కాళేశ్వరం ప్రాజెక్టుకు సీడబ్ల్యూసీ అనుమతి లేదు: జీవన్‌రెడ్డి

MLC Jeevan Reddy on Kaleshwaram Project Corruption : రాష్ట్రంలో కాంగ్రెస్ ప్రభుత్వం ఏర్పాటుతో నిజమైన తెలంగాణ వచ్చిందని ఎమ్మెల్సీ జీవన్ రెడ్డి వ్యాఖ్యానించారు. గత ప్రభుత్వ పాలన సమైఖ్యాంధ్ర పాలన కంటే అధ్వాన్నంగా ఉండేదని ఆరోపించారు. కాళేశ్వరం ప్రాజెక్టుకు సీడబ్ల్యూసీ అనుమతి కూడా లేదని, ప్రాజెక్ట్‌కు కోటి ఇరవై లక్షల రూపాయల వరకు ఆర్ధిక భారం పడిందన్నారు. మేడిగడ్డ అక్రమాలపై విచారణ జరిపించాలన్న ఆయన, తుమ్మడిహట్టి వద్ద బ్యారేజీ నిర్మించాలని ప్రభుత్వానికి విజ్ఞప్తి చేసినట్లు వెల్లడించారు.

MLC Jeevan Reddy on Kaleshwaram Project Corruption : కాంగ్రెస్ ప్రభుత్వ ఏర్పాటు, రేవంత్ రెడ్డి ముఖ్యమంత్రిగా బాధ్యతలు చేపట్టడంతో రాష్ట్రంలో నిజమైన తెలంగాణ వచ్చిందని ఎమ్మెల్సీ టి.జీవన్‌రెడ్డి వ్యాఖ్యానించారు. గత ప్రభుత్వ పాలన సమైఖ్యాంధ్ర పాలన కంటే అధ్వాన్నంగా ఉండేదని ఆరోపించారు. నిధులు, నీళ్లు, నియామకాల(Appointments) పేరిట ఉద్యమించి సంపాదించుకున్న రాష్ట్రం, గత దశాబ్దం కాలంలో ఆ లక్ష్యాలను సాధించే దిశగా పాలన జరగలేదని ఆక్షేపించారు.

ఇంతకాలం కొనసాగిన నియంతృత్వ పాలనకు, ప్రజలు కోరుకున్న మార్పే కాంగ్రెస్ ప్రభుత్వం ఏర్పాటన్నారు. నాడు తెలంగాణ ఏర్పాటు సమయంలో అప్పుల వాటా రూ.అరవై వేల కోట్లు ఉంటే నేడు కేసీఆర్ కమిషన్​ల కక్కుర్తికి రూ.6 లక్షల కోట్లు దాటిందని దుయ్యబట్టారు. ప్రాజెక్టుల రీడిజైనింగ్ పేరిట రూ. 38 వేల కోట్లకు జరగాల్సిన చేవెళ్ల, ప్రాణహిత ప్రాజెక్ట్‌కు కోటి ఇరవై లక్షల రూపాయల వరకు ఆర్ధిక భారం పడేలా కాళేశ్వరం ప్రాజెక్టుకు సెంట్రల్ వాటర్ కమిషన్(CWC) అనుమతి కూడా లేకున్నా నిర్మాణం చేశారని ఎమ్మెల్సీ జీవన్ రెడ్డి అన్నారు.

తెలంగాణ రాష్ట్రం మనకు ఏర్పడినప్పటికీ, వర్చువల్​గా ఉమ్మడి రాష్ట్రం కంటే పాలన ఘోరంగా కొనసాగింది. ఒక విధంగా చెప్పాలంటే అసలు మనం కోరుకున్న తెలంగాణ ఇదేనా అని బాధ కలిగింది. మేడిగడ్డ ప్రాజెక్ట్ కుంగి పోవటంతో, కేంద్ర జలవనరుల శాఖ ఏదైతే దానిని మరల పరిశీలించి, ఆ కుంగి పోవటానికి గల కారణం సాంకేతిక లోపం, నిర్మాణ లోపమని వారు చెప్పటం జరిగింది. అదే విధంగా నివేదిక సమర్పించడంతో పాటు అసలు సెంట్రల్ వాటర్ కమిషన్ అనుమతి కూడా లేదని పేర్కొనటం జరిగింది. -టి.జీవన్ రెడ్డి, ఎమ్మెల్సీ

మేడిగడ్డ అక్రమాలపై విచారణ జరిపించాలన్న ఆయన, తుమ్మడిహట్టి వద్ద బ్యారేజీ నిర్మించాలని ప్రభుత్వానికి విజ్ఞప్తి చేసినట్లు వెల్లడించారు. సీడబ్ల్యూసీ అనుమతి లేనప్పుడు ఆర్థిక సంస్థలు నిధులు(Financial Institutions) కూడా ఇవ్వకూడదని అన్నారు. ఈ సందర్భంగా కాళేశ్వరానికి సాంకేతిక అనుమతులు సక్రమంగా లేవని, కాళేశ్వరం ప్రాజెక్టు నిర్మాణ లోపాలపై జ్యుడీషియల్‌ విచారణ వేయాలని జీవన్​రెడ్డి కోరారు.

MLC Jeevan Reddy Calls For Investigation on Kaleshwaram : కాళేశ్వరంపై న్యాయవిచారణ జరిపితేనే వాస్తవాలు బయటకొస్తాయని, సిట్టింగ్‌ జడ్జితో విచారణ జరిపించాలని రాష్ట్ర ప్రభుత్వానికి విజ్ఞప్తి చేస్తున్నట్లు తెలిపారు. ప్రజలకు వాస్తవాలు తెలపాల్సిన బాధ్యత కొత్త ప్రభుత్వంపై ఉందని స్పష్టం చేశారు. పదేళ్ల విద్యుత్‌ కొనుగోళ్ల విధానంపైనా సీఎం రేవంత్ రెడ్డి సమీక్షించారని, విద్యుత్‌ కొనుగోళ్లలో జరిగిన లోపాలపై చర్యలు తీసుకోవాలని సీఎం చెప్పినట్లు వివరించారు.