హైదరాబాద్​లో సలార్ మేనియా - సంధ్య థియేటర్ వద్ద ఫ్యాన్స్ హంగామా - పోలీసుల లాఠీఛార్జ్

Salaar Mania in Hyderabad : ప్రభాస్​ సినిమా ఫస్ట్​ డే ఫస్ట్​ షో చూడాలని అందరూ అనుకుంటారు. అందులోనూ మొదటి నుంచి భారీగా అంచనాలు పెంచుతూ, అప్డేట్ అప్డేట్​కు ఆసక్తిని మరింత పెంచిన సినిమా సలార్. పలుమార్లు విడుదల వాయిదా పడిన సినిమా ఎట్టకేలకు థియేటర్లలో ఇవాళ్టి నుంచి సందడి చేస్తోంది. ఇక థియేటర్ల వద్ద ప్రభాస్ ఫ్యాన్స్ చేస్తున్న హంగామా అంతా ఇంతా కాదు. 

Police Lathi Charge on Prabhas Fans at Sandhya Theater : హైదరాబాద్​లోని ఆర్టీసీ క్రాస్ రోడ్స్​లో సంధ్య థియేటర్(Sandhya Theater) వద్ద సలార్ ఫ్యాన్స్ హల్​చల్ చేశారు. తొలి షో వేసే సమయంలో ఎక్కువ సంఖ్యలో ప్రేక్షకులు రావడంతో థియేటర్ యాజమాన్యం పోలీసు బందోబస్తును ఏర్పాటు చేసింది. చివరి క్షణంలోనైనా టికెట్​ దొరుకుతుందని ఆశతో వచ్చిన అభిమానులు ఒక్కసారిగా థియేటర్​ గేటు దూకి దూసుకెళ్లారు.

వాళ్లను అదుపుచేసేందుకు పోలీసులు తీవ్రంగా ప్రయత్నించా ఫలితం లేకపోయింది. చేసేదేం లేక వారిని అదుపు చేసేందుకు పోలీసులు లాఠీలకు పని చెప్పారు. పోలీసులు వైఖరిపై ప్రభాస్ ఫ్యాన్స్ గుర్రుమన్నారు. తమ అభిమాన హీరో సినిమా కోసం వస్తే లాఠీఛార్జ్ చేస్తారా అంటూ మండిపడ్డారు. ప్రభాస్ జిందాబాద్ అంటూ నినాదాలతో థియేటర్ పరిసరాలను హోరెత్తించారు.