Police Seized 7 Kgs Gold in Sangareddy : అక్రమంగా తరలిస్తున్న 7 కిలోల బంగారం పట్టివేత.. నలుగురి అరెస్ట్

Police Seized 7 Kgs Gold in Sangareddy : కేంద్ర ఎన్నికల సంఘం ఆదేశాలతో రాష్ట్రవ్యాప్తంగా పోలీసులు విస్తృతంగా తనిఖీలు నిర్వహిస్తున్నారు. ఎక్కడికక్కడ చెక్‌పోస్టులు ఏర్పాటు చేసి ప్రత్యేకంగా చేస్తున్న సోదాల్లో భారీ స్థాయిలో బంగారం పట్టుబడుతోంది. తాజాగా సంగారెడ్డి జిల్లా జహీరాబాద్ మండలం చిరాగ్​పల్లి అంతర్రాష్ట్ర సరిహద్దు చెక్ పోస్ట్ వద్ద పోలీసు తనిఖీల్లో భారీగా బంగారం పట్టుబడింది. తెలంగాణ, కర్ణాటక బార్డర్ చెక్ పోస్ట్ వద్ద పోలీసులు తెల్లవారుజామున వాహన తనిఖీలు చేపడుతుండగా.. స్కార్పియో వాహనంలో తరలిస్తున్న 7 కేజీల బంగారాన్ని స్వాధీనం చేసుకున్నారు.

పట్టుబడిన బంగారం విలువ దాదాపు రూ.4.50 కోట్లు ఉంటుందని పోలీసులు అంచనా వేస్తున్నారు. గుజరాత్ నుంచి హైదరాబాద్​కు బిస్కెట్లు సహా ఆభరణాల రూపంలో బంగారం తరలిస్తున్నట్లు పోలీసులు గుర్తించారు. అక్రమ రవాణాకు పాల్పడుతున్న నలుగురు వ్యక్తులను అదుపులోకి తీసుకొని విచారిస్తున్నారు. బంగారానికి సంబంధించి ఎలాంటి పత్రాలు లేకపోవడంతో సీజ్ చేసి.. ఎన్నికల అధికారులకు అప్పగించనున్నట్లు చిరాగ్​పల్లి ఎస్సై నరేశ్​ తెలిపారు.