సోదరుడి కోసం పెట్రోల్​ బంకులో యువతి ఎదురుచూపులు- అందరూ చూస్తుండగానే పట్టపగలే కిడ్నాప్​!

Girl Kidnapped In Gwalior : మధ్యప్రదేశ్​లోని గ్వాలియర్​ పట్టణంలో ఇద్దరు దుండగులు రెచ్చిపోయారు. అందరూ చూస్తుండగానే పెట్రోల్​ బంక్​ సమీపంలో సోదరుడి కోసం ఎదురుచూస్తున్న ఓ యువతిని కిడ్నాప్​ చేసి బైక్​పై ఎక్కించుకొని పరారయ్యారు. ఈ ఘటనకు సంబంధించిన దృశ్యాలు అక్కడే ఉన్న​ సీసీటీవీలో రికార్డ్​ అయ్యాయి. సోమవారం ఉదయం జరిగిన ఈ ఘటనకు సంబంధించిన వీడియో ప్రస్తుతం సోషల్​ మీడియాలో వైరల్​గా మారింది.

ఇదీ విషయం..
19 ఏళ్ల యువతి పని ముగించుకొని బస్సు దిగి తన సోదరుడి కోసం పెట్రోల్​ బంక్​ సమీపంలో ఎదురుచూస్తోంది. ఈ క్రమంలో ఇద్దరు గుర్తుతెలియని వ్యక్తుల్లో ఒకరు బైక్​పై హెల్మెట్‌ పెట్టుకొని పెట్రోల్‌ బంకు వద్దకు రాగా.. మరో వ్యక్తి ముఖం కనిపించకుండా గుడ్డ కట్టుకొని ఉన్నాడు. ఇతడు బంక్​ పరిసరాల్లో నిలబడ్డ యువతిని బలవంతంగా లాక్కుంటూ అప్పటికే బైక్​పై సిద్ధంగా ఉన్న వ్యక్తి దగ్గరకు తీసుకువచ్చాడు. అనంతరం ఆమెను అమాంతం రెండు చేతులతో ఎత్తుకొని బైక్​పై కూర్కొబెట్టాడు. బాధితురాలిని కూర్చొబెట్టగానే బైక్​ డ్రైవర్​ బండిని డ్రైవ్​ చేస్తూ అలాగే మెయిన్​ రోడ్డు వరకు తీసుకెళ్లాడు. రోడ్డుపైకి వెళ్లాక రెండో వ్యక్తి కూడా బైక్​పై కూర్చొని పరారయ్యారు. కాగా, చుట్టుపక్కల వారు చూస్తుండగానే ఈ ఘటన జరగడం గమనార్హం. అయితే బాధిత యువతి భింద్​ ప్రాంతానికి చెందిన నివాసి అని.. ఒక కేసు విషయంలో ఇరు వర్గాల మధ్య తలెత్తిన వివాదంతోనే దుండగులు అమ్మాయిని కిడ్నాప్​ చేసినట్లుగా తెలుస్తోందని స్థానిక పోలీసు చెబుతున్నారు. ఇక ఈ ఘటనపై కుటుంబ సభ్యుల ఫిర్యాదు మేరకు కేసు నమోదు చేసుకున్న పోలీసులు.. దర్యాప్తు ప్రారంభించారు.