How to Make Butterscotch Ice Cream Recipe : వేసవి తాపం నుంచి ఉపశమనం పొందేందుకు పిల్లల నుంచి పెద్దవాళ్ల వరకూ అందరూ చల్లని పదార్థాలను తీసుకోవడానికి ప్రాధాన్యమిస్తుంటారు. ఈ క్రమంలో చాలా మంది బయటకు వెళ్లినప్పుడు ఐస్క్రీమ్(Ice Cream) తినడానికి మొగ్గుచూపుతుంటారు. అయితే, ప్రతిసారీ బయటినుంచి తెచ్చుకోవడం ఎందుకు.. ఈ సారి ఇంట్లోనే ఈజీగా ప్రిపేర్ చేసుకోండి. ఇందుకోసం బటర్ స్కాచ్ రెసిపీని తీసుకొచ్చాం. మరి.. దీన్ని ఎలా తయారు చేయాలో ఇప్పుడు చూద్దాం.
బటర్ స్కాచ్ ఐస్క్రీమ్ తయారీకి కావాల్సిన పదార్థాలు :
- పాలు
- పాలమీగడ
- నెయ్యి
- చక్కెర
- కస్టర్డ్ పౌడర్
- జీడిపప్పు
- బటర్ ఎసెన్షన్
- ఫుడ్ కలర్
సమ్మర్ స్పెషల్ : నోరూరించే మునక్కాయ బిర్యానీ - ఇలా ప్రిపేర్ చేయండి - కుమ్మేస్తారంతే!
బటర్ స్కాచ్ ఐస్క్రీమ్ తయారీ విధానం :
- ముందుగా స్టౌపై ఒక ప్యాన్ పెట్టుకొని అందులో అరలీటర్ పాలు పోసుకోవాలి. అవి ఒక పొంగు వచ్చేవరకు వేడి చేసుకోవాలి.
- ఇప్పుడు మరో బౌల్ తీసుకొని అందులో రెండు టేబుల్ స్పూన్ల కస్టర్డ్ పౌడర్ వేసుకోవాలి.
- ఆ తర్వాత దానిలో కొంచెం ఫుడ్ కలర్ యాడ్ చేసుకొని మరికొన్ని పాలను కొద్దికొద్దిగా పోసుకుంటూ ఉండలు లేకుండా ఆ మిశ్రమాన్ని కలిపి పక్కన పెట్టుకోవాలి.
- ఆ తర్వాత స్టౌ మీడియం ఫ్లేమ్లో ఉంచి, మరుగుతున్న పాలలో పావు కప్పు చక్కెర వేసి మిక్స్ చేసుకోవాలి.
- ఇప్పుడు.. చక్కెర కరిగి ఐదు నిమిషాలయ్యాక మీరు ముందుగా కలిపి పెట్టుకున్న కస్టర్డ్ పౌడర్ను ఈ మిశ్రమంలో యాడ్ చేసుకోవాలి.
- ఇలా రెండు మూడు నిమిషాలు మీడియం ఫ్లేమ్లో ఆ మిశ్రమాన్ని ఉడికించుకున్న తర్వాత బట్టర్ స్కాచ్ ఎసెన్షన్ యాడ్ చేసుకోవాలి.
- అనంతరం ఆ మిశ్రమం చిక్కగా మారేవరకు వేడి చేసుకోవాలి. ఆ తర్వాత స్టౌ ఆఫ్ చేసి ఆ మిశ్రమాన్ని పూర్తిగా చల్లార్చుకోవాలి.
- ఇప్పుడు మరో ప్యాన్ తీసుకొని అందులో పావు కప్పు చక్కెర వేసుకోవాలి.
- అది కరిగాక అర టీస్పూన్ వెన్న లేదా నెయ్యి కానీ యాడ్ చేసుకొని బాగా కరిగించుకోవాలి. అంటే.. క్యారమిల్ లాగా ప్రిపేర్ చేసుకోవాలి.
- ఆ తర్వాత పావు కప్పులో సగం జీడిపప్పు పలుకులు వేసి బాగా మిక్స్ చేసుకోవాలి.
- ఆపై స్టౌ ఆఫ్ చేసి వెంటనే నెయ్యి పూసిన ప్లేట్లో వేసి దాన్ని స్ప్రెడ్ చేసుకోవాలి. తర్వాత వాటిని ఒక కవర్లో వేసి కర్రతో కొడితే బటర్ స్కాచ్ తయారవుతుంది.
- ఇప్పుడు ముందుగా ప్రిపేర్ చేసుకొని చల్లార్చుకున్న కస్టర్డ్ మిశ్రమాన్ని.. మిక్సీ జార్లోకి తీసుకొని దానికి ఒక కప్పు పాల మీగడ వేసి మిక్సీ పట్టుకోవాలి.
- ఆ తర్వాత దాన్ని ఒక బాక్స్లోకి తీసుకొని గంటపాటు ఫ్రిజ్లో ఉంచుకోవాలి.
- అనంతరం మళ్లీ మిక్సీ జార్లోకి ఆ మిశ్రమాన్ని తీసుకొని దానికి ముందుగా రెడీ చేసుకున్న బటర్ స్కాచ్ని యాడ్ చేసుకొని మిక్సీ పట్టుకోవాలి.
- ఇప్పుడు మళ్లీ ఆ మిశ్రమాన్ని బాక్సులోకి తీసుకొని దానికి మూడు టేబుల్ స్పూన్ల వరకు బటర్ స్కాచ్ యాడ్ చేసుకొని దానిపై బటర్ పేపర్ పెట్టుకొని మూత పెట్టుకోవాలి.
- చివరగా దాన్ని డీప్ ఫ్రిజ్లో ఉంచి తర్వాత రోజు తీసి చూస్తే నోరూరించే టేస్టీ టేస్టీ.. బటర్ స్కాచ్ ఐస్క్రీమ్ రెడీ అయిపోతుంది!
సమ్మర్లో టీ, కాఫీ వద్దు హెర్బల్ టీ ముద్దు - ఆ ప్రాబ్లమ్స్ అన్నీ క్లియర్! - Coriander Tea Health Benefits
