బడ్జెట్​ 2024లో ట్యాక్స్ బెనిఫిట్స్ ఉంటాయా? పాత Vs కొత్త పన్ను విధానాల్లో ఏది బెటర్​? - Decoding Income Tax Slabs 2024

BUDGET 2024 - Income Tax Slabs And Rates : 2024 జులై 23న కేంద్ర ఆర్థికమంత్రి నిర్మలా సీతారామన్​ బడ్జెట్​ను ప్రవేశపెట్టనున్నారు. ఈ బడ్జెట్​లో పన్ను కోతలు ఉంటాయని వేతన జీవులు ఆశిస్తున్నారు. ఈ నేపథ్యంలో పాత పన్ను విధానం, కొత్త పన్ను విధానంలో ఏది బెటర్? శ్లాబ్ రేట్లు ఎలా ఉన్నాయి? మొదలైన అంశాలను ఇప్పుడు చూద్దాం.

BUDGET 2024 - Income Tax Slabs And Rates : మోదీ 3.0 ప్రభుత్వం వచ్చిన తరువాత, కేంద్ర ఆర్థిక మంత్రి నిర్మలా సీతారామన్ తొలి బడ్జెట్​ను జులై 23న ప్రవేశపెట్టనున్నారు. ఈ పూర్తి స్థాయి బడ్జెట్​లో వ్యక్తిగత ఆదాయపు పన్ను మినహాయింపులు ఉంటాయని పన్ను చెల్లింపుదారులు ఆశిస్తున్నారు. ఎన్నికల ఏడాది కావడం వల్ల ఓటర్లను ప్రలోభ పెట్టకూడదన్న ఉద్దేశంతో, ఈ ఏడాది ఫిబ్రవరి 1న ప్రవేశపెట్టిన మధ్యంతర బడ్జెట్​లో నిర్మలమ్మ పన్ను శ్లాబుల్లో ఎటువంటి మార్పులు చేయలేదు. కానీ ఈసారి ప్రవేశపెట్టనున్న బడ్జెట్ పూర్తిస్థాయిది కావడం వల్ల తమకు పన్ను మినహాయింపులు ఉంటాయని ట్యాక్స్ పేయర్స్​ భావిస్తున్నారు. ఆదాయపు పన్ను చెల్లింపుల్లో ఊరట లభిస్తే, ఆ ఆదాయం ట్యాక్స్ పేయర్స్ వ్యక్తిగత వినియోగానికి ప్రత్యక్ష ప్రోత్సాహాన్ని ఇస్తుంది. ఈ క్రమంలో పాత, కొత్త పన్ను విధానాల్లో ఏది మంచిది? వీటిలో శ్లాబ్ రేట్లు ఎలా ఉన్నాయి? అనే విషయాలు ఇప్పుడు తెలుసుకుందాం.

గత కొన్నేళ్లుగా ఆదాయపు పన్ను రిటర్నుల దాఖలు ప్రక్రియను కేంద్ర ప్రభుత్వం మరింత సులభతరం చేసింది. ముఖ్యంగా ఐటీ శాఖ పన్ను చెల్లింపుదారుల సౌలభ్యం కోసం ఎన్నో మార్పులు చేస్తోంది. ఆదాయపు పన్ను శ్లాబ్​ల హేతుబద్ధీకరణ సహా, ఐటీ ఫారమ్​లను సరళీకృతం చేసింది. ప్రస్తుతం దేశంలో రెండు రకాల ఆదాయపు పన్ను విధానాలు ఉన్నాయి. ఒకటి పాత ఆదాయపు పన్ను విధానం కాగా, ఇంకొకటి కొత్త ఆదాయపు పన్ను విధానం. ఈ రెండింట్లోనూ వేర్వేరు పన్ను శ్లాబ్​లు ఉంటాయి.

INCOME TAX SLABS (ETV Bharat)

పాత ఆదాయపు పన్ను విధానం :
పాత ఆదాయపు పన్ను విధానంలో సెక్షన్ 80 కింద అనేక పన్ను మినహాయింపులు, తగ్గింపులు ఉన్నాయి. దీని వల్ల ట్యాక్స్ పేయర్స్​కు పన్ను భారం తగ్గుతుంది.

