టోక్యో పారాలింపిక్స్లో భారత అథ్లెట్లు అత్యుత్తమ ప్రదర్శన కనబరుస్తారని పారాలింపిక్స్ సెక్రటరీ జనరల్ గురుశరన్ సింగ్ అన్నారు. భారత్..15 మెడల్స్ సాధిస్తుందని అందులో 5 బంగారు పతకాలు ఉంటాయని ఆశాభావం వ్యక్తం చేశారు.
పారాలింపిక్స్లో మొత్తం 9 క్రీడల్లో 54 మంది భారత పారా అథ్లెట్లు తమ అదృష్టాన్ని పరీక్షించుకోనున్నారు. ఈ పోటీల్లో భారత్ తరపున ఇంత మంది అథ్లెట్లు పాల్గొనడం ఇదే తొలిసారి. పారా ఆర్చరీ, పారా అథ్లెటిక్స్, పారా బ్యాడ్మింటన్, పారా కానోయింగ్, షూటింగ్ పారా స్పోర్ట్, పారా స్విమ్మింగ్, పారా పవర్ లిఫ్టింగ్, పారా టేబుల్ టెన్నిస్, పారా తైక్వాండో పోటీల్లో భారత అథ్లెట్లు పాల్గొననున్నారు.
"ఈ ఏడాది పారాలింపిక్స్ భారత్ ఎల్లప్పుడు గుర్తుపెట్టుకునేలా నిలిచిపోతుంది. భారత పారా అథ్లెట్లు కఠోరంగా శ్రమించి.. అంతర్జాతీయ పోటీల్లో ఉత్తమ ప్రదర్శన కనబరుస్తున్నారు. ప్రస్తుతం కూడా ఈ పోటీల్లో పాల్గొనేందుకు వారు సిద్ధంగా ఉన్నారు."
--గురుశరన్ సింగ్, సెక్రటరీ జనరల్.
పారా అథ్లెటిక్స్, పారా బ్యాడ్మింటన్, పారా ఆర్చరీలో ఎక్కువగా పతకాలు వస్తాయని ఆశిస్తున్నట్లు సింగ్ తెలిపారు. ఇప్పటివరకు 11 పారాలింపిక్స్ క్రీడల్లో పాల్గొన్న భారత్.. మొత్తంగా 12 మెడల్స్ సాధించింది. ఇందులో నాలుగు బంగారు పతకాలున్నాయి.
మరియప్పన్, దేవేంద్ర జజారియా అథ్లెట్లతో పాటు సుందర్ సింగ్ గుర్జార్, అజీత్ సింగ్, సందీప్ ఛౌదరి, నవదీప్ సింగ్ జావెలన్ త్రో ఆటగాళ్లు పతకం సాధిస్తారని భారత్ ఆశిస్తోంది. పారా బ్యాడ్మింటన్ ఆటగాడు ప్రమోద్ భగత్ బంగారు పతకం నెగ్గుతాడని ఆశలు ఉన్నాయి. షట్లర్ క్రిష్ణ నాగర్, తరుణ్ దిల్లోన్ బాగా రాణిస్తారని ఆశలు పెరుగుతున్నాయి.
రాకేశ్ కుమార్, శ్యామ్ సుందర్, వివేక్ ఛిక్కర, హర్వీందర్ సింగ్.. మొదలైన ఆర్చరీ ఆటగాళ్లు భారత్ తరఫున ప్రాతినిధ్యం వహించనున్నారు.
ఆగస్టు 24 నుంచి సెప్టంబర్ 5 వరకు పారాలింపిక్స్ జరగనున్నాయి.
ఇదీ చదవండి:Tokyo paralympics: 'ఒత్తిడి వద్దు.. పతకాలు అవే వస్తాయి'
