అన్నం లేనివారి ఆకలి తీర్చే 'యాప్'​ - ఫుడ్​ కావాలన్నా, పెట్టాలన్నా బెస్ట్ ప్లాట్ ​ఫాం!

ఆకలి తీర్చేందుకు 'యాప్'​ రూపకల్పన - హెల్పింగ్ హ్యాండ్స్​​ను రూపొందించిన ఆదిలాబాద్​ విద్యార్థినులు

App for Food And Clothes Needy people : సామాజిక మాధ్యమ వినియోగం విపరీతంగా పెరిగింది. కేవలం సంభాషణలు, సందేశాల చేరవేతకే కాకుండా దీన్నో వేదికగా మలచుకుంటే సేవా కార్యక్రమాలను విస్తృతం చేయొచ్చనుకున్నారు. తమ ఆలోచనను ఉపాధ్యాయురాలితో పంచుకొని, ఆమె సహకారంలో ప్రత్యేకంగా ఓ యాప్​ను రూపొందించారు. పేదలకు ఆహారం, గుడ్డ అందించేందుకు 'హెల్పింగ్​ హ్యాండ్స్'​ పేరిట యాప్​ను తయారు చేశారు. ఇప్పటికే ఆల్ఫా వెర్షన్​ పూర్తి చేసుకుని బీటా వెర్షన్​ దశలోకి చేరుకుంది. త్వరలోనే పూర్తి స్థాయిలో సిద్ధమై ఆండ్రాయిడ్ యూజర్లకు అందుబాటులోకి రానుంది.

తమవంతుగా సాయం చేద్దామనుకుని : పాఠశాల నుంచి వివిధ సందర్భాల్లో క్షేత్రస్థాయి అధ్యయనం, స్థిరమైన అభివృద్ధి లక్ష్యాల సాధననో భాగంగా అనాథలు, పేదలు, యాచకులకు కడుపునిండా తిండిలేక, కట్టుకునేందుకు సరైన దుస్తుల్లేక ఎదుర్కొంటున్న ఇబ్బందులను ప్రత్యక్షంగా గమనించారు. వారిని ఆదుకునేందుకు తమవంతుగా ఏదైనా చేయాలనుకున్నారు ఆ విద్యార్థులు.

రూపొందించిన విద్యార్థులు, మార్గదర్శనం చేసిన ఉపాధ్యాయురాలు (ETV Bharat)

మరికొన్ని రోజుల్లో ఐఓఎస్​లోకి : ఇందుకోసం సామాజిక మాధ్యమాన్ని అవకాశంగా మలుచుకోవాలనున్నారు ఆదిలాబాద్​ పట్టణంలోని వాసవి వరల్డ్​ పాఠశాల్లో ప్రస్తుతం 8వ తరగతి చదువుతున్న జె.అవ్ని, ఇ.శాన్వికా రెడ్డి, జె.రాగప్రియ అనే విద్యార్థినులు. ఈ క్రమంలో తమకు కంప్యూటర్స్​ బోధించే ఉపాధ్యాయురాలు వి.మౌనికా రెడ్డి సాయంతో యాప్​ను రూపొందిచాలి అనుకున్నారు. థంకేబుల్​ అనే ప్లాట్​ఫాం సాయంతో యాప్​ తయారీ, అవసరమైన కోడింగ్​ వంటి ప్రక్రియలను పూర్తి చేశారు. పలు దశల్లో పనితీరును పరిశీలించి విజయవంతమయ్యారు. తుది దశకు చేరిన ఆ యాప్​ ఆండ్రాయిడ్ వినియోగదారులకు ప్లేస్టోర్​లో అందుబాటులో రానుండగా, ఐఓఎస్​ వినియోగదారులకు ఇంకాస్త సమయం పట్టనుంది.

యాప్​ను ప్లేస్టోర్​ నుంచి డౌన్లోడ్​ చేసుకున్నాక అందులో ఎన్​జీవో, ఫైండ్​ ఫుడ్​, డొనేట్​ ఫుడ్​ అనే ఐచ్ఛికాలు కనిపిస్తాయి. వాటి సాయంతో మిగిలిపోయిన భోజనం దానం చేయడం లేక, ఎక్కడ అందుబాటులో ఉందో తెలుసుకునేందుకు వీలవుతుంది. ఎంతమందికి సరిపోతుంది, ఏ సమయంలో తీసుకోవాలి, సంప్రదించాల్సిన ఫోన్ నంబరు వంటి వివరాలన్నీ అందుబాటులో ఉంటాయి. ఇలా ఉండటంతో దాతలను లేదా స్వీకర్తలను గుర్తించడం సులభమవుతుంది.

త్వరలో మరిన్ని సేవలు : హెల్పింగ్​ హ్యాండ్స్​ బృందంలో వాలంటీర్లుగా ఉన్న సభ్యులు అందుబాటులో ఉంటే మిగిలిపోయిన భోజనాన్ని అవసరమైన వారికి పంపిణీ చేస్తారు. వారు లేకపోతే స్థానికంగా ఉన్న సేవకులను జత చేస్తారు. భోజనం వృథా కాకుండా ఉంటుంది. స్వచ్ఛంద సంస్థలు, గోశాలల వివరాలు, రక్తదాతల వివరాలు కూడా ఈ యాప్​లో పొందుపర్చి మరింత ఉన్నతీకరించనున్నట్లు విద్యార్థులు తెలిపారు. ఇటీవల స్కూల్లో నిర్వహించిన టాలెన్షియా-2025 కార్యక్రమంలో భాగంగా సీబీఐ మాజీ జేడీ వి.వి.లక్ష్మీనారాయణ ఈ యాప్​ను ప్రారంభించి విద్యార్థులను ప్రశంసించారు.