Delhi Capitals buys Mysore Boy In IPL Auction 2025 : సాధారణ మధ్య తరగతి కుర్రాడు సాధించాడు. మిడిల్క్లాస్ కష్టాలన్నీ దాటి మెగా క్రికెట్ టోర్నమెంట్ ఇండియన్ ప్రీమియర్ లీగ్- ఐపీఎల్లో అడుగుపెట్టాడు. ఇటీవల జరిగిన ఐపీఎల్ మెగా వేలంలో దిల్లీ క్యాపిటల్స్ రూ.30 లక్షలకు అతడిని కొనుగోలు చేసింది. అయితే అతడు ఈ స్థాయికి రావడంలో సైకిల్ కీలక పాత్ర పోషించింది. అయితే ఆ కుర్రాడు ఎవరు, అతడికి సైకిల్ ఎలా సాయం చేసిందంటే?
అంతా ఆ సైకిల్ చలవే!
కర్ణాటకలోని మైసూరుకు చెందిన మన్వంత్ కుమార్ ఐపీఎల్లో అరంగేట్రం చేయనున్నాడు. మన్వంత్ ఐపీఎల్కు సెలెక్ట్ కావడంలో అతడి తల్లిదండ్రులు, సోదరుడితో పాటు ఓ సైకిల్ కూడా తన వంతు సహాయం చేసింది. మన్వంత్ కుమార్ పదేళ్ల వయసు ఉన్నప్పటి నుంచి క్రికెట్ ఆడేవాడు. ఆతడి సోదరుడు హేమంత్ కుమర్ కూడా క్రికెటరే. ఇతడిని చూసే మన్వంత్ క్రికెట్పై మక్కువ పెంచుకున్నాడు. క్రికెట్ పాక్టీస్ చేయాలంటే ఇంటి నుంచి దాదాపు 15 కిలోమీటర్లు వెళ్లాలి. హేమంత్ వద్ద మాత్రమే సైకిల్ ఉంది.
దీనిపై ఇద్దరు తమ క్రికెట్ కిట్లను పట్టుకుని వెళ్లాలంటే చాలా కష్టం. అయితే బెంగళూరు మెట్రోపాలిటన్ ట్రాన్స్పోర్ట్ కార్పొరేషన్- బీఎమ్టీసీలో డ్రైవర్గా పనిచేసే మన్వంత్ తండ్రి లక్ష్మి కుమార్కు మరో సైకిల్ కొనేంత స్తోమత లేదు. ప్రాక్టీస్ లేకుంటే ఆట మీద ప్రభావం పడుతుంది. తన కుమారులు ఎట్టి పరిస్థితిల్లోనూ వెనకడుగు వేయకూడదని, ఎలాగోలా డబ్బులు అడ్జస్ట్ చేసి మరో సైకిల్ కొనుగోలు చేశాడు లక్ష్మి కుమార్. అలా ఇద్దరి ప్రాక్టీస్ ఆటంకం లేకుండా సాగింది. అలా మన్వంత్ ఐపీఎల్లోకి సెలెక్ట్ కావడానికి ఆ సైకిల్ ద్వారా గ్రౌండ్ సిద్ధం అయింది.
"నా కుమారుడు ఐపీఎల్ వంటి పెద్ద టోర్నీకి ఎంపికయ్యాడు. భవిష్యత్తులో మన్వంత్ భారత జట్టుకు ప్రాతినిధ్యం వహించాలి. గతేడాది ఐపీఎల్ వేలంలో 26మందిలో ఆరుగురికి ఛాన్స్ వచ్చింది. అయితే ఇటీవల జరిగిన మెగా వేలంలో- మొదటిసారి మైసూరు నుంచి ఐపీఎల్కు ఎంపికైన ప్లేయర్గా మన్వంత్ నిలిచాడు."
--లక్ష్మి కుమార్, మన్వంత్ కుమార్ తండ్రి
పట్టు వదల్లేదు!
మన్వంత్ జర్నీలో సోదరుడి సాయం మరువలేది. అన్ని విధాలా తమ్ముడికి హేమంత్ అండగా నిలిచాడు. దీనికి మన్వంత్ క్రమశిక్షణ జతచేశాడు. రోజూ ఉదయం 5 గంటలకు లేచి వ్యాయామం చేసేవాడు. అనంతరం 9 గంటలకు బాలచంద్ర క్రికెట్ క్లబ్లో ప్రాక్టీస్కు వెళ్లేవాడు. అక్కడ కోచ్ బాలచంద్ర- మన్వంత్కు క్రికెట్లో మెలకువలు నేర్పాడు. అలా గతేడాది జరిగిన వేలంలో మన్వంత్ పాల్గొన్నాడు. కానీ దురదృష్టవశాత్తు ఏ జట్టు అతడిని కొనుగోలు చేసుకోలేదు. అన్సోల్డ్గా మిగిలిపోయినా మన్వంత్ నిరాశ పడలేదు. అదే క్రమశిక్షణతో ప్రయత్నించాడు. ఈసారి దిల్లీ క్యాపిటల్స్ జట్టు అతడిని రూ.30 లక్షలకు దక్కించుకుంది. అయితే కనీసం ఓ బ్యాగు, షూ కొనలేని స్థితి నుంచి ఐపీఎల్లో ఆడే స్థాయికి ఒక మామూలు మధ్య తరగతి కుర్రాడు ఎదగడం అంటే అంత తేలికైన విషయం కాదు.
"మన్వంత్ ఐపీఎల్కు సెలెక్ట్ అయినందుకు చాలా సంతోషంగా ఉంది. తండ్రి రాత్రి డ్యూటీ నుంచి వచ్చిన తర్వాత- ఆయనతో కలిసి మన్వంత్ క్రికెట్ ఆడేవాడు. నా పెద్ద కుమారుడికి క్రికెట్పై ఆసక్తి ఉండేది. అనంతరం మన్వంత్ కూడా క్రికెట్పై మక్కువ పెంచుకున్నాడు. మా చుట్టుపక్కల వాళ్లు కూడా తగినంత సాహాయం చేశారు. మన్వంత్ ఎన్నడూ ప్రాక్టీస్ ఆపలేదు. భవిష్యత్తులో ఇంకా బాగా ఆడతాడు."
--శ్రీదేవీ కుమార్, మన్వంత్ కుమార్ తల్లి
'మా తమ్ముడు చాలా కష్టపడుతున్నాడు'
మన్వంత్ లైఫ్లో ఇది ఫస్ట్ స్టేజ్ మాత్రమే అని, ఇంకా మున్ముందు చూడాల్సింది చాలా ఉందని హేమంత్ కుమార్ అన్నాడు. ప్రస్తుతం అతడి ముందు ఉన్న అవకాశాన్ని మన్వంత్ సద్వినియోగం చేసుకోవాలని చెప్పాడు. "నేను కూడా ఒక క్రికెటర్నే. అండర్ 16, 19, 23 లీగ్ల్లో ఆడాను. ఇప్పుడు మన్వంత్కు మంచి అవకాశం వచ్చింది. మన్వంత్ అండర్ 14, మైసూరు జోన్ నుంచి అండర్ 16కి ఎంపికయ్యాడు. అండర్ 19లో కూడా మంచి ప్రతిభ కనబర్చాడు. ఇప్పుడు ఇందౌర్లో సయ్యద్ ముస్తాక్ అలీ ట్రోఫీలో ఆడుతున్నాడు. మన్వంత్ చాలా కష్టపడుతున్నాడు. అతడు ఇంకా చాలా నేర్చుకోవాల్సి ఉంది" అని హేమంత్ అన్నాడు.
