లైవ్ వీడియో.. ఓవర్​ స్పీడ్​లో కారు.. బైక్​తో పాటు ఇద్దరు విద్యార్థులను ఢీ

Car Hit Bike And Students : అతివేగంతో వచ్చిన ఓ కారు.. బైక్​తో పాటు ఇద్దరు విద్యార్థులను ఢీకొట్టింది. ఘటనలో బైకర్​ తీవ్రంగా గాయపడ్డాడు. విద్యార్థినిలు మాత్రం చిన్న చిన్న గాయాలపాలై.. ప్రాణాలతో బయటపడ్డారు. జులై 18న ఈ ఘటన జరగ్గా.. అందుకు సంబంధించిన సీసీటీవీ ఫుటేజ్​ తాజాగా వెలుగులోకి వచ్చింది. కర్ణాటకలోని రాయ్​చూర్ జిల్లాలో ఈ ఘటన జరిగింది. స్టేషన్ రోడ్‌లోని శ్రీ రాఘవేంద్ర పెట్రోల్ బంక్​ సమీపంలో ప్రమాదం జరిగినట్లు పోలీసులు తెలిపారు.

రోడ్డుపై నడుచుకుంటూ వెళ్తున్న విద్యార్థులను వేగంగా వచ్చిన కారు ఢీకొట్టడం సీసీటీవీ ఫుటేజ్​లో మనం చూడొచ్చు. దానికి ముందు బైకర్​ను కూడా బలంగా ఢీకొట్టడం గమనించవచ్చు. కులసుంబి బేరంగి ప్రాంతానికి చెందిన బైకర్​ శివరాజ్ పాటిల్​.. ఘటనలో తీవ్రంగా గాయపడినట్లు పోలీసులు తెలిపారు. మానవి నియోజకవర్గానికి చెందిన జ్యోతి, శివమంగళ అనే విద్యార్థినిలు స్వల్పంగా గాయపడినట్లు వారు వెల్లడించారు. ఘటనపై రాయ్​చూర్​ ట్రాఫిక్​ పోలీసులు కేసు నమోదు చేసుకున్నారు. ప్రమాదానికి కారణమైన కారును సీజ్​ చేసి విచారణ జరుపుతున్నట్లు పోలీసులు వెల్లడించారు.