్తికరమైన అప్డేట్ వచ్చింది.
'కన్నప్ప' టీజర్ ను ప్రతిష్టాత్మక కేన్స్ ఫిల్మ ఫెస్టివల్లో లాంఛ్ చేయనున్నట్లు వెల్లడించారు మూవీ మేకర్స్. ఓ స్పెషల్ పోస్టర్ ద్వారా ఈ విషయాన్ని తెలియజేశారు. ఈ నెల 20న జరగనున్న ఈ ఈవెంట్లో సాయంత్రం 6 గంటలకు ఈ మూవీ టీజర్ను విడుదల చేస్తున్నట్లు అందులో రాసుంది.
ఇప్పటికే సినిమా షూటింగ్ కూడా ప్రారంభమైందని సెట్స్లోకి ప్రభాస్ అడుగు పెట్టారన్న సంగతి విష్ణు బయట పెట్టగానే ఈ వార్తలు సోషల్ మీడియాలో తెగ వైరల్ అయ్యాయి. అయితే కన్నప్పలో ప్రభాస్, అక్షయ్ కుమార్ వంటి ఇతరుల పాత్రల గురించి, కథ గురించీ మాత్రం ఇప్పటి వరకూ ఎలాంటి సమాచారం బయటపెట్టలేదు చిత్ర యూనిట్. మరోవైపు సినిమాలో అంతా పెద్ద పెద్ద స్టార్లే నటిస్తున్నందున కన్నప్ప చిత్రంపై భారీ అంచనాలే పెట్టుకున్నారు ప్రేక్షకులు. కాగా మే 20న విడుదల కానున్న టీజర్లో అయినా వీరి లుక్ లేదా పాత్రల పేర్లు లాంటివి రివీల్ అవుతాయోమో అని ఆశగా ఎదురుచూస్తున్నారు ప్రేక్షకులు.