రైతుల 'దిల్లీ మార్చ్‌' ఆదివారానికి వాయిదా- కేంద్రంతో చర్చలకు రెడీ

'బారికేడ్లను బద్దలుకొట్టే ఉద్దేశం లేదు'
100 మంది రైతుల బృందం శాంతియుతంగా దిల్లీ వైపు కవాతు చేస్తుందని శంభు సరిహద్దు వద్ద ఉన్న రైతు నాయకుడు సర్వన్ సింగ్ పంధేర్ తెలిపారు. ప్రస్తుతం ఉన్న బారికేడ్లను బద్దలు కొట్టే ఉద్దేశం రైతులకు లేదని వెల్లడించారు. రైతులు ట్రాక్టర్లపై దిల్లీ వైపునకు వెళ్లడం వల్ల తమకు సమస్యగా ఉందని కేంద్ర, రాష్ట్ర ప్రభుత్వాలు సుప్రీంకోర్టుకు చెప్పాయని అన్నారు. అందుకే 100 మంది రైతుల బృందం శాంతియుతంగా దిల్లీ వైపు వెళుతుందని అన్నారు.

'మేము భారతీయులమే'
"బారికేడ్లను బద్దలుకొట్టే ఉద్దేశం మాకు లేదు. శాంతియుతంగా నిరసన తెలిపేందుకు హరియాణా, పంజాబ్ ప్రభుత్వాలు తమకు అనుమతినిస్తాయని భావిస్తున్నాం. మాకు ఇచ్చిన హామీలను ప్రభుత్వం నెరవేర్చడం లేదు. మేము కూడా భారతీయులమే. మరీ ముఖ్యంగా రైతులం. ప్రభుత్వం మమ్మల్ని ఎందుకు ఆపుతోంది? సరిహద్దుల వద్ద శాంతియుతంగా నిరసన తెలపడానికి ఎందుకు అనుమతించడం లేదు. కేంద్ర ప్రభుత్వం మా మాట వినడం లేదు. " అని పంధేర్ మండిపడ్డారు.

'అదే మా ప్రధాన డిమాండ్'
పంటలకు కనీస మద్దతు ధరే తమ ప్రధాన డిమాండ్ అని రైతు నాయకురాలు సుఖ్వీందర్ కౌర్ వ్యాఖ్యానించారు. "మాకు 12 డిమాండ్లు ఉన్నాయి. అందులో ప్రధాన డిమాండ్ పంటలకు కనీస మద్దతు ధర. పంజాబ్ ప్రభుత్వం ఎంఎస్​పీ అందిస్తుందని హామీ ఇచ్చింది. కానీ ఆ హామీ నెరవేర్చలేదు. పంజాబ్ సర్కార్​తో చర్చించేందుకు సిద్ధంగా ఉన్నాం. " అని కౌర్ తెలిపారు.

ఇంటర్నెట్ బంద్
దిల్లీ చలోకు రైతులు పిలుపునిచ్చిన నేపథ్యంలో హరియాణా సర్కార్ అలర్ట్ అయ్యింది. అంబాలా జిల్లాలోని 11 గ్రామాల్లో మొబైల్ ఇంటర్నెట్, ఎస్ఎంఎస్ సేవలను డిసెంబర్ 9 వరకు నిలిపివేసింది. ఈ మేరకు హోం శాఖ అదనపు ప్రధాన కార్యదర్శి సుమితా మిశ్రా ఉత్తర్వులు జారీ చేశారు.

రైతులకు కాంగ్రెస్ మద్దతు
దిల్లీలో రైతుల శాంతియుత నిరసనలకు కాంగ్రెస్ పార్టీ మద్దతు ప్రకటించింది. అలాగే రైతులు కేంద్రానికి చేస్తున్న డిమాండ్లకు కాంగ్రెస్ పార్టీ సంపూర్ణ మద్దతునిస్తుందని ఆ పార్టీ అగ్రనేత జైరాం రమేశ్ ఎక్స్​లో పోస్టు చేశారు. రైతుల నిరసనలకు ఉపరాష్ట్రపతి జన్​దీప్ ధన్‌ఖడ్ వంటి వ్యక్తుల పరోక్ష మద్దతు లభించిందని అన్నారు. అది రైతులకు బూస్టర్ డోస్ అని పేర్కొన్నారు.

ఇటీవల ముంబయిలో జరిగిన ఓ కార్యక్రమంలో ఉపరాష్ట్రపతి ధన్​ఖడ్ కీలక వ్యాఖ్యలు చేశారు. 'రైతులకు కేంద్ర వ్యవసాయ మంత్రి ఏమి వాగ్దానం చేశారో దయచేసి నాకు చెప్పాలని అభ్యర్థిస్తున్నాను? ఎందుకు హామీలను నేరవేర్చలేదు. రైతులకు ఇచ్చిన హామీలను నెరవేర్చడానికి ఏం చేయాలి? గత ఏడాది రైతు ఉద్యమం జరిగింది. ఈ ఏడాది కూడా ఉద్యమం చేస్తున్నారు.' అని ధన్​ఖడ్ వ్యాఖ్యానించారు. ఈ క్రమంలో ధన్​ఖడ్ వ్యాఖ్యలను ఉదహరిస్తూ కాంగ్రెస్ కేంద్ర సర్కార్​పై విమర్శలు గుప్పించింది.

'రైతులకు అండగా మోదీ సర్కార్'
వ్యవసాయ ఉత్పత్తులన్నింటినీ మోదీ సర్కార్ కనీస మద్దతు ధరకు కొనుగోలు చేస్తుందని కేంద్ర వ్యవసాయ శాఖ మంత్రి శివరాజ్ సింగ్ చౌహాన్ శుక్రవారం రాజ్యసభలో తెలిపారు. వరి, గోధుమ, జొన్న, సోయాబీన్‌ పంటలను మూడేళ్ల క్రితం కంటే 50 శాతం ఎక్కువకు కొనుగోలు చేస్తున్నామని పేర్కొన్నారు. మోదీ ప్రభుత్వం ఇప్పటికే రైతులకు లాభసాటి ధరలను ఇస్తోందని వ్యాఖ్యానించారు. రైతు నిరసనల నేపథ్యంలో శివరాజ్​ ప్రకటన ప్రాధాన్యం సంతరించుకుంది.