స్కూల్​ షూలో నాగుపాము- భయంతో బాలుడి పరుగులు- చివరకు?

Snake In School Shoes : తమిళనాడు కోయంబత్తూర్​ జిల్లాలోని వెంకటేశ్వర నగర్ ప్రాంతంలో గురువారం ఓ నాగుపాము కలకలం సృష్టించింది. 8వ తరగతి చదువుతున్న ప్రదీప్​ అనే విద్యార్థి స్కూల్ బూటులోకి దూరింది. దీంతో బాలుడి కుటుంబ సభ్యులు భాయాందోళనకు గురయ్యారు.

ఇదీ జరిగింది..
స్కూల్​ షూస్​ వేసుకునేందుకు ఇంట్లోని చెప్పుల స్టాండ్​లో ఉంచిన బూట్ల దగ్గరకు వెళ్లాడు ప్రదీప్​ అనే బాలుడు. అక్కడ అతడికి బుసలు కొడుతున్న ఓ శబ్దం వినిపించింది. ఏంటా అని చూస్తే ఓ షూలో పాము పడుకొని ఉన్నట్లు గమనించాడు. వెంటనే పరిగెత్తుకుంటూ వెళ్లి తల్లిదండ్రులకు సమాచారం ఇచ్చాడు. అనంతరం ఫోన్​ ద్వారా వైల్డ్ లైఫ్ అండ్ నేచర్ కన్జర్వేషన్ ఫౌండేషన్‌ సిబ్బందికి తల్లిదండ్రులు సమాచారం అందించారు. ఫౌండేషన్ సిబ్బంది.. మోహన్​ అనే స్నేక్​ ఎక్స్​పర్ట్​ను ఘటనా స్థలికి పంపారు. అతడు చాకచక్యంగా దానిని చిన్నపాటి ప్లాస్టిక్ డబ్బాలో బంధించాడు. అనంతరం పామును సురక్షితంగా అడవిలో విడిచిపెట్టారు. తాము పట్టకున్న పాము కోబ్రా జాతికి చెందినదిగా చెప్పాడు మోహన్​.