జొమాటో న్యూ సర్వీస్​​​ - ఇకపై ఒకేసారి 50 మందికి సరిపడా ఫుడ్ డెలివరీ! - Zomato Large Order Fleet

Zomato Large Order Fleet : జొమాటో యూజర్లకు గుడ్ న్యూస్​. ఇకపై 50 మందికి సరిపడే భోజనాలను జొమాటో డెలివరీ చేయనుంది. గ్రూప్​ ఈవెంట్లు, పార్టీలు చేసుకునే వారికి ఈ 'లార్జ్ ఆర్డర్ ఫ్లీట్' సర్వీస్​ చాలా బాగా ఉపయోగపడుతుందని జొమాటో తెలిపింది. పూర్తి వివరాలు మీ కోసం.

Zomato Large Order Fleet : ప్రముఖ ఆన్​లైన్ ఫుడ్ డెలివరీ ప్లాట్​ఫాం జొమాటో తమ యూజర్ల కోసం ఎప్పటికప్పుడు కొత్త సర్వీస్​లను అందుబాటులోకి తెస్తోంది. అందులో భాగంగా మంగళవారం 'లార్జ్ ఆర్డర్ ఫ్లీట్​' సర్వీస్​ను ప్రారంభించింది. దీని ద్వారా ఓకేసారి 50 మంది వ్యక్తులకు సరిపడా భోజనాలను డెలివరీ చేయనున్నట్లు పేర్కొంది. గ్రూప్ ఈవెంట్లు, పార్టీలు చేసుకునేవారికి ఇది ఎంతగానో ఉపయోగపడుతుందని తెలిపింది.

"భారతదేశంలోనే మొదటిసారిగా భారీ ఫుడ్​ ఆర్డర్లను అందించడానికి "లార్జ్​ ఆర్డర్ ఫ్లీట్​"ను ప్రారంభిస్తున్నాం. ఈ ఆర్డర్లను డెలివరీ చేయడానికి 'ఆల్​-ఎలక్ట్రిక్​ ఫ్లీట్​'ను ఉపయోగిస్తాం. దీని వల్ల కస్టమర్లకు మంచి ఎక్స్​పీరియన్స్​ కలుగుతుంది." -
జొమాటో సీఈఓ దీపీందర్​ గోయల్​ ట్వీట్​ (ఎక్స్​)

ఎలక్ట్రిక్ వెహికల్స్​తో డెలివరీ
Zomato All Electric Fleet : జొమాటో ఫుడ్ ఆర్డర్లను డెలివరీ చేయడానికి ప్రత్యేకమైన ఎలక్ట్రిక్ వాహనాలను వాడుతోంది. ఇంతకు ముందు సాధారణ ఆర్డర్లు ఇవ్వడానికి కూడా వీటినే వాడారు. తాజాగా వీటిని ఈ పెద్ద ఫుడ్ ఆర్డర్లు బట్వాడా చేయడానికి కూడా ఉపయోగించాలని నిర్ణయించారు. దీనిలో కూలింగ్ కంపార్ట్​మెంట్​లు, హాట్​ బాక్స్​లు రెండూ ఉంటాయి. కనుక ఫుడ్​ చాలా ఫ్రెష్​గా ఉంటుందని జొమాటో తెలిపింది.

జొమాటో ‘ప్యూర్‌ వెజ్‌ ఫ్లీట్‌’
Zomato Pure Veg Fleet : జొమాటో వ్యవస్థాపకుడు, సీఈఓ దీపిందర్ జోషి ఇటీవలే శాకాహారుల కోసం ప్రత్యేకంగా 'ప్యూర్​ వెజ్​ ఫ్లీట్​' పేరుతో ప్రత్యేక సేవలను ప్రారంభించిన విషయం తెలిసిందే. దీని వల్ల కస్టమర్లు శాకాహారం మాత్రమే అందించే రెస్టారెంట్‌లను ఎంపిక చేసుకునే సౌకర్యం కలుగుతుంది. అంతేకాదు నాన్​-వెజ్​ వండే హోటల్స్​ను పూర్తిగా మినహాయించే అవకాశం కూడా యూజర్లకు కల్పిస్తారు. అయితే ఇందుకోసం మొదటిగా ఆకుపచ్చ డెలివరీ బాక్స్​లను ఉపయోగించాలని జొమాటో భావించింది. కానీ చివరికి ఎర్ర బాక్స్​ల్లోనే ఫుడ్​ ఆర్డర్స్ అందించాలని నిర్ణయించుకుంది.

భవిష్యత్‌లో కేక్‌ డెలివరీ కోసం కూడా ప్రత్యేక ఫ్లీట్‌ను ఏర్పాటుచేయనున్నామని, డెలివరీ సమయంలో కేక్‌ ఏమాత్రం పాడవకుండా ఉండేందుకు ప్రత్యేక ఏర్పాటు ఉంటుందని జొమాటో సీఈఓ చెప్పారు.