Car Launches In December 2024 : మీరు ఇయర్ ఎండింగ్లో కొత్త కారు కొనాలని అనుకుంటున్నారా? అయితే మీకు గుడ్ న్యూస్. 2024 డిసెంబర్లో మూడు సరికొత్త కార్లు ఇండియన్ మార్కెట్లోకి విడుదల కానున్నాయి. అవి :
1. హోండా అమేజ్
2. కియా సిరోజ్
3. టయోటా కామ్రీ
మరెందుకు ఆలస్యం వీటి డిజైన్, ఫీచర్స్, స్పెక్స్, ధర తదితర పూర్తి వివరాలు తెలుసుకుందాం రండి.
1. Honda Amaze Facelift : హోండా కార్స్ ఇండియా కంపెనీ 2024 డిసెంబర్ 4న ఇండియన్ మార్కెట్లోకి థర్డ్ జనరేషన్ అమేజ్ ఫేస్లిఫ్ట్ను లాంఛ్ చేయనుంది. డిజైన్ పరంగా ఈ కాంపాక్ట్ సెడాన్ కారులో అనేక మార్పులు చేసినట్లు తెలుస్తోంది. ఎక్స్టీరియర్తోపాటు, ఇంటీరియర్లోనూ అనేక అప్గ్రేడ్స్ చేసినట్లు సమాచారం. అయితే ఈ కారులో హోండా ఎలివేట్ను పోలిన డ్యాష్బోర్డ్ ఉంటుంది. సేఫ్టీపరంగా చూస్తే ఈ కారులో ADAS ఫీచర్ను కూడా పొందుపరిచారు.
New Honda Amaze Features : ఈ హోండా అమేజ్ కారు ముందు భాగంలో న్యూ హెడ్లైట్స్, బంపర్ అమర్చారు. బోనెట్ మాత్రం ప్రస్తుత మోడల్లో ఉన్నట్లుగానే ఉంది. ప్రస్తుత మోడల్ కంటే పెద్ద గ్రిల్ను పెట్టారు. కారు లోపల కొత్త సాఫ్ట్ టచ్ మోటీరియల్స్ వాడారు. అలాగే రియర్ ఏసీ వెంట్స్ కూడా పెట్టారు. ఈ లేటెస్ట్ కారులో 8 అంగుళాల టచ్స్క్రీన్ ఇన్ఫోటైన్మెంట్ సిస్టమ్ ఉంటుంది. అయితే దీనిలో 360 డిగ్రీ కెమెరా మాత్రం మిస్ అయినట్లు తెలుస్తోంది.
ఈ లేటెస్ట్ అమేజ్ కారులో 1.2 లీటర్, ఫోర్-సిలిండర్ పెట్రోల్ ఇంజిన్ ఉండొవచ్చని, ఇది 89 బీహెచ్పీ పవర్, 110 ఎన్ఎం టార్క్ జనరేట్ చేస్తుందని తెలుస్తోంది. ఇది 5 స్పీడ్ మాన్యువల్, సీవీటీ ఆటోమేటిక్ గేర్బాక్స్తో అనుసంధానమై పనిచేస్తుంది. హోండా కంపెనీ - ఇండియాలో డీజిల్ ఇంజిన్ కార్లను క్రమంగా తగ్గిస్తూ వస్తోంది. కనుక కొత్త అమేజ్ కారు కేవలం పెట్రోల్ వెర్షన్లో లభించనుంది.
New Honda Amaze Price : ఈ న్యూ హోండా అమేజ్ కారు ధర సుమారుగా రూ.7.29 లక్షల నుంచి రూ.10.05 లక్షల వరకు ఉంటుందని అంచనా.
2. Toyota Camry Facelift : టయోటా కిర్లోస్కర్ మోటార్స్ 2024 డిసెంబర్ 11న భారత మార్కెట్లోకి నైన్త్ జనరేషన్ కామ్రీ కారును లాంఛ్ చేయడానికి సన్నాహాలు చేస్తోంది. టయోటాకు చెందిన ఈ ఫ్లాగ్షిప్ కారు ఇప్పటికే గ్లోబల్ మార్కెట్లో అందుబాటులో ఉంది. ఈ కారులో కూడా ఎక్స్టీరియర్, ఇంటీయర్ మార్పులు చేశారు. అలాగే లేటెస్ట్ ఫీచర్లు అమర్చారు. ప్రస్తుతమున్న కామ్రీ కారులో 2.5 లీటర్ హైబ్రీడ్ ఇంజిన్ ఉంది. త్వరలో లాంఛ్ కానున్న మోడల్లోనూ ఇదే ఇంజిన్ ఉండే అవకాశం ఉంది.
New Toyota Camry Features : ఈ టయోటా కామ్రీ కారు మంచి స్టైలిష్ లుక్లో ఉంటుంది. ఈ కారులో 9 అంగుళాల టచ్స్క్రీన్ ఇన్ఫోటైన్మెంట్ సిస్టమ్, అలాగే 7 అంగుళాల టీఎఫ్టీ మల్టీ-ఇన్ఫర్మేషన్ డిస్ప్లే ఉంటాయి. ఈ లగ్జరీ కారులో 2.5 లీటర్, ఫోర్ సిలిండర్ ఇంజిన్ అమర్చారు. ఇది 222 బీహెచ్పీ పవర్ జనరేట్ చేస్తుంది. ఇది eCVT గేర్బాక్స్తో అనుసంధానమై పనిచేస్తుంది. ప్రస్తుతమున్న వెర్షన్ లీటర్కు 19 కి.మీ మైలేజ్ ఇస్తోంది. లేటెస్ట్ వెర్షన్ ఇంత కన్నా ఎక్కువ మైలేజ్ ఇచ్చే అవకాశం ఉంది.
New Toyota Camry Price : ఈ ప్రీమియం టయోటా కారు ధర బహుశా రూ.50 లక్షల వరకు ఉండవచ్చని అంచనా.
3. Kia Syros : కియా కంపెనీ ఇండియన్ మార్కెట్లోకి 2024 డిసెంబర్ 19న సిరోస్ కారును లాంఛ్ చేయనుంది. ఇప్పటికే ఈ లేటెస్ట్ కారు పలుమార్లు ఇండియన్ రోడ్లపై కనిపించింది. ఈ కార్లో ఎల్ఈడీ హెడ్ల్యాంప్స్, ఎల్ఈడీ డీఆర్ఎల్స్ ఉంటాయని తెలుస్తోంది. ముఖ్యంగా ఈ లేటెస్ట్ మోడల్లోని హెడ్ల్యాంప్స్, కార్నివాల్ ఎంపీవీని పోలి ఉంటాయని టాక్. ఇక బంపర్స్ సిల్వర్ ఫినిష్తో వస్తాయని సమాచారం.
Kia Syros Features : ఈ కారులో కచ్చితంగా పనోరమిక్ సన్రూఫ్ ఉంటుంది. దీనితోపాటు క్లైమేట్ కంట్రోల్ విత్ రియర్ వెంట్స్, డ్యూయెల్ స్క్రీన్స్ విత్ వైర్లెస్ ఫోన్ మిర్రరింగ్, కనెక్టెడ్ కార్ టెక్నాలజీ, లెవల్ 1 ADAS ఉంటాయని అంచనా. ఈ కియా కారు 1.2 లీటర్ ఎన్ఏ పెట్రోల్, 1.0 లీటర్ జీడీఐ టర్బో పెట్రోల్, 1.5 లీటర్ డీజిల్ ఇంజిన్ ఆప్షన్లలో వస్తుందని సమాచారం.
Kia Syros Price : ఈ కియా కారు ధర సుమారుగా రూ.6 లక్షలు - రూ.10 లక్షల వరకు ఉంటుందని అంచనా.
