Attari Railway Station : నిర్మానుష్యంగా భారత చివరి రైల్వే స్టేషన్​.. పాక్​కు సేవలు పునరుద్ధరించాలని ప్రజల విజ్ఞప్తి!

Attari Railway Station : ఒకప్పుడు ప్రయాణికులతో రద్దీగా ఉండే అట్టారీ రైల్వే స్టేషన్.. ఇప్పుడు నిర్మానుష్యంగా మారింది. భారతదేశ చివరి రైల్వే స్టేషన్​గా పిలిచే ఈ రైల్వే స్టేషన్​లో.. పాకిస్థాన్​తో నెలకొన్న ఉద్రిక్త పరిస్థితుల వల్ల ఈ పరిస్థితి ఏర్పడింది. పుల్వామా ఉగ్రదాడి తర్వాత.. సంఝౌతా ఎక్స్​ప్రెస్​ రద్దవడం వల్ల పాకిస్థాన్​కు వెళ్లేందుకు ఉన్న ఏకైక రైలు మార్గం మూతపడినట్లైంది. ఈ కారణంగా పాకిస్థాన్​లోని గురుధామ్​కు వెళ్లే సిక్కు యాత్రికులు సమస్యలు ఎదుర్కొంటున్నారు. వీరితో పాటు రైల్వే స్టేషన్​ మూతపడటం వల్ల చుట్టు పక్కల ప్రాంతాలు ఖాళీగా దర్శనమిస్తున్నాయి. దీంతో అట్టారీలో ఒకప్పుడు దాబాలు నిర్వహించిన వారు, చిన్న చిన్న వ్యాపారాలు చేసుకున్న వారు సైతం ఇప్పుడు ఉపాధి లేక ఇబ్బంది పడుతున్నారు. అంతేకాకుండా ఈ మార్గం గుండా వస్తువులు ఎగుమతి, దిగుమతులు చేసేవారి వ్యాపారం పూర్తిగా ఆగిపోయింది. దీనికి తోడు రూ.కోట్లు ఖర్చు చేసి నిర్మించిన రైల్వే స్టేషన్ కూడా ఖాళీగా ఉంది. ఇప్పటికైనా కేంద్ర ప్రభుత్వం ఈ రైల్వే స్టేషన్​పై దృష్టిసారించాలని స్థానికులు కోరుకుంటున్నారు. ఈ అట్టారీ రైల్వే స్టేషన్​ను పునరుద్ధరిస్తే ఇక్కడున్న వారికి ఉపాధి లభిస్తుందని విజ్ఞప్తి చేస్తున్నారు.