టీమ్ఇండియాపై విజయవంతం అవ్వాలంటే స్పిన్నర్‌ జాక్ లీచ్ 'బోరింగ్‌' లైన్‌ అండ్‌ లెంగ్త్‌ను అనుసరించాలని ఆ జట్టు మాజీ ఆటగాడు గ్రేమ్స్వాన్ సూచించాడు. భారత్‌పై గత అనుభవం లేకపోవడం లీచ్, డామ్‌ బెస్‌కు సవాలేనని పేర్కొన్నాడు. 2012లో సిరీసులో స్పిన్నర్లు స్వాన్, మాంటీ పనేసర్‌ కీలక పాత్ర పోషించారు.
"జాక్ లీచ్‌ను మీరెలా చూస్తే అలా కనిపిస్తాడు. అతడో ఎడమ చేతివాటం స్పిన్నర్‌. రన్నప్‌ చేసి బంతిని స్టంప్స్‌పై పిచ్‌ చేస్తాడు. శ్రీలంక కోసం హెరాత్‌ ఏం చేశాడో చూడమని నేనతడికి చెబుతున్నా. లీచ్‌కు ఇదే బ్లూప్రింట్‌. భారత్‌లో ఆడుతున్నంత వరకు బోరు కొట్టేలా ఒకే లైన్‌ అండ్‌ లెంగ్త్‌లో బంతి విసరాలి. టీమ్ఇండియా ఆటగాళ్లు మంచి బంతులను గౌరవిస్తారు. లీచ్ సైతం ఎక్కువ చెత్త బంతులు వేయడు. టీమ్ఇండియా క్రికెటర్లు సుదీర్ఘంగా ఆడగలరు కాబట్టి అతడికీ లయ దొరుకుతుంది. ఒక ఎండ్‌కు పరిమితమై కచ్చితంగా నిలకడతో అతడు బంతులు వేయగలడు" అని స్వాన్ తెలిపాడు.
