డబ్ల్యూపీఎల్‌ తొలి మ్యాచ్ ఆరంభం అదిరింది. పరుగుల వరద పారింది. దీంతో పాటే వికెట్ల మోత కూడా మోగింది. అయితే ఇదంతా చేసింది ముంబయి ఇండియన్సే. మెన్స్ ఐపీఎల్‌లో అత్యంత విజయవంతమైన టీమ్గా ఉన్న ముంబయి.. మహిళల లీగ్ ఆరంభ మ్యాచ్లోనూ తన ఆధిపత్యాన్ని చూపించింది. శనివారం జరిగిన మ్యాచ్లో హర్మన్‌ప్రీత్‌ సేన.. బెత్‌ మూనీ కెప్టెన్సీలోని గుజరాత్ జెయింట్స్‌ను చిత్తుగా ఓడించేసింది. మొదట హర్మన్‌ (65;), హేలీ మాథ్యూస్‌ (47), అమేలియా కెర్‌ (45*) విజృంభించడంతో ముంబయి 5 వికెట్లకు 207 పరుగుల భారీ స్కోరు చేసింది. ప్రత్యర్థి బౌలర్లలో స్నేహ్‌ రాణా (2/43) పర్వాలేదనిపించింది. అనంతరం సైకా ఇషాక్‌ (4/11), నాట్‌ సీవర్‌ (2/5), అమేలియా కెర్‌ (2/12) రాణించడంతో గుజరాత్ 15.1 ఓవర్లలో ఓవర్లలో 64 పరుగులకే కుప్పకూలింది. హేమలత(27) టాప్ స్కోరర్‌. హర్మన్‌ 'ప్లేయర్‌ ఆఫ్‌ ద మ్యాచ్'గా నిలిచింది.
అయితే ఈ మ్యాచ్ చూసిన వారు.. 2008 తొలి ఐపీఎల్‌ సీజన్‌ ఆరంభ మ్యాచ్ను గుర్తుచేసుకుంటున్నారు. అప్పుడు కోలక్తా, బెంగళూరు మధ్య ఫస్ట్ మ్యాచ్ జరిగింది. ఈ పోరులో టాస్‌ ఓడి తొలుత బ్యాటింగ్ చేసిన కేకేఆర్‌ మూడు వికెట్లు కోల్పోయి 222 పరుగులు చేసింది. మెక్‌కల్లమ్‌ 73 బంతుల్లోనే 158 రన్స్తో చెలరేగిపోయాడు. అనంతరం బ్యాటింగ్కు దిగిన ఆర్సీబీ 82 పరగులకే ఆలౌటై 140 పరుగుల తేడాతో భారీ పరాజయాన్ని అందుకుంది. అజిత్‌ అగార్కర్‌ మూడు వికెట్లు దక్కించుకున్నాడు. ఇప్పుడదే సీన్ రిపీట్‌ అయిందంటూ క్రికెట్ అభిమానులు కామెంట్స్‌ చేస్తున్నారు.
పోటీయే లేదు: హర్మన్‌ప్రీత్‌, అమేలియా కెర్‌, నాట్‌ సీవర్‌, హేలీ మాథ్యూస్‌ లాంటి టాప్ ప్లేయర్స్తో ముంబయి బలంగా కనిపించగా.. ఆష్లీ గార్డ్‌నర్‌, బెత్‌ మూనీ లాంటి అగ్రశ్రేణి ఆటగాళ్లతో ఉన్న గుజరాత్.. ముంబయికి జట్టుకు దీటుగా నిలుస్తుందని భావించారు. కానీ అలా జరగలేదు. ముంబయి టీమ్కు.. గుజరాత్ కనీస స్థాయిలో కూడా పోటీ ఇవ్వలేక చతికిల పడింది. మొదట టాస్‌ గెలిచి ఫీల్డింగ్‌ ఎంచుకున్న గుజరాత్.. ప్రారంభంలోనే యాస్తిక (1) వికెట్‌ పడగొట్టి జోష్తో ముందుకెళ్లింది. కానీ ఆ ఆనందం ఎక్కువ సేపు నిలవలేదు. ముందుగా హేలీ మాథ్యూస్‌, నాట్‌ సీవర్‌ బాగా ఆడగా.. ఆ తర్వాత హర్మన్‌ ఆకాశమే హద్దుగా చెలరేగి స్కోరు బోర్డును పరుగులు పెట్టించింది. 12 ఓవర్లకే ఆ జట్టు స్కోరు 100కు చేరుకుంది. అందులోనూ హర్మన్‌ కేవలం 22 బంతుల్లోనే హాఫ్ సెంచరీ పూర్తి చేసి ఆకట్టుకుంది. 17వ ఓవర్లో ఆమె పెవిలియన్ చేరేసరికి స్కోరు 166. చివరి ఓవర్లలో అమేలియా, పూజ (15) కూడా బాగానే రాణించడంతో స్కోరు 200 దాటిపోయింది. ఆ తర్వాత భారీ లక్ష్యంతో బరిలోకి దిగిన గుజరాత్.. ముంబయి బౌలర్ల ధాటికి ఇన్నింగ్స్ చేయలేక చతికిల పడింది. నాట్‌ సీవర్‌, ఇసీ వాంగ్‌ (1/7)ల దెబ్బకు 12 పరుగులకే 4 వికెట్లు కోల్పోయి ఓటమి దిశగా ముందుకెళ్లింది. మధ్య ఓవర్లలో సైకా ఇషాక్‌ బాగా రాణించడంతో గుజరాత్కు కష్టాలు ఇంకా పెరిగాయి. 23/7కు చేరుకున్న ఆ టీమ్ కనీసం 50 స్కోరైనా చేస్తుందా అనిపించింది. అయితే హేమలత కాస్త మంచి ఇన్నింగ్స్ ఆడి జట్టు పరువును కాపాడింది. రిటైర్డ్‌ హర్ట్‌గా వెనుదిరిగిన కెప్టెన్‌ బెత్‌ మూనీ (0) కూడా తిరిగి బ్యాటింగ్కు రాలేదు. దీంతో 9వ వికెట్‌తోనే గుజరాత్ ఇన్నింగ్స్ క్లోజ్ అయింది.
