Alluarjun Pushpa 2 Budget : ఐకాన్ స్టార్ అల్లు అర్జున్ నటించిన 'పుష్ప' తొలి భాగం సెన్సేషనల్ హిట్ అయిన సంగతి తెలిసిందే. భాషతో సంబంధం లేకుండా పుష్ప మేనరిజమ్‌, డైలాగ్‌తోనూ ప్రపంచం మొత్తం ఊగిపోయింది. ఆ రెస్పాన్స్ను దృష్టిలో పెట్టుకుని ఈ చిత్రానికి సీక్వెల్‌గా రానున్న 'పుష్ప 2' మూవీ షూటింగ్ ప్రస్తుతం జరుగుతోంది. ఈ చిత్రాన్ని ఆగస్ట్‌ 15న విడుదల చేయ‌నున్న‌ట్లు మేకర్స్ ఇప్పటికే ప్రకటించారు. అయితే కొద్ది రోజుల నుంచి సినిమా వాయిదా పడనున్నట్లు వార్తలు వస్తున్న నేపథ్యంలో మూవీ అనుకున్న తేదికే రిలీజ్ అవుతుందని మూవీటీమ్ మరోసారి క్లారిటీ కూడా ఇచ్చింది. ఈ సమయంలోనే మరో వార్త కూడా నెట్టింట్లో చక్కర్లు కొట్టడం ప్రారంభమైంది.
అదేంటంటే ఈ సినిమా షూటింగ్ ఆలస్యం కావడం వల్ల బడ్జెట్ బాగా పెరిగిపోయిందని తెలిసింది. ముందు అనుకున్న దాన్ని కన్నా 30 - 40 శాతం వరకు బడ్జెట్ పెరిగిందని బయట కథనాలు వస్తున్నాయి. మొదట రూ.350కోట్లు అని అంచనా వేసుకున్నారట. కానీ ఇప్పుడది రూ.500 వరకు అవుతున్నట్లు తెలిసింది. అయినా ఈ చిత్ర నిర్మాణ సంస్థ మైత్రీ మూవీ మేకర్స్ వెనకాడకుండా నిర్మిస్తున్నారట.
పైగా మొదటి నుంచి సుకుమార్ ఈ సీక్వెల్ విషయంలో ఎక్కడా రాజీ పడటం లేదని తెలుస్తోంది. ఇంటర్నేషనల్ స్టాండర్డ్స్తో తెరకెక్కిస్తున్నట్లు అర్థమవుతోంది. స్క్రిప్ట్ మీద కూడా కంటిన్యూగా కూర్చుంటున్నారని, సీన్స్కు సంబంధించి ఔట్ ఫుట్ కొంచెం సరిగ్గా రాకపోయినా మళ్లీ రీషూట్స్ చేస్తున్నారని సమాచారం అందుతోంది. అందుకే ఈ సినిమా బడ్జెట్ పెరుగుతూ పోతుందని అంటున్నారు. అలాగే నిర్మాతలు కూడా ఒకేసారి పలు భాషల్లో విడుదల చేయాలనే లక్ష్యంతో ముందుకెళ్తున్నారట.