దైవ దర్శనానికి వెళ్లి వస్తుండగా ఘోరం- రోడ్డు ప్రమాదంలో చిన్నారి సహా ఆరుగురు మృతి

Road Accident in Punjab : పంజాబ్​లోని సంగ్రూర్​ జిల్లాలో జరిగిన ఘోర రోడ్డు ప్రమాదంలో చిన్నారి సహా ఆరుగురు మృతి చెందారు. మరో వ్యక్తి గాయపడ్డారు. ట్యాంకర్​ను ఓవర్​టేక్​ చేసేందుకు ప్రయత్నించిన ఓ కారు.. ఎదురుగా వస్తున్న ట్రక్కును ఢీకొట్టింది. కారులో ఉన్న వ్యక్తులు దైవదర్శనానికి వెళ్లి తిరిగి వస్తుండగా గురువారం తెల్లవారుజామున ఈ ఘటన జరిగింది.  

జిల్లాలోని సుమాన్​ ప్రాంతానికి చెందిన ఆరుగురు వ్యక్తులు కారులో మలేర్​కోట్లకు దైవదర్శనానికి వెళ్లారు. తిరిగి వస్తున్న సమయంలో ముందు వెళ్తున్న ట్యాంకర్​ను ఓవర్​టేక్​ చేసేందుకు వాళ్ల కారు యత్నించింది. అదే సమయంలో ఎదురుగా వస్తున్న ట్రక్కును ఢీకొట్టింది. ఈ ఘటనపై సమాచారం అందుకున్న పోలీసులు అక్కడికి చేరుకుని సహాయక చర్యలు చేపట్టారు.  ప్రమాదంలో చిన్నారి సహా ఆరుగురు అక్కడికక్కడే మృతి చెందారని పోలీసులు తెలిపారు. మృతదేహాలను శవపరీక్షల కోసం ఆస్పత్రికి తరలించామని పోలీసులు చెప్పారు. మరణించిన వారంతా సుమాన్​ ప్రాంతానికి చెందినవారేనని వెల్లడించారు.