Telangana New Ration Cards : రాష్ట్ర ఆవిర్భావం నుంచి కొత్త రేషన్ కార్డుల కోసం పేద ప్రజలు నిరీక్షిస్తున్నారు. దాదాపు 10 సంవత్సరాల తర్వాత, పేదల సుదీర్ఘ నిరీక్షణ ఇప్పుడు ఫలించబోతోంది. ప్రస్తుత ప్రభుత్వం కొత్త రేషన్ కార్డుల జారీ విషయంలో కీలకంగా ముందుకు వెళుతోంది. జనవరి 26 నుంచి జారీ ప్రక్రియ ప్రారంభం అవుతుందని చెబుతూ వస్తోంది. మరికొద్ది రోజుల్లో రేషన్ కార్డుల జారీ ప్రక్రియ ప్రారంభం కానుంది. ఈ క్రమంలోనే రాష్ట్రవ్యాప్తంగా 6.68 కుటుంబాలు నూతన కార్డులను పొందడానికి అర్హమైనవిగా పౌర సరఫరాల శాఖ ప్రాథమికంగా గుర్తించి, ఆ జాబితాను రాష్ట్రంలోని 33 జిల్లాలకు పంపించింది.
ఈ నెల 20 నుంచి 24 వరకు 4 రోజుల పాటు రాష్ట్రవ్యాప్తంగా గ్రామ, బస్తీ సభలు నిర్వహించడానికి రాష్ట్ర ప్రభుత్వం ఏర్పాట్లు చేస్తుంది. అక్కడి అభ్యంతరాలు స్వీకరించిన తర్వాత తుది జాబితాను ఖరారు చేస్తారు. ఇలా జిల్లా కలెక్టర్ల ద్వారా వచ్చే జాబితాల మేరకు పౌర సరఫరాల శాఖ కార్డులను మంజూరు చేస్తుందని తెలుస్తుంది.
వడబోత చేసిన తర్వాతనే రేషన్‌కార్డులు : 200 యూనిట్ల వరకు ఉచిత కరెంటు, ఆరోగ్య శ్రీ, రూ.500కు గ్యాస్‌ సిలిండర్‌, విద్యార్థులకు ఫీజు రీయింబర్స్‌మెంట్‌ వంటి సంక్షేమ పథకాలకు రేషన్‌కార్డు ఆధారం అవుతుంది. దీంతో రేషన్‌కార్డుకు బాగా డిమాండ్‌ ఏర్పడింది. ఇంతకు ముందు ఆన్‌లైన్‌లో దరఖాస్తులు తీసుకుని పరిశీలించే వారు. కానీ ఈసారి ప్రభుత్వం కొత్త పద్ధతిని అనుసరిస్తోంది. గత నవంబరులో నిర్వహించిన సమగ్ర కుటుంబ సర్వే ఆధారంగా ఎంపిక ఉంటుందని స్పష్టం చేసింది.
ఆ సభల్లో లబ్ధిదారుల సంఖ్య తగ్గొచ్చు, పెరగొచ్చు! : ఆ సర్వే ద్వారా రేషన్‌కార్డులు లేనివారి వివరాలను పౌర సరఫరాల శాఖ ఇప్పటికే తీసుకుంది. కొత్త కార్డులు కావాలన్న వారి, ఇప్పటికే ఉన్నకార్డుల్లో పేర్ల నమోదుకు దరఖాస్తు చేసుకున్న వారి సమాచారాన్ని అధికారులు అప్పుడే వడబోసేశారు. ఈ ప్రక్రియ తర్వాత కొత్త కార్డులకు 6,68,309 కుటుంబాలు అర్హమైనవిగా ప్రాథమికంగా గుర్తించారు. ఈ అన్ని కుటుంబాల్లో కలిపి 11,65,052 మంది పేర్లు ఉన్నాయి. గ్రామ, బస్తీ సభల తర్వాత కొత్త కార్డులు, అందులో లబ్ధిదారుల సంఖ్యలో హెచ్చు తగ్గులు ఉంటాయని సమాచారం.
అక్కడే అత్యధిక మంది అర్హులు : ప్రాథమిక జాబితా ప్రకారం చూస్తే హైదరాబాద్‌లో అత్యధికంగా 83,285 కుటుంబాలు, అత్యల్పంగా వనపర్తి జిల్లాలో 6,647 కుటుంబాలకు కార్డులు వచ్చే అవకాశం ఉంది. హైదరాబాద్‌ తర్వాత నిజామాబాద్‌ జిల్లాలో 31,151 కుటుంబాలు, ఖమ్మం జిల్లాలో 37,152, భద్రాద్రి కొత్తగూడెం జిల్లాలో 29,141, రంగారెడ్డి జిల్లాలో 29,405 కుటుంబాలు అత్యధికంగా రేషన్‌కార్డులను పొందనున్నాయి. వనపర్తి తర్వాత అత్యల్పంగా ములుగు జిల్లాలో 7,196 కుటుంబాలు రేషన్‌కార్డులను పొందనున్నాయి.
కొత్త రేషన్‌కార్డులపై సీఎం, పౌర సరఫరాల శాఖ మంత్రి సంతకాలు : ముఖ్యమంత్రి రేవంత్‌ రెడ్డి, పౌర సరఫరాల శాఖ మంత్రి ఉత్తమ్‌ కుమార్‌ రెడ్డి సంతకాలతో కూడిన లేఖ రూపంలో కొత్త కార్డులు జారీ కానున్నాయి. కొంతకాలం తర్వాత పాతవారికి, కొత్త వారికి కొత్త రూపంలోనే రేషన్‌కార్డులు జారీ చేయనున్నట్లు పౌర సరఫరాల శాఖ వర్గాల సమాచారం. దీనికి సంబంధించిన డిజైన్‌ ఇంకా ఖరారు కావాల్సి ఉంది.
కొత్త రేషన్ కార్డుల జారీ డేట్ ఫిక్స్ - సభ్యుల వివరాలు చేర్చేదానిపై ఆరోజే స్పష్టత
కొత్త రేషన్కార్డుల దరఖాస్తుల డేట్ ఇదే! - అప్లై చేసేందుకు మళ్లీ ఊరెళ్లాల్సిందే
