112 కేజీలతో ప్రపంచంలోనే అతిపెద్ద 'గోల్డెన్ బర్గర్'- ఏం చేశారో తెలుసా?

Golden Burger Agra : ఉత్తర్​ప్రదేశ్​ ఆగ్రాలోని ఓ 5 స్టార్ హోటల్.. 112 కేజీల భారీ బంగారు బర్గర్​ను తయారు చేసింది. ప్రధానమంత్రి నరేంద్ర మోదీ ప్రేరణతో.. తృణధాన్యాలను ఉపయోగించి ఈ బర్గర్​ను తయారుచేశారు. దానిపై నుంచి గోల్డెన్ పేపర్​తో కోటింగ్ వేశారు. ఇది ప్రపంచంలోనే అతిపెద్ద గోల్డెన్ బర్గర్​గా భావిస్తున్నారు. జొన్నలు, రాగులు, కీరదోస, టమాట తదితర పదార్థాలతో ఈ బర్గర్​ను తయారు చేశారు. బర్గర్ చాచూగా ప్రాచుర్యం చెందిన పంజాబ్​కు చెందిన షెఫ్ శరన్​దీప్ సింగ్​ను.. గోల్డెన్ బర్గర్ తయారీ కోసం ఆగ్రాకు పిలిపించింది హోటల్ మేనేజ్​మెంట్. స్టార్ హోటల్ షెఫ్​లతో కలిసి ఆయన ఈ గోల్డెన్ బర్గర్ తయారు చేశారు.

ఫాస్ట్ ఫుడ్ ఆరోగ్యానికి మంచిది కాదని, బర్గర్ కూడా అందులో ఒకటని హోటల్ జనరల్ మేనేజర్ వివేక్ మహాజన్ చెప్పుకొచ్చారు. ఆరోగ్యానికి ఎలాంటి చెడు చేయని బర్గర్​ను ఇప్పుడు తాము తయారు చేశామని తెలిపారు. చాలా వరకు తృణధాన్యాలే వాడినట్లు చెప్పారు. 'దేశప్రజలు మిల్లెట్లు తినాలని ప్రధాని నరేంద్ర మోదీ చెబుతూ ఉంటారు. ఇది ఆరోగ్యానికి మంచిది. రైతులకు కూడా ప్రయోజనకరం. దీన్ని స్ఫూర్తిగా తీసుకొని ఈ ప్రత్యేక బర్గర్​ను తయారు చేశాం' అని వివేక్ వివరించారు. ప్రజలకు తృణధాన్యాల మీద అవగాహన కోసమే ఈ బర్గర్​ను సిద్ధం చేసినట్లు చెప్పారు. ఈ బర్గర్​ను 250 మంది పాఠశాల పిల్లలకు పంచినట్లు వివేక్ తెలిపారు.