Credit Card Withdrawing Benefits : ప్రస్తుత కాలంలో క్రెడిట్ కార్డు వినియోగం విపరీతంగా పెరిగిపోయింది. చిన్నచిన్న అవసరాలకు కూడా క్రెడిట్ కార్డును వాడేస్తున్నారు. అయితే క్రెడిట్ కార్డుల తప్పుడు వినియోగాన్ని అడ్డుకునేందుకు జారీ సంస్థలు ప్రయోజనాలను తగ్గిస్తున్నాయి. మరికొన్ని క్రెడిట్ కార్డు జారీ సంస్థలు పూర్తిగా బెనిఫిట్స్ను ఉపసంహరించుకుంటున్నాయి. క్రికెట్ కార్డును బెనిఫిట్స్ కోసమే తీసుకునేవారికి, దానిపై వచ్చే ప్రయోజనాలను అకస్మాత్తుగా ఉపసంహరించడం వల్ల ఇబ్బందులు పడుతున్నారు. అప్పుడు కస్టమర్ ముందున్న ఆప్షన్ ఏంటంటే?
ఆర్బీఐ మార్గదర్శకాల ప్రకారం
క్రెడిట్ కార్డును జారీ చేసే బ్యాంకులు బెనిఫిట్స్ వంటిని తగ్గించినా, ఉపసంహరించుకున్నా కస్టమర్కు నోటీసు ఇవ్వాలి. అలాగే ఎప్పటి నుంచి రివార్డు పాయింట్లు, బోనస్లపై పరిమితిని విధిస్తున్నామో క్రెడిట్ కార్డు జారీ సంస్థలు వినియోగదారుడికి తెలియజేయాలి. కాలపరిమితి స్పష్టంగా పేర్కొనాలి. నిర్ణీత గడువులోగా కస్టమర్ తన నిర్ణయాన్ని తెలియజేయకపోతే, కార్డు జారీ సంస్థ లేదా బ్యాంకు తాము చేసిన మార్పులను వినియోగదారుడు అంగీకరించినట్లుగా భావించవచ్చు. కస్టమర్కు నిబంధనలు నచ్చకపోతే కార్డును సరెండర్ చేయవచ్చు. క్రెడిట్ కార్డు జారీ సంస్థలు వడ్డీ కాకుండా ఇతర ఛార్జీలలో మార్పులు చేయాలనుకుంటే ఒక నెల ముందే కస్టమర్కు నోటీసు ఇవ్వాలి.
క్రెడిట్ కార్డు బెనిఫిట్స్పై ఆంక్షలు
పలు ప్రయోజనాలతో అందిస్తున్న క్రెడిట్ కార్డులు దుర్వినియోగం అవుతున్నాయన్న కారణంతో జారీ సంస్థలు ఇటీవల కాలంలో కీలక నిర్ణయాలు తీసుకున్నాయి. వివిధ క్రెడిట్ కార్డులపై ఇస్తున్నటువంటి రివార్డు పాయింట్లను తగ్గిస్తున్నాయి. ఇటీవలే ఐసీఐసీఐ బ్యాంక్ క్రెడిట్ కార్డు వినియోగదారులకు షాకిచ్చింది. గ్రాసరీ, బీమా కొనుగోళ్ల ఖర్చులపై ఇస్తున్న రివార్డు పాయింట్లను తగ్గించింది. అలాగే హై-ఎండ్ కార్డుల్లో స్పా యాక్సెస్ను నిలిపివేసింది. దేశీయ విమానాశ్రయాల్లో లాంజ్ యాక్సెస్ కావాలంటే ప్రతి త్రైమాసికంలో రూ.75వేల ఖర్చు చేయాలని నిబంధనలు విధించింది.
హెచ్డీఎఫ్సీ బ్యాంకు సైతం
అలాగే హెచ్డీఎఫ్సీ బ్యాంకు కూడా క్రెడిట్ కార్డుల వినియోగదారులకు షాకిచ్చింది. ఖర్చులు, టెలికాం, కేబుల్ లావాదేవీలపై రివార్డ్ పాయింట్లను ఎత్తివేసింది. అదే విధంగా యస్ బ్యాంక్ ఫ్లైట్, హోటల్ బుకింగ్ల కోసం ఇచ్చే రివార్డు పాయింట్లపై పరిమితి విధించింది.
'ఆ విషయాన్ని కస్టమర్కు తెలియజేయాల్సిందే'
క్రెడిట్ కార్డు జారీ సంస్థలు బెనిఫిట్స్, ఛార్జీలలో మార్పులు చేస్తే కస్టమర్కు కచ్చితంగా తెలియజేయాలి. వినియోగదారుడు తన క్రెడిట్ కార్డును ఎటువంటి ఛార్జీలను చెల్లించకుండానే జారీ సంస్థకు కార్డును సరెండర్ చేయవచ్చు. అతడి అభ్యర్థనను క్రెడిట్ కార్డు ఇష్యూ చేసేవారు తక్షణమే స్వీకరించాలి.
