యువత కలిశారు... బడిని బతికించారు

పాఠశాల మూసివేస్తారని గ్రహించిన ఆ గ్రామ యువకులు జీర్ణించుకోలేకపోయారు. ఎలాగైనా బడిని బతికించుకోవాలనే ఉద్దేశంతో ఓ ఉద్యమమే లేవనెత్తారు. సర్పంచ్​ సాయంతో బడిబాట కార్యక్రమం నిర్వహించి ప్రతి విద్యార్థి ప్రభుత్వ పాఠశాలకు వచ్చేలా కృషి చేశారు. పాఠశాల ఉనికిని కాపాడిన ఈ సంఘటన సూర్యాపేట జిల్లా గుమ్మడవెళ్లిలో జరిగింది.

సూర్యాపేట జిల్లా మద్దిరాల మండలం గుమ్మడవెళ్లి గ్రామంలో సుమారు 60 సంవత్సరాల క్రితం ప్రారంభమైన పాఠశాల ఉనికి ప్రమాదంలో పడింది. ఈ పరిణామం పాఠశాలలో చదివిన పూర్వవిద్యార్థులను కలవరపాటుకు గురిచేసింది. అందరూ ఒక్కటై వరుస సమావేశాలు ఏర్పాటు చేసి ఓ నిర్ణయానికి వచ్చారు. పక్క గ్రామంలోని పాఠశాలకు వెళ్తున్న విద్యార్థులను రప్పిస్తే మూతపడకుండా ఉంటుందని యువకులంతా కలిసి గ్రామ సర్పంచ్​ సహకారం కోరారు. సర్పంచ్​ వెంటనే స్పందించి బడిబాట కార్యక్రమంలో పాల్గొని ఇంటింటికి తిరుగుతూ పిల్లలను గ్రామంలోని ప్రభుత్వ పాఠశాలకు పంపాలని కోరారు. వారికి చక్కటి విద్యాబోధన అందుతుందని విద్యార్థుల తల్లిదండ్రులకు హామీ ఇచ్చారు సర్పంచ్​ యాకయ్య.

గతంలో 150 మంది విద్యార్థులున్న ఈ పాఠశాలలో గత సంవత్సరం నుంచి 40 మంది విద్యార్థులు చదువుతుండగా ఈ ఉద్యమం వల్ల నేటికి 105కి పెరిగింది.

ఎలా సాధ్యమైంది:

మన ఊరు మన బడి కార్యక్రమానికి గ్రామ యువకులంతా కలసి సహాయం కోరగా గ్రామ సర్పంచ్ వల్లపు యాకయ్య గ్రామ పంచాయతీలో ఓ తీర్మానం చేశారు. గ్రామానికి ప్రైవేటు పాఠశాల బస్సులు రాకుండా చర్యలు తీసుకున్నారు. ఈ పాఠశాలలో కూడా ఆంగ్లంలోనే చక్కగా బోధిస్తారని చెప్పడం వల్ల తల్లిదండ్రులు పిల్లలను ప్రభుత్వ ప్రాథమికోన్నత పాఠశాలలో చేర్పిస్తున్నారు.

ఉపాధ్యాయుల పాత్ర:

బడి బాట కార్యక్రమంలో ఉపాధ్యాయులు గ్రామ సర్పంచ్​తో కలసి గ్రామంలో ప్రతిరోజు తిరిగి తల్లిదండ్రులలో ప్రభుత్వ బడుల గురించి అవగాహన కల్పించారు. మీ పిల్లల భవిష్యత్ మాకు వదిలేయండి, ఒక్క నెల రోజులు బడికి పంపించండి పిల్లల చదువులో, ఇంగ్లీష్​లో ఎంత మార్పు వస్తుందో గమనించండి అని వారు తల్లిదండ్రులను కోరారు. పిల్లలను ఆంగ్లంలో ప్రావీణ్యులను చేసే బాధ్యత తమదేనని.. అవసరమైతే బాండ్ పేపర్ రాసి ఇస్తామని ఉపాధ్యాయులు తల్లిదండ్రులకు హామీ ఇచ్చారు.

విద్యార్థులు పెరగడం వల్ల కొత్తసమస్య:

విద్యార్థులు పెరిగారు కాని అందరికి సరైన విద్యను అందించాలంటే ఉపాధ్యాయుల సంఖ్య పెంచాల్సి ఉంటుందని పూర్వవిద్యార్థులు చెబుతున్నారు. ప్రస్తుతానికి పాఠశాలలో ప్రధానోపాధ్యాయులతో కలసి ముగ్గురు ఉపాధ్యాయులున్నారని వెల్లడించారు. గ్రామ సర్పంచ్ ఒకరిని , పూర్వవిద్యార్థులు మరొకరిని విద్యావాలంటీర్లను అందించారని అయినా సరిపోవడం లేదని.. ఇంకా ఇద్దరు ఉపాధ్యాయులను నియమిస్తే బాగుంటుందని వారు అంటున్నారు.

అధికారులు వెంటనే స్పందించి ఉపాధ్యాయుల సంఖ్యను పెంచి విద్యార్థులకు చక్కటి విద్యాబోధన అందేలా చూడాలని పాఠశాల పూర్వవిద్యార్థులు కోరుతున్నారు.

ఇదీ చూడండి: నిండుకుండలా మేడిగడ్డ... అన్నారంకు గోదారమ్మ