Three Persons Trapped in Pen Ganga River : గంగపుత్రులను కాపాడిన టైరు.. అసలేం జరిగిందంటే..?

Three Persons Trapped in Pen Ganga River Video : పెన్‌ గంగా నదిలో చిక్కుకున్న ముగ్గురు వ్యక్తులను టైరు సహాయంతో సురక్షితంగా ఒడ్డుకు చేర్చిన ఘటన ఆదిలాబాద్‌ జిల్లా భీంపూర్‌ మండలం వడూర్‌ సమీపంలో జరిగింది. అసలు ఏం జరిగిందంటే.. వరద ప్రవాహానికి పెన్‌ గంగా నదిలో కొట్టుకుపోతున్న పడవను కాపాడటానికి ఓ గంగపుత్రుడు నదిలో దిగాడు. పడవను ఒడ్డుకు చేర్చే క్రమంలో వరద నీటిలోనే చిక్కుకున్నాడు. దీంతో అతడిని కాపాడేందుకు మరో ఇద్దరు నీటిలోకి దిగారు. ఒక్కసారిగా వరద ఉద్ధృతి పెరగడంతో ముగ్గురూ నీటిలోనే చిక్కికుపోయారు.

విషయం తెలుసుకున్న ఆ ఏరియా ఎస్సై రాధిక హుటాహుటిన నది వద్దకు చేరుకున్నారు. ఇతర గంగపుత్రుల సహాయంతో ఓ పెద్ద టైరుకు తాడు కట్టించి.. నదిలో చిక్కుకున్న ముగ్గురిని సురక్షితంగా ఒడ్డుకు చేర్చారు. నీటి ప్రవాహంలో చిక్కుకున్న ముగ్గురు.. ప్రాణాలతో బయటపడటంతో అంతా ఊపిరి పీల్చుకున్నారు. వరద ఉద్ధృతి దృష్ట్యా గ్రామస్థులెవరూ నది వైపు వెళ్లవద్దని ఎస్సై సూచించారు.