బిగ్​ బాస్​ 8లో "డబుల్ ధమాకా" - ఇప్పటి వరకూ చూడని సరికొత్త ఎలిమెంట్​ చూపిస్తారట! - Bigg Boss Season 8 Updates

Bigg Boss Season 8: బిగ్‌బాస్‌ సీజన్​ 8 గురించి రోజుకో అప్‌డేట్‌ క్యూరియాసిటీని పెంచేస్తోంది. ఈ షోకు సంబంధించి ఏ వార్త బయటకు వచ్చినా క్షణాల్లో వైరల్​ అవుతోంది. తాజాగా ఓ భారీ న్యూస్​ చక్కర్లు కొడుతోంది. ఆ వివరాలు ఇలా ఉన్నాయి.

Bigg Boss Season 8 Telugu Latest Updates:అతి త్వరలో సీజన్‌ 8 ప్రారంభం కానుండటంతో.. తెలుగునాట బిగ్‌బాస్ మేనియా ఊపందుకుంటోంది. ఈ షోకి సంబంధించి రోజుకో వార్త నెట్టింట చక్కర్లు కొడుతోంది. ఇప్పటికే బిగ్​బాస్​ 8కి సంబంధించి టీజర్​, ప్రోమో రిలీజ్​ కాగా.. దానికి ఆడియన్స్​ నుంచి మంచి రెస్పాన్స్​ వచ్చింది. అయితే ఈ సీజన్​లో "డబుల్ ధమాకా" ఉండబోతున్నట్టు టాక్​ వినిపిస్తోంది. ఆ వివరాలు చూస్తే..

బుల్లితెరపై ఎంతో ఆదరణ పొందిన బిగ్‌బాస్​కు.. వరల్డ్‌ వైడ్‌గా మంచి ఫ్యాన్‌ ఫాలోయింగ్‌ ఉంది. గుర్తింపు ఉన్న సెలబ్రిటీలను ఒకే ఇంట్లో పెట్టి వారితో మూడు నెలల పాటు ఎంటర్‌టైన్‌ చేయిస్తోంది ఈ షో. ఈ క్రమంలో ఇంట్లో జరిగే గొడవలు, వాదనలు, లవ్‌ ట్రాక్స్‌, గాసిప్స్‌.. ఇలా అన్ని ఎలిమెంట్లూ బుల్లితెర ఆడియన్స్‌కి ఫుల్‌ కిక్ ఇస్తున్నాయి.

ప్రోమో ఇలా..బిగ్​బాస్​ సీజన్​ 7 ఫైనల్​ రోజు జరిగిన రచ్చ వల్ల.. ఈ షోపై చాలా నెగిటివిటీ స్ప్రెడ్​ అయ్యింది. దీంతో బిగ్​బాస్​ ఇక ఉండదని.. సీజన్​ 7 మాత్రమే లాస్ట్​ అంటూ ఎన్నో రూమర్స్​ వచ్చాయి. అయితే.. వాటన్నింటిని పటాపంచలు చేస్తూ బిగ్‍బాస్ 8కి సంబంధించి టీజర్​, ప్రోమో రిలీజ్​ అయ్యాయి. ఇక ఈ ప్రోమో చూస్తే ఇందులో నాగార్జున, కమెడియన్ సత్య ఉన్నారు. సత్యను ఓ లగ్జరీ హౌస్‍లోకి నాగార్జున తీసుకెళ్లడంతో ఈ నయా ప్రోమో షురూ అయ్యింది. అయితే, తనకు ఏకాంతం కావాలని సత్య అంటే మరోసారి ఆలోచించుకోవాలని నాగార్జున చెబుతారు. ఒక్కసారి కమిట్​ అయితే లిమిటే లేదని అంటారు. తనకు ఫుల్ ప్రైవసీ కావాలని సత్య అంటారు. ఆ తర్వాత ఎడారిలో మాసిన దుస్తులతో సత్య కనిపిస్తారు. ఈ సారి సీజన్ 8లో ఎంటర్‌టైన్‍మెంట్​కు, ఫన్‍కు, టర్న్‌లకు, ట్విస్టులకు లిమిటే లేదు అని నాగార్జున చెప్పే డైలాగ్‍తో ప్రోమో పూర్తవుతుంది. సత్యను ఒంటరిగా వేరే చోటికి పంపడం ఈ ప్రోమోలో ఉండటంతో బిగ్‍బాస్ 8వ సీజన్‍లో డిఫరెంట్ కాన్సెప్ట్ ఏమైనా ఉంటుందా అనే అంచనాలు మొదలయ్యాయి.

రెండు హౌజ్​లు?: సాధారణంగా బిగ్​బాస్​ హౌజ్​ అంటే.. ఒకటే ఇంట్లో సెలబ్రిటీలందరినీ పెట్టి వారితో గేమ్​ ఆడిస్తుంటారు మేకర్స్​. అయితే.. సీజన్​ 8ని కొత్తగా చూపించే క్రమంలో.. ఈ సీజన్​లో రెండు హౌజ్​లు ఉంటాయనే వార్తలు వైరల్​ అవుతున్నాయి. అందులోనూ కొద్దిమంది సెలబ్రిటీలను రెండో హౌజ్​లో ఉంచి.. షో చివర్లో వారిని మొదటి ఇంట్లోకి పంపిస్తారనే టాక్​ నడుస్తోంది. అయితే, ఈ విషయంపై అధికారికంగా కన్ఫర్మేషన్ ఇంకా రాలేదు.

స్టార్ట్​ ఎప్పుడు :అయితే బిగ్‍బాస్ 8వ సీజన్ ఎప్పుడు మొదలుకానున్నది అనే విషయాన్ని టీజర్​ లేదా ప్రోమోలో ఎక్కడ మేకర్స్​ వెల్లడించలేదు. త్వరలోనే సీజన్​ స్టార్ట్​ అవుతుందని చెప్పారు కానీ.. ఎప్పుడో డేట్​ చెప్పలేదు. అయితే, సెప్టెంబర్ 8వ తేదీన ఈ సీజన్ మొదలవుతుందనే అంచనాలు ఉన్నాయి. ప్రస్తుతం ఆదివారం జరుగుతున్న ఓ షో సెప్టెంబర్​ 1న పూర్తి కానుండటంతో సెప్టెంబర్​ 8వ తేదీ నుంచి స్టార్ట్​ చేయాలని ప్లాన్​ చేస్తున్నారట.