పాత పన్ను విధానంప్రకారం, ఏడాదికి రూ.2,50,000లోపు ఆదాయం సంపాదించేవారికి ఎటువంటి పన్ను ఉండదు. రూ.2,50,000 - రూ.5,00,000 ఆదాయం ఉన్నవారికి 5 శాతం ట్యాక్స్ పడుతుంది. రూ.5లక్షలు నుంచి రూ.10లక్షలు వరకు ఆర్జించే వారికి రూ.12,500 + రూ.5లక్షలపై 20 శాతం ట్యాక్స్ పడుతుంది. రూ.10లక్షలు కన్నా ఎక్కువ సంపాదించేవారు రూ.1,12,500 + రూ.10లక్షల కంటే ఎంత ఆదాయం ఉన్నా 30శాతం వరకు ట్యాక్స్ కట్టాల్సి ఉంటుంది.

కొత్త ఆదాయపు పన్ను విధానం :
గత ఆర్థిక సంవత్సరం నుంచి పన్ను రిటర్నుల దాఖలు సమయంలోకొత్త పన్ను విధానం డిఫాల్ట్​గా మారింది. పన్ను చెల్లింపుదారులు అద్దె రసీదుల కాపీలు, బిల్లులు, చేసిన ఖర్చులకు సంబంధించిన రసీదుల వంటి వాటి గజిబిజిని తగ్గించడానికి ఈ కొత్త పన్ను విధానాన్ని తీసుకొచ్చారు. కొత్త పన్ను విధానంలో పన్ను చెల్లింపుదారులకు ఎలాంటి మినహాయింపులూ ఉండవు. ఆదాయపు పన్ను చట్టం 1961లోని సెక్షన్‌ 115బీఏసీ ప్రకారం, కొత్త ఆదాయపు పన్ను రేట్లు తక్కువగా ఉంటాయి. కొత్త ఆదాయపు పన్ను శ్లాబ్ రేట్లు కింది విధంగా ఉంటాయి.

రూ.3 లక్షల వరకు ఎటువంటి పన్ను ఉండదు. రూ.3 లక్షల - రూ.6 లక్షల మధ్య ఆదాయం ఉంటే 5 శాతం పన్ను విధిస్తారు. రూ.6 లక్షల - రూ.9 లక్షల వరకు ఆదాయం ఉంటే రూ.15,000 + రూ.6,00,000పైన ఉన్న ఆదాయంపై 10 శాతం పన్ను వేస్తారు. రూ.9 లక్షలు - రూ.12 లక్షల వరకు రాబడి ఉంటే రూ.45,000 + రూ.9,00,000పైన ఉన్న ఆదాయంపై 15శాతం పన్ను కట్టాలి. రూ.12 లక్షల - రూ.15 లక్షల వరకు ఆదాయం ఉంటే రూ.90,000 + రూ.12లక్షలపై ఆదాయానికి 20 శాతం ట్యాక్స్ కట్టాల్సి ఉంటుంది. రూ.15లక్షలకు పైగా ఆదాయం ఉంటే రూ.1,50,000 + రూ.15,00,000 పై ఎంత ఆదాయం ఉన్నా, దానిపై 30 శాతం పన్నును విధిస్తారు.

ఏ పన్ను విధానం ఎంచుకోవడం బెటర్?
కొత్త, పాత ప‌న్ను విధానాల‌లో ఏది బెట‌ర్ అంటే స‌మాధానం చెప్ప‌డం క‌ష్టం. ఇది వ్య‌క్తుల ఆదాయం, చేసే ప‌న్ను ఆదా పెట్టుబ‌డులు, అర్హత కలిగిన పన్ను మినహాయింపులు త‌దిత‌ర అంశాల‌పై ఆధార‌ప‌డి ఉంటుంది. కొత్త ప‌న్ను విధానంలో మిన‌హాయింపులు, త‌గ్గింపులు ఉండ‌వు. కానీ, శ్లాబ్ రేటు త‌క్కువ‌గా ఉంటుంది. అలాగే, ప‌న్ను చెల్లింపుదారులు ఎవ‌రి సాయం లేకుండా సుల‌భంగా దాఖ‌లు చేయ‌వ‌చ్చు. పన్ను చెల్లింపుదారుడు తన ఆర్థిక పరిస్థితిని బట్టి పన్ను విధానాన్ని ఎంచుకోవాలి. అవసరమైతే ఆర్థిక నిపుణుల సలహాను కూడా తీసుకోవాలి.