ఈఎస్ఐ మందుల కొనుగోలు కుంభకోణంలో ప్రధాన నిందితురాలు దేవికారాణి కొల్లగొట్టిన మొత్తంపై ఏసీబీ దృష్టి సారించింది. ఆమె ఐఎంఎస్‌ సంచాలకురాలిగా నియమితురాలైన తర్వాత కూడబెట్టిన అక్రమాస్తుల విలువ వంద కోట్లుకు పైగానే ఉంటుందని ఇటీవలే విచారణ అధికారులు లెక్కగట్టారు. పీఎంజే నగల దుకాణంలోనే 7.3 కోట్ల విలువైన వజ్రాభరణాలు కొనుగోలు చేసినట్టు గుర్తించారు. అంతేకాకుండా బాలాజీ సిద్ది, అమర్సన్‌, కోల్‌కతా, శ్రీపెర్ల తదితర నగల దుకాణాల్లోనూ నగలు కొన్నట్లు వెల్లడైంది. ఇవన్నీ ఎక్కడ ఉన్నాయనే విషయం దర్యాప్తు అధికారులకు అంతుచిక్కడం లేదు.
ఎక్కడున్నాయనేది తేల్చడం...
ఆమెతో పాటు కుటుంబ సభ్యులు, బంధువులు, బినామీల ఇళ్లపై నిర్వహించిన దాడుల్లో కిలోన్నర ఆభరణాలను మాత్రమే ఏసీబీ గుర్తించగలిగింది. సుమారు ఏడు కోట్ల విలువైన ఆభరణాలు ఎక్కడున్నాయనేది తేల్చడం ఏసీబీ ముందు సవాలుగా మారింది. ఈ సందర్భంగా విచారణ అధికారులు లోతుగా దృష్టి సారించారు. ఆభరణాలను ఎవరి వద్దైనా దాచారా, విక్రయించారా అనే కోణంలోనూ దర్యాప్తు జరుపుతున్నారు.
వివరాలు మాత్రం వెల్లడించలేదు..
అక్రమ సొమ్ముతో కొనుగోలు చేసిన ఆభరణాలపై ఏసీబీ తొలుత దేవికారాణిని ప్రశ్నించింది. మూడు విడతలుగా ఆమెను కస్టడీలోకి తీసుకున్నా వివరాలు మాత్రం వెల్లడించలేదు. పలు మార్లు అడిగినా ఆభరణాల గురించి మాత్రం తనకు తెలియదని ఆమె చెప్పడం వల్ల అధికారులు తలలు పట్టుకుంటున్నారు. ఇదే కుంభకోణంలో ఆమె భర్త గురుమూర్తిని అరెస్టు చేసిన అనిశా అధికారులు ఆయనను ప్రశ్నించినా నోరు మెదపలేదు.
ఈ నేపథ్యంలో దేవికారాని భర్త గురుమూర్తిని కస్టడీలోకి తీసుకొని ప్రశ్నించాలని ఏసీబీ భావిస్తోంది. అదుపులోకి తీసుకుంటే మరిన్ని విషయాలు బయటపడతాయని అధికారులు భావిస్తున్నారు.
ఇదీ చూడండి : ఎక్కడికక్కడే ఆగిన ఎల్‌ఆర్‌ఎస్‌ ప్రక్రియ
