ఛాంపియ‌న్స్ ట్రోఫీ విన్నర్స్​కు వైట్ సూట్స్​ ఎందుకు ఇస్తారో తెలుసా?

ఛాంపియ‌న్స్ ట్రోఫీ విన్నర్స్​కు వైట్ సూటే ఎందుకు ఇస్తారో తెలుసా? దాని ప్ర‌త్యేక‌త తెలుసుకోవాల్సిందే!

ICC Champions Trophy White Suit : 2013లో టీమ్​ఇండియా ఛాంపియ‌న్స్ ట్రోఫీ గెలుచుకుంది. మ‌హేంద్ర సింగ్ ధోని నాయ‌క‌త్వంలో ఆ టోర్నీలో విజేత‌గా నిలిచింది. అయితే క‌ప్పు అందుకునే స‌మ‌యంలో నిశితంగా గ‌మినిస్తే టీమ్​ఇండియా ఆట‌గాళ్లంతా తెల్ల కోటు వేసుకున్నారు. ఐసీసీ నిర్వ‌హించే వ‌న్డే, టీ-20 ప్ర‌పంచ క‌ప్పుల్లో ఇలాంటి సంప్ర‌దాయం మ‌న‌కు ఎక్క‌డా క‌న‌ప‌డ‌దు. విజేత‌గా నిలిచిన జ‌ట్టు వారి దేశ‌పు యూనిఫామ్​తోనే క‌ప్పు అందుకుని సెలెబ్రేష‌న్స్ చేసుకుంటుంది. అలాంటిది ఛాంపియ‌న్స్ ట్రోఫీలో మాత్రం ఈ ప్ర‌త్యేకత ఎందుకు? అస‌లు ఈ తెల్ల‌కోటు సంప్ర‌దాయం ఎక్క‌డి నుంచి వ‌చ్చింది, ఎలా మొద‌లైంది దాని వెన‌క ఉన్న చ‌రిత్ర గురించి ఈ స్టోరీలో తెలుసుకుందాం.

ఫిబ్ర‌వ‌రి 19 నుంచి ఛాంపియ‌న్స్ ట్రోఫీ-2025 ప్రారంభం కానుంది. ఈ టోర్నీకి పాకిస్థాన్ ఆతిథ్య‌మిస్తోంది. ఈ నేపథ్యంలో జనవరి 14న అంతర్జాతీయ క్రికెట్ కౌన్సిల్ (ఐసీసీ) ఛాంపియన్స్ ట్రోఫీ 2025 కోసం ఒక స్పెషల్ ప్రోమోను విడుదల చేసింది. ఇందులో పాకిస్థాన్​ లెజెండరీ బౌల‌ర్ వసీం అక్రమ్, టోర్నమెంట్ విజేత‌లు ధ‌రించే తెల్ల సూట్​ను ఆవిష్క‌రించారు. దాని మీద ఐసీసీ ఛాంపియన్స్ ట్రోఫీతో పాటు ఛాతీ జేబుపై బంగారు అక్షరాలతో ఆతిథ్య దేశం పాకిస్థాన్​ పేరు సైతం ఉంది. టోర్నీలో విజేత‌లుగా నిలిచి టీమ్ స‌భ్యులు వీటిని ధ‌రించి సంబ‌రాలు చేసుకుంటారు. వారికి ట్రోఫీతో పాటు ఈ వైట్ బ్లేజ‌ర్స్​ని అందిస్తారు.

వైట్ సూటే ఎందుకు?
ఇక ఈ టోర్నీలో జ‌ట్లు ట్రోఫీ కోస‌మే కాకుండా, తెల్ల కోట్ కోసం కూడా పోటీ ప‌డ‌తాయ‌ని ఐసీసీ తెలిపింది. ఈ వైట్ సూట్ ఆటగాళ్ల గొప్పతనం, దృఢ సంకల్పాన్ని సంగ్రహించే "గౌరవ బ్యాడ్జ్" అని అభివ‌ర్ణించింది. ఈ వైట్ సూట్ ఛాంపియన్లు అలంకరించే గౌరవ చిహ్నం. ఇవి ట్రోఫీ కోసం చేసిన అవిశ్రాంత కృషిని, తరతరాలకు స్ఫూర్తినిచ్చే అంశాల‌ను ప్రతిబింబిస్తాయని ఐసీసీ పేర్కొంది. ఫైనల్ గెలిచిన తర్వాత జరిగే వేడుకల్లో ఉత్సాహంగా ధరించే వైట్ సూట్ ఈ టోర్నీ గొప్ప చ‌రిత్ర‌కు ఒక ప్ర‌త్యేక‌త‌ను జోడిస్తాయి. మిగిలిన జ‌ట్లు కూడా మ‌రోసారి పోటీప‌డేలా ప్రోత్స‌హిస్తుంద‌ని వెల్ల‌డించింది.

ఇక ఈ వైట్ సూట్ సంప్ర‌దాయం ఎప్ప‌టి నుంచి మొద‌లైంద‌నే విష‌యానికి వ‌స్తే.. మొద‌టి ICC ఛాంపియన్స్ ట్రోఫీ 1998 లో జ‌రిగింది. ఈ టోర్నీకి బంగ్లాదేశ్ ఆతిథ్య‌మిచ్చింది. కానీ అప్ప‌ట్లో ఈ సంప్ర‌దాయం లేదు. 2009 లో ద‌క్షిణాఫ్రికా దేశంలో జ‌రిగిన టోర్నీలో ఆసీస్ జ‌ట్టు విజేత‌లుగా నిలిచింది. ఆ ఎడిషన్ లో వారు ఈ వైట్ సూట్ ధ‌రించి సంబ‌రాలు చేసుకున్నారు. అప్ప‌టి నుంచే ఇది ప్రారంభ‌మైంది. అప్ప‌టి నుంచి ప్ర‌తి ఎడిష‌న్ లోనూ ఇలాగే నిర్వ‌హిస్తున్నారు.

ఛాంపియన్స్ ట్రోఫీ -2025 ఫిబ్రవరి 19న పాకిస్థాన్​లో ప్రారంభ‌మ‌వుతుంది. హైబ్రిడ్ మోడ‌ల్ లో జ‌రుగుతున్న ఈ టోర్నీలో యునైటెడ్ అరబ్ ఎమిరేట్స్ లోనూ కొన్ని మ్యాచులు నిర్వ‌హించ‌నున్నారు. మార్చి 9న ఫైనల్ మ్యాచ్ జరుగుతుంది. డిఫెండింగ్ ఛాంపియ‌న్ గా పాకిస్థాన్ బ‌రిలోకి దిగ‌నుంది. 2017 లో జ‌రిగిన ఫైన‌ల్లో భార‌త్ ను ఓడించి ట్రోఫీని సొందం చేసుకుంది. ఇప్ప‌టి దాకా భార‌త్, ఆస్ట్రేలియా మాత్ర‌మే ఛాంపియ‌న్స్ ట్రోఫీని ఒక‌టి కంటే ఎక్కువ సార్లు గెలుచుకున్న జ‌ట్లుగా రికార్డు సృష్టించాయి.