భారీ అగ్ని ప్రమాదం.. 50 వస్త్ర దుకాణాలు దగ్ధం.. రూ.లక్షల్లో ఆస్తి నష్టం!

Fire In West Bengal today : బంగాల్​లోని హావ్​డా జిల్లాలో ఘోర అగ్నిప్రమాదం జరిగింది. మంగళహాట్​ క్లాత్​ మార్కెట్​లో శుక్రవారం తెల్లవారుజామున మంటలు చెలరేగాయి. దీంతో 50కి పైగా వస్త్ర దుకాణాలు అగ్నికి ఆహుతయ్యాయి. ఈ ఘటనలో ప్రాణ నష్టం లేకపోయినా.. ఆస్తి నష్టం మాత్రం భారీగా జరిగింది. రూ.లక్షల విలువైన వస్త్రాలను నష్టపోయామని వ్యాపారులు ఆవేదన వ్యక్తం చేస్తున్నారు.  

ప్రమాదంపై సమాచారం అందుకున్న అగ్నిమాపక సిబ్బంది.. హుటాహుటిన ఘటనాస్థలికి చేరుకున్నాయి. 15 ఫైర్​ ఇంజిన్లతో సహాయక చర్యలు చేపట్టాయి. తీవ్రంగా శ్రమించి మంటలను అదుపులోకి తీసుకొచ్చాయి. మరోవైపు, ఈ ఘటనపై కేసు నమోదు చేసుకున్న పోలీసులు.. దర్యాప్తు ప్రారంభించారు. అగ్నిప్రమాదానికి కారణాలు ఇంకా తెలియరాలేదని చెప్పారు.

కొన్నిరోజుల క్రితం.. కోల్‌కతాలోని రాజ్‌భవన్ సమీపంలోని బహుళ అంతస్తుల భవనంలో మంటలు చెలరేగాయి. భవనంలోని ఐదో అంతస్తు వరకు మంటలు వ్యాపించాయి. ఘటనాస్థలికి చేరుకున్న అగ్నిమాపక సిబ్బంది.. 15 ఫైర్ ఇంజన్లు, హైడ్రాలిక్ నిచ్చెనల సహాయంతో మంటలను అదుపులోకి తెచ్చాయి.