గోల్డ్, సిల్వర్ రేట్లు తగ్గుతాయా? ఇప్పుడు కొనడం మంచిదేనా? కొంతకాలం ఆగాలా?

త్వరలో బంగారం, వెండి ధరలు మరింత తగ్గే అవకాశం​ - కారణం ఏమిటంటే?

Gold Forecast :రానున్న రోజుల్లో బంగారం, వెండి ధరలు మరింత తగ్గే అవకాశముందని నిపుణులు అంచనా వేస్తున్నారు. హెజ్​బొల్లాతో కాల్పుల విరమణ ఒప్పందానికి ఇజ్రాయెల్ సూత్రప్రాయంగా అంగీకరించడమే ఇందుకు కారణం. త్వరలో అమెరికాలో ట్రంప్​ ప్రభుత్వం అధికారం చేపట్టనుంది. ఈ కొత్త ప్రభుత్వం తీసుకునే నిర్ణయాలు, చేపట్టే కార్యక్రమాలు కూడా బంగారం, వెండి ధరలపై ప్రభావం చూపించే అవకాశం ఉందని నిపుణులు భావిస్తున్నారు.

తగ్గనున్న గోల్డ్, సిల్వర్ రేట్లు
ఈ సంవత్సరం మొదట్లో బంగారం, వెండి ధరలు భారీగా పెరిగాయి. కానీ తరువాత అంతర్జాతీయ పరిస్థితుల కారణంగా క్రమంగా దిగివచ్చాయి. ఇండియన్ మార్కెట్లో బంగారం ధర దాని గరిష్ఠ స్థాయి నుంచి దాదాపు 6.5 శాతం మేర పడిపోయింది. వెండి అయితే దాని గరిష్ఠ స్థాయి నుంచి దాదాపు 13 శాతం వరకు తగ్గిపోయింది. అయితే డిసెంబర్​లో ఈ గోల్డ్, సిల్వర్ రేట్లు మరింతగా తగ్గుతాయా? లేదా పెరుగుతాయా? అనే దానిపై ఓ స్పష్టత వచ్చే అవకాశం ఉందని నిపుణులు చెబుతున్నారు.

"ఈ ఏడాది ఎంసీఎక్స్​లో 10 గ్రాముల స్వచ్ఛమైన బంగారం ధర రూ.79,535 వరకు పెరిగి, ఇప్పుడు (2024 నవంబర్​ 26 నాటికి) రూ.75,041కు పడిపోయింది. బంగారం ధరలపై గ్లోబల్ ఇష్యూస్​ ఎప్పుడూ ప్రభావం చూపిస్తూ ఉంటాయి. ప్రస్తుతం ఇజ్రాయెల్, హెజ్​బొల్లాల మధ్య కాల్పుల విరమణ ఒప్పందం కుదిరే అవకాశం కనిపిస్తోంది. ఇదే జరిగితే బంగారం ధరలు మరింత తగ్గే అవకాశం ఉంది. అయితే ప్రస్తుతం యూఎస్​ డాలర్ ఇండెక్స్ దాని గరిష్ఠ స్థాయికి చేరింది. అమెరికాలో ట్రంప్ ప్రభుత్వం త్వరలోనే అధికారం చేపట్టనుంది. ట్రంప్ పెట్టుబడిదారీ విధానానికి అనుకూలం కనుక ప్రస్తుతం ఇన్వెస్టర్లు బంగారం, వెండి లాంటి లోహాల కంటే డాలర్​వైపే ఎక్కువగా మొగ్గుచూపుతున్నారు. కనుక బంగారం ధరలు మరింత తగ్గే అవకాశం ఉంది."
- అనూజ్ గుప్త, కరెన్సీ అండ్ కమొడిటీస్​ హెడ్​, హెచ్​డీఎఫ్​సీ సెక్యూరిటీస్​

అనూజ్ గుప్త ప్రకారం- 'స్వల్ప కాలంలో బంగారం ధర రూ.74,600కు చేరవచ్చు. ఒక వేళ ఈ లెవల్ కూడా బ్రేక్ అయితే, గోల్డ్ రేటు రూ.73,900 వరకు కూడా పడిపోవచ్చు. ఇక వెండి ధరల విషయానికి వస్తే, ప్రస్తుతం (2024 నవంబర్​ 26) ఎంసీఎక్స్​లో కిలో వెండి ధర రూ.87,774గా ఉంది. స్వల్పకాలంలో ఇది రూ.86,700 వరకు పడిపోవచ్చు. ఆ లెవల్ కూడా బ్రీచ్​ అయితే, సిల్వర్​ ధర రూ.82,900కు చేరుకోవచ్చు.'

అంతా ట్రంప్ చేతిలో ఉంది!
డిసెంబర్​ తరువాత అమెరికాలో ట్రంప్ ప్రభుత్వం ఏర్పడనుంది. కనుక ట్రంప్ ప్రభుత్వం తీసుకునే పరిపాలనాపరమైన నిర్ణయాలు, ప్రవేశ పెట్టే పాలసీలను బట్టి, బులియన్ మార్కెట్ ట్రెండ్ మారుతుంది. కనుక ఏం జరుగుతుందో కాస్త వేచి చూడాల్సి ఉందని నిపుణులు చెబుతున్నారు.

రోల్​కోస్టర్​ రైడ్​
అమెరికాలో ట్రంప్ ప్రభుత్వం ఏర్పడి, కాస్త స్థిమిత పడే వరకు, అంటే మరికొన్ని వారాల వరకు బంగారం, వెండి ధరల్లో హెచ్చుతగ్గులు సహజంగానే ఉంటాయని ఇండియన్ బులియన్​ అండ్ జ్యువెలరీస్​ అసోసియేషన్​ (ఐబీజేఏ) అభిప్రాయపడింది.

"అమెరికా డెట్​-టు-జీడీపీ రేషియో 125 శాతం కంటే ఎక్కువగా ఉంది. ఇది ఇంకా పెరిగే అవకాశం ఉంది. ప్రస్తుతం ప్రతి ఒక్క అమెరికన్ తల​పైనా సుమారుగా 108,000 డాలర్ల (సుమారు రూ.91,04,162) రుణభారం ఉంది. అలాగే రెవెన్యూ-టూ-ఎక్స్​పెన్స్​ రేషియో మిస్​మ్యాచ్ అవుతోంది. అంటే వచ్చే ఆదాయానికి, అయ్యే ఖర్చులకు పొంతన ఉండడం లేదు. మొత్తంగా చూసుకుంటే అమెరికాపై ప్రస్తుతం 36 ట్రిలియన్ డాలర్ల (రూ.36 లక్షల కోట్లు) రుణభారం ఉంది. ఇది మరింత పెరిగే అవకాశం ఉంది. సింపుల్​గా చెప్పాలంటే, అమెరికా ఆర్థిక పరిస్థితి దారుణంగా ఉంది. ఇది ఆర్థిక మాంద్యానికి దారి తీయవచ్చు కూడా."
- సురేంద్ర మెహతా, ఐబీజేఏ నేషనల్ సెక్రటరీ

భవిష్యత్​లో ఎలా ఉంటుంది?
"బంగారం ధరలు అనేవి దీర్ఘకాలంలో కచ్చితంగా బాగా పెరుగుతాయి. కానీ షార్ట్​ టెర్మ్​లో స్పాట్​ మార్కెట్లో బంగారం ధరలు తగ్గే ఛాన్స్ ఉంది. పైగా ట్రంప్ - చైనీస్ ఉత్పత్తులపై భారీగా సుంకాలు, ఆంక్షలు విధించే అవకాశం ఉంది. దీని ప్రభావం తయారీ రంగంపై కూడా పడుతుంది. కనుక చైనా మళ్లీ ఎక్కువగా బంగారం కొనుగోలు చేసే అవకాశం ఉంది" అని సురేంద్ర మెహతా అభిప్రాయపడ్డారు.

బంగారం ధరలపై ప్రభావం చూపించేవి ఇవే!
గ్లోబల్ డిమాండ్​, వివిధ దేశాల కరెన్సీ విలువల్లో మార్పులు, ప్రస్తుత వడ్డీ రేట్లు, గోల్డ్ ట్రేడ్​పై ప్రభుత్వ నిబంధనలు - మొదలైనవి బంగారం, వెండి ధరలను ప్రభావం చేస్తాయి. వీటితోపాటు ప్రపంచంలో వివిధ దేశాల మధ్య కొనసాగుతున్న ఉద్రిక్త పరిస్థితులు, యుద్ధాలు; ఇతర కరెన్సీలతో పోల్చితే యూఎస్ డాలర్ బలంగా ఉందా లేదా బలహీనంగా ఉందా? అనేవి కూడా గోల్డ్, సిల్వర్ రేట్లను ప్రభావితం చేస్తాయని నిపుణులు చెబుతున్నారు.

ఉదాహరణకు రష్యా, ఉక్రెయిన్ మధ్య ఉద్రిక్తతలు పెరిగిన సందర్భంలో ప్రపంచవ్యాప్తంగా బంగారం, వెండి ధరలు భారీగా పెరిగాయి. కానీ అమెరికా అధ్యక్ష ఎన్నికల్లో ట్రంప్ గెలిచిన తరువాత మదుపరుల ఆలోచనలో మార్పు వచ్చింది. సేఫ్​ హెవన్ అయిన బంగారం నుంచి తమ పెట్టుబడులను ఉపసంహరించి, ఈక్విటీ మార్కెట్లలోకి వాటిని తరలించారు. దీనితో పండగ సీజన్ తరువాత మన ఇండియాలో బంగారం, వెండి ధరలు భారీగా తగ్గాయి.