Nithin and Sreeleela Movie Shooting : సినిమా షూటింగ్ అంటే చాలు ఆ ప్రాంతంలోని జనాలంతా వెళ్లి చూస్తుంటే సందడి నెలకొంటుంది. అక్కడ సినిమా షూటింగ్ అంటే ఇలా ఉంటుందా? అని ఆశ్చర్యపోతుంటారు. అలాగే నటి, నటులను చూస్తూ ఫొటోల కోసం ఎగబడుతుంటారు. ఆంధ్రప్రదేశ్లోని అల్లూరి సీతారామరాజు జిల్లా పోలవరం ప్రాజెక్టు ముంపు గ్రామాల్లో సినిమా చిత్రీకరణ జరిగింది. దీంతో అక్కడంతా సందడి వాతావరణం నెలకొంది. పోశమ్మగండి వద్ద మంగళవారం (నవంబర్ 26) రోజున సినిమా చిత్రీకరణలో భాగంగా ఆ చిత్ర బృందం కొన్ని సన్నివేశాలను షూట్ చేసింది. హీరో నితిన్, హీరోయిన్‌ శ్రీలీల నటిస్తున్న ఈ సినిమాలో కొంత భాగాన్ని ఈ పరిసర ప్రాంతాల్లో చిత్రీకరిస్తున్నట్లు సమాచారం.
కార్ల చెక్పోస్టు సన్నివేశం : మూవీ షూటింగ్లో భాగంగా ఆంధ్రప్రదేశ్ టూరిజం శాఖకు చెందిన పంటుపై మూడు కార్లతో పోశమ్మగండి, పూడిపల్లి పరిసర ప్రాంతాల్లో షూటింగ్ నిర్వహించారు. పోలవరం నుంచి గోదావరి నది ప్రవహిస్తుండటంతో తెరపై చాలా బాగా కనిపించే అవకాశం ఉంటుంది. సినిమాలోని ఓ కీలకమైన సన్నివేశం కోసం పంటుపై ఉన్న కార్లు పంట భూముల్లో నుంచి చెక్ పోస్టును దాటుకుని వెళ్తున్నట్లు షూటింగ్ తీశారు. అక్కడే ఉన్న గండిపోచమ్మ అమ్మవారి ఆలయం వెనుక వైపున కొన్ని షాట్స్ తీసుకున్నారు. ఉదయం నుంచి సాయంత్రం వరకూ ఈ సినిమా షూటింగ్ జరిగిందని స్థానికులు తెలిపారు. ఇందులో భాగంగా విలన్స్పై, కొంతమంది రైతులపై కొన్ని సన్నివేశాలను చిత్రీకరించినట్లుగా తెలుస్తోంది.
