రైతుల పంట నష్టంపై పట్టింపు లేదు: జీవన్​ రెడ్డి

రాష్ట్రంలో అకాల వర్షాలతో రైతులు వరి, పత్తి, మొక్కజొన్న, సోయా పంటలు తీవ్రంగా నష్టపోయినా ప్రభుత్వం పట్టించుకోవడం లేదని ఎమ్మెల్సీ జీవన్‌ రెడ్డి ఆవేదన వ్యక్తం చేశారు. రాష్ట్రంలో దాదాపు కోటి ఎకరాల విస్తీర్ణంలో పంటలు పూర్తిగా దెబ్బతిన్నాయని అన్నారు. పొరుగు రాష్ట్రాలు కేంద్ర ప్రభుత్వంతో సంబంధం లేకుండా సహయక చర్యలు పూర్తి చేస్తుంటే.. రాష్ట్రంలో మాత్రం రైతుల పంట నష్టంపై కనీస పట్టింపు లేదన్నారు.

రాష్ట్రంలో ఇటీవల కురిసిన భారీ వర్షాలకు కోటి ఎకరాల్లో వరి, పత్తి, మొక్కజొన్న, సోయా పంటలు దెబ్బతిన్నాయని కాంగ్రెస్‌ పార్టీ సీనియర్ నేత, ఎమ్మెల్సీ జీవన్‌ రెడ్డి అన్నారు. నష్టపోయిన రైతుల జీవితాలతో కేంద్ర, రాష్ట్ర ప్రభుత్వాలు చెలగాటమాడుతున్నాయని ఆయన ధ్వజమెత్తారు.

ఇప్పటి వరకు పంటనష్టం అంచనా వేయకపోవడం రాష్ట్ర ప్రభుత్వ నిర్లక్ష్యానికి నిదర్శనమని దుయ్యబట్టారు. మహారాష్ట్ర, ఏపీ ప్రభుత్వాలు కేంద్రంతో సంబంధం లేకుండా ఎకరానికి పదివేలు పరిహారం ఇస్తామని ప్రకటించాయని అన్నారు. ఎకరాకు 10 వేలు నష్టం అంచనా వేస్తే 10 వేల కోట్ల పంట దెబ్బతిన్నదని వెల్లడించారు. కానీ రాష్ట్ర ప్రభుత్వం కేవలం వెయ్యి కోట్ల పంట మాత్రమే నష్టపోయినట్లు కేంద్రానికి నివేదిక ఇవ్వడమేంటని ఆయన ప్రశ్నించారు.

రైతుబంధు పేరుతో కేవలం ఐదు వేలు ఇస్తే.. ఇప్పుడు రైతులు ఎకరాకు 20 వేలు నష్టపోయారని తెలిపారు. తడిసిన ధాన్యాన్ని కూడా కొనుగోలు చేయాలని డిమాండ్​ చేశారు. సన్నరకం వరి ధాన్యాన్ని క్వింటాలుకు రూ.2500 ఇచ్చి ప్రభుత్వమే కొనుగోలు చేయాలని కోరారు.

ధరణి వినూత్నం అయినట్లు అట్టహాసం చేస్తున్నారని.. యూపీఏ అధికారంలో ఉండగానే నిజామాబాద్​లో ల్యాండ్ రికార్డ్ అప్​డేట్​ కార్యక్రమం ప్రారంభమైందన్నారు. కేంద్ర ప్రభుత్వ ఆలోచనలో భాగమే ధరణి అని.. దానికి కేంద్రమే నిధులు సమకూర్చుతుందని జీవన్ రెడ్డి వెల్లడించారు.

ఇదీ చూడండి : 'ధరణి'లో స్లాట్​ బుకింగ్ ఎలా చేయాలో... తెలుసుకుందాం