Jabalpur Consumer Court Unique Case : తన బ్యాంకు ఖాతా నుంచి అక్రమంగా రూ.295 కట్ చేసినందుకు బ్యాంకుపైనే ఏకంగా ఏడేళ్ల పాటు పోరాటం చేశాడు ఓ వ్యక్తి. ఎందుకు కట్ చేసిందో బ్యాంక్ సరైన సమాధాన ఇవ్వకపోవడం వల్ల కన్జ్యూమర్ కోర్టులో ఫిర్యాదు చేశాడు. అందుకోసం రూ.3 వేలకుపైనే ఖర్చు చేశాడు. ఏడేళ్ల తర్వాత కోర్టు ఆ వ్యక్తికి అనుకూలంగా తీర్పునిస్తూ రూ.295తో పాటు రూ.4వేలు పరిహారంగా చెల్లించాలని బ్యాంక్ను అదేశించింది. ఈ ఘటన ఉత్తర్ప్రదేశ్లో జరిగింది.
ఇదీ జరిగింది
పనాగర్కు చెందిన నిశాంత్ తామ్రకార్ అనే వ్యక్తి 2017లో వాషింగ్ మెషీన్ను ఈఎమ్ఐ విధానంలో కొనుగోలు చేశాడు. అందుకోసం స్టేట్ బ్యాంక్ ఆఫ్ ఇండియా ఖాతాను ఉపయోగించాడు. ఒకసారి ఆ నెల కట్టాల్సిన ఈఎంఐతో పాటు అదనంగా రూ.295 కూడా కట్ అయ్యాయి. దీని గురించి తెలుసుకునేందుకు వాషింగ్ మెషీన్ కొన్న కంపెనీ దగ్గరకు వెళ్లి అడిగాడు. అక్కడ ఆ నగదు కట్ చేసింది మేం కాదు, బహుశా బ్యాంక్ కట్ చేసుంటుందని వారు చెప్పారు. దీంతో బ్యాంక్ను సంప్రదించిగా చెక్ డిడక్షన్ ఛార్జీ కోసం రూ.295 కట్ చేసినట్లు చెప్పారు. దీనితో తాను అకౌంట్లో తగినంత మొత్తాన్ని ఎప్పుడూ ఉంచుతానని, చెక్ బౌన్స్ కావడానికి అవకాశం లేదని బ్యాంక్కు తెలిపాడు. ఎలాగైనా తన రూ.295లను వెనక్కు ఇవ్వాలని కోరాడు. కాను బ్యాంక్ అందుకు ఒప్పుకోలేదు. దీనితో బ్యాంక్ దగ్గర నుంచి తన డబ్బును తిరిగి తీసుకోవాలని నిశాంత్ నిర్ణయించుకున్నాడు.
ఏడేళ్లుగా విచారణ
అందుకోసం లాయర్ రోహిత్ పైగ్వార్ను కలిసిన నిశాంత్ జరిగిందంతా చెప్పాడు. దీనిపై కన్జ్యూమర్ కోర్టులో ఫిర్యాదు చేయొచ్చని, అందుకోసం రూ.3000లను డిపాజిట్ చేయాల్సి ఉంటుందని తెలిపారు. ఎంత ఖర్చు అయినా సరే బ్యాంక్ తన తప్పు తెలుసుకునేలా చేయాలని నిశాంత్ లాయర్తో చెప్పాడు. దీంతో జబల్పుర్ కన్జ్యూమర్ కోర్టులో ఫిర్యాదు చేశాడు. 2017 నుంచి ఈ కేసు విచారణ జరుగుతోంది. కానీ రూ.295 ఎందుకు కట్ చేశారనేది మాత్రం బ్యాంక్ చెప్పలేకపోయింది. దీంతో 7 సంవత్సరాల తర్వాత నవంబర్ 29న(శుక్రవారం) నిశాంత్కు అనుకూలంగా కోర్టు తీర్పునిచ్చింది. రూ.295తో పాటు డిపాజిట్ చేసిన మొత్తాన్ని తిరిగి ఇవ్వాలని బ్యాంకును ఆదేశించింది.
'రెండు నెలల్లో చెల్లించపోతే జరిమానా'
నిశాంత్కు రూ.295తో పాటు మొత్తం రూ.4000 రూపాయలను రెండు నెలల్లో చెల్లించాలని బ్యాంక్ను ఆదేశించినట్లు అడ్వకేట్ రోహిత్ తెలిపారు. ఆ మొత్తాన్ని రెండు నెలల్లో చెల్లించకపోతే సంబంధిత అధికారికి మూడేళ్ల జైలు శిక్ష, రూ.10,000 జరిమానా విధిస్తారని పేర్కొన్నారు. ఈ తీర్పుపై నిశాంత్ స్పందిస్తూ, తాను డబ్బు కోసం ఇదంతా చేయలేదని తెలిపాడు. కేవలం బ్యాంక్కు గుణపాఠం చెప్పడం కోసమే తాను ఇదంతా చేశానని చెప్పాడు.
