కరోనా చికిత్సకు ప్రత్యేకంగా మందేమీ లేకపోవడంతో ప్రస్తుతం వేర్వేరు ఔషధాలను ఉపయోగిస్తున్నారు. మున్ముందు ప్లాస్మా వంటి కొత్త థెరపీలను ప్రయోగించనున్నారు. కొవిడ్-19తో బాధపడుతున్నవారిపై నేరుగా ప్రయోగించాలంటే చాలా రకాల అనుమతులు కావాలి. నిరూపితం కాకుండా వాడితే ప్రాణాలకూ ముప్పుంటుంది. కొత్త ఔషధాలైనా, థెరపీలైనా ప్రయోగశాలలో కృత్రిమంగా పెంచుతున్న వైరస్‌పై ప్రయోగిస్తే వాటి పనితీరు తెలుసుకోవడంతోపాటు కొన్ని ప్రాణాలైనా కాపాడినట్లుంటుంది. ఆ దిశగానే సెంటర్‌ ఫర్‌ సెల్యూలార్‌ అండ్‌ మాలిక్యులర్‌ బయాలజీ(సీసీఎంబీ) శాస్త్రవేత్తలు ప్రయోగాలు చేస్తున్నారు.
బయో సేఫ్టీ లెవెల్‌-3 ల్యాబ్‌
కరోనా వైరస్‌ జన్యుక్రమాన్ని తెలుసుకునేందుకు, కొత్త ఔషధాలు, చికిత్సలను పరీక్షించేందుకు సీసీఎంబీలో సెల్‌ కల్చర్‌ చేస్తున్నారు. ఇందులో సహజ వాతావరణానికి వెలుపల, నియంత్రిత పరిస్థితుల్లో మానవ కణాలను పెంచి వాటిపై వైరస్‌ను వృద్ధి చేస్తారు. ప్రస్తుతం సీసీఎంబీలో కరోనా నిర్ధారణ పరీక్షలు చేస్తున్నారు. వీటి కోసం సేకరిస్తున్న నమూనాల్లో చాలా రకాల వైరస్‌లు ఉంటున్నా కరోనా వైరస్‌ను గుర్తించి వేరు చేస్తున్నారు. వైరస్‌ తీవ్రత ఎక్కువ ఉన్న నమునాలను ఇతర పరీక్ష కేంద్రాల నుంచి సైతం సేకరిస్తున్నారు. అరచేతి పరిమాణంలో ఉండే మైక్రోటైప్‌ ప్లేట్‌లో మొదట కణాలను వృద్ధి చేస్తున్నారు. బావుల మాదిరిగా ఉండే 24 అరల ఒక్కో ప్లేట్‌లో ఒకేసారి 24 కణాలను వృద్ధి చేయవచ్చు. వీటిపై వైరస్‌ను ప్రవేశపెడితే కణంలోకి చొచ్చుకుపోయి వాటి సంఖ్య పెరుగుతుంది. ఇవన్నీ ద్రవ రూపంలో ఉంటాయి. మైక్రోస్కోప్‌లో మాత్రమే వీటి పెరుగుదలను చూడొచ్చు. ముందు జాగ్రత్తగా బయో సేఫ్టీ లెవెల్‌-3 ల్యాబ్‌లో సెల్‌ కల్చర్‌ చేపట్టారు.
ఏంటీ ప్రయోజనం..
కణాలపై వైరస్‌ పెరుగుతున్న తీరును ఎప్పటికప్పుడు పరిశీలించేందుకు అవకాశం ఉంటుంది. ఆర్‌ఎన్‌ఏ ఎక్కువ మోతాదులో దొరుకుతుంది కాబట్టి జన్యుక్రమాన్ని రూపొందించడానికి మార్గం సులువవుతుంది. అన్నింటికి మించి ప్రస్తుతం దేశంలో తయారవుతున్న కరోనా ఔషధాలను తొలుత వీటిపై ప్రయోగించవచ్చు. ల్యాబ్‌లోని వైరస్‌పై ఆ ఔషధాన్ని ప్రయోగించినపుడు వాటి వృద్ధి ఆగిపోతే అది పనిచేస్తున్నట్లు భావించి ఔషధాన్ని తర్వాతి దశలోకి తీసుకెళ్లడానికి వీలవుతుంది. సీసీఎంబీ మొదలెట్టిన కరోనా వైరస్‌ సెల్‌కల్చర్‌ ప్రస్తుతం చాలా అడ్వాన్స్‌ దశలో ఉందని సంస్థ డైరెక్టర్‌ డాక్టర్‌ రాకేశ్‌ మిశ్రా తెలిపారు. వైరస్‌ కల్చర్‌కు ఉపయోగపడేలా తీవ్రత ఎక్కువ ఉన్న వైరస్‌ నమూనాలను పంపాలని సీసీఎంబీ తమని కోరిందని.. ఈ మేరకు సీసీఎంబీ, ఉస్మానియా వైద్యకళాశాల ఒప్పందం కుదుర్చుకున్నాయని కళాశాల ప్రిన్సిపల్‌ డాక్టర్‌ పి.శశికళారెడ్డి తెలిపారు.
ఇవీ చూడండి: తెలంగాణ, ఏపీల్లో హాట్‌స్పాట్‌ జిల్లాలివే..
