9 పిల్లలకు జన్మనిచ్చిన కుక్క- 400 మందికి గ్రాండ్​గా పార్టీ ఇచ్చిన యజమాని

Female Dog Gives Birth 9 Puppies : పెంపుడు కుక్కలను అల్లారుముద్దుగా పెంచుకుంటారు కొందరు. శునకాల బర్త్​డేను సైతం ఘనంగా చేస్తుంటారు. అయితే ఉత్తర్​ప్రదేశ్​లో ఓ మహిళ తన పెంపుడు శునకం.. 9 కుక్క పిల్లలకు జన్మనివ్వడం వల్ల ఆనందంలో తేలిపోయింది. ఈ క్రమంలో 400 మందికి పార్టీ ఇచ్చింది.

అసలేం జరిగిందంటే..
హామిర్​పుర్​లోని మేరాపుర్​కు చెందిన రాజ్​కాళి అనే మహిళ 'చట్నీ' అనే కుక్కను గత కొంతకాలంగా పెంచుతోంది. ఆ కుక్క ఇటీవలె 9 పిల్లలకు జన్మనిచ్చింది. ఈ క్రమంలో గ్రామస్థులు, బంధువులకు రాజ్​కాళి బుధవారం విందును ఏర్పాటు చేసింది. అంతేగాక కుక్క పిల్లలను అందంగా అలకరించింది. కుక్క పిల్లల కాళ్లకు పారాణి సైతం పెట్టింది. విందుకు హాజరైన అతిథులు పాటలు పాడారు. అంతేగాక డ్యాన్స్​ కూడా చేశారు.

"చట్నీ అనే శునకం వరుసగా మూడో ఏడాది ఒకేసారి 9 కుక్క పిల్లలకు జన్మనిచ్చింది. చట్నీ మా జీవితంలోకి వచ్చినప్పటి నుంచి మా కష్టాలు తీరాయి. ఎల్లవేళలా చట్నీ మా ఇంటి దగ్గరే ఉంటుంది. చట్నీకి పుట్టిన కుక్క పిల్లలన్నీ ఆరోగ్యంగా ఉన్నాయి. అందుకే సన్నిహితులకు విందు ఇచ్చా" అని రాజ్​కాళి తెలిపారు